Read Hadiyya Yohaannis Mishiraachcha 20 Bible Online

Yohaannis Mishiraachcha 20 - Hadiyya bible

Yohaannis Mishiraachcha 20

¹Abba'i balla baqitem uulli tuunsukkisa hee'onam Magda'l Maaraame waammi beyyo waattam ammanenne waammanne ifiisakko'i kin hooramaakkookkoka moo'llo'o.

²Ee bikkina ise geetta'a Pheexiroos beyyoo Yesuus iittoo mulli losaanchi beyyoo matta'a «Moollanna waammiinsi fissakka'a massakko'ookko; hanno massakkoda'e neese lanqummoyyo» yito'o.

³Eehid yito'i ammanenne Pheexiroosii oo mulli losaanchii lamim waammi beyyo matto'o.

⁴Lamim geettu'uuyyi matto'aarem oo mulli losaanchi Pheexiroosiinsi higaa waammi beyyo gaassaa afukko.

⁵Afaa heeshaa waammi woro moo'u ammanenne talbiinsi baxamaakkoo keefa'n eddechchi ubaakkoo moo'ukko bagaan waammi woro aagukkoyyo.

⁶Pheexiroosa yakkam Simi'oonim ixxo awwonaa afaa waammi woro aagaa talbiinsi dadamaakkoo talbi fati'l eddechchaa.

⁷Yesuus horoorenne xaaxakko'i eddechchaa moo'ukko. Oo horoorenne xaaxakko'i eddechchi hee'ukkok talbiinsi baxamu danaam eddechchinne maqirette ihoo'n annanni beyyonne xaaxamukkisam hee'ukko.

⁸Ee lasage oo waammi beyyo gaassaa afu losaanchim waammi woro aagaa moo'aa amma'nnukko.

⁹Yesuus lehiinsi ki'oo'isa Keesammi Kitaab kurukkoka oo amman afeebe'e qoossito'oyyi hee'llo'o.

¹⁰Ee lasage oo lamem losaanim ixxuwwi mine elle'llo'o.

¹¹Ihukkaarem Maaraame waammi tochchonne uullita'a wi'llitam hee'llo'o. Wi'llitu'uuyyim heeshta'a waammi woro moo'llo'i ammanenne

¹²Waa'i asse'amaa'nnek lam asse'amaan qadaalli eddechcha edde'lla'a Yesuusik leesh hee'u beyyonne matii lokki aganne matii horoo'l aganne afuutto'ookkoka moo'llo'o.

¹³Oo Waa'i asse'amaanim Maaraamena «Taa meentichche, mahina wi'llitoolla?» yito'o. Isem ixxuwwina «I Moollanna massakko'ookko. Hanno massakkoda'e an la'ummoyyo» yito'o.

¹⁴Eehid yita'a afaree'n kollonne daba'llito'i ammanenne Yesuus uullaakkoo moo'llo'o. Ihukkaarem Yesuusatte ihukkisa laqqo'oyyo.

¹⁵Yesuusim isena «Meentichche, mahina wi'llitoolla? At ayye hassoolla?» yukko. Isem Yesuusina ee beyyonne kaasakko'i haqqa egeraancho labissa'a «Moollanna, at ixxo massitaattoolas an elleexxoommo. Hinki beyyonne dissitda'e kure» yito'o.

¹⁶Yesuusim isena «Maaraame» yukkaare ixxi kollonne daba'llita'a Ibro'isinne «Irabbuuni!» yito'o. Irabbuuni yimmi «Losisaancho» yimma.

¹⁷Yesuusim isena «Iyyanni beyyo iimane marumbee'i bikkina eese nakkititte. Ihukkaarem iyyabbaayyuwwi beyyo mattaa ‹ «An Iyyanni beyyoo ki'nnuwwinam anni beyyoo oohim i Waa'i beyyoo ki'nnuwwinam Waa'i beyyoo iimane maroommuulla» yaakko› yitaa kure» yukko.

¹⁸Oo Magda'l Maaraame matta'a Yesuus losaanina Moollanna moo'llo'isaa isena ixxi kuru woshshaa kutto'o.

¹⁹Ee ayyaanchom Abba'i balli hiimo Yesuusik losaan Ayihuxxi manna baddita'a u'llumma xuffo'isa hee'llonam Yesuus waaraa ixxuwwi lambe'enne uullaa «Xummi ki'nnuwwina ihona!» yukko.

²⁰Eehid yaa ixxeka angaa midaadoo ixxuwwina moo'isukko. Losaanim Moollanna moo'llo'i ammanenne liiranto'o.

²¹Odim Yesuus ixxuwwina «Xummi ki'nnuwwina ihona; Iyyanni eese asse'ukkisam anim ki'nnuwwa asse'oommo» yukko.

²²Eehid yaa ixxuwwi hanenne fooshshe'aa «Keesammi Ayyaana aa'llehe.

²³ Ayyekam baaxiilo haafitakkolas ixxuwwik baaxiil haafamookko. Ayyekam baaxiilo haafitakkobeelas ixxuwwik baaxiil haafamooyyo» yukko.

²⁴Tommiinsii lam losaaniinsii mat hee'u Qafa yakkam Toomaas ixxi losaa'n beyyo Yesuus waaru ammane ixxuwwinne maqire hee'ukkoyyo.

²⁵Ee bikkina oo mulli losaan Toomaasina «Moollanna moo'nnaammo» yita'a kutto'o. Ihukkaarem Toomaas ixxuwwina «Musmaarinne qasakko'i qoonca ixxi anganne moo'aa ee qoonca i anginne amadumbeelasii midaadonne yoo qooncam i anginne amadaa moo'umbeelasii an amma'nnoommoyyo» yukko.

²⁶Saantiinsi lasage Yesuusik losaan odim ee minenne hee'llo'o. Toomaasim ixxuwwinne maqirem hee'ukko. Oo ixxuwwi hee'llo'i mi'n goocim xufamaa hee'ukko. Gooc xufamukkisa hee'onam Yesuus waaraa ixxuwwi lambe'enne uullaa «Xummi ki'nnuwwina ihona!» yukko.

²⁷Ee lasage Yesuus Toomaasina «Ki anginne amaddaa i angika qoonca moo'e! Ki angam eebbaa i midaado amaddaa moo'e. Amma'nne bagaan maltitte!» yukko.

²⁸Toomaasim dabaraa «I Moollanna! I Waa'a!» yukko.

²⁹Yesuusim ixxena «At eese moo'llitti bikkina amma'nnitaatto; eese moo'lloo'n amma'nnitam keen maasse'anto'oo keeno» yukko.

³⁰Ka kitaabanne kitaabamubee'eka maalalsiisoo lobakat mare'e Yesuus ixxi losaa'n illagenne issaakko.

³¹Ihukkaarem kuk kitaabamukkok Yesuus Waa'i Beet ihukkisaa Waa'i doo'llaakkoo Kiristoosatte ihukkisaa amma'nnitakkamisinatte. Amma'nnitakka'ahim ixxi summinne heechcha siixxitakkamisinatte.