Read Hadiyya Yohaannis Mishiraachcha 21 Bible Online

Yohaannis Mishiraachcha 21 - Hadiyya bible

Yohaannis Mishiraachcha 21

¹Ee lasage Yesuus Xibiriyaadoosa yakkam dambalaq gadanonne ixxi losaanina odim moo'amukko. Moo'amukkokim ka'isinnette.

²Pheexiroosa yakkam Simi'oon, Qafa yamamoo Toomaas, Galiila yakkam uullanne yoo Qaana'a yakkam beero'i Naatinaa'eel, Zabdiwoosa yakkam manchi oosii Yesuus losaa'nnek lam mulli keenii maqirem hee'llo'o.

³ Pheexiroosa yakkam Simi'oon ixxuwwina «An qurxumme'e qaasheena mareenatte» yukko. Ixxuwwim «Neesem kiinninne maqirem malloommo» yita'a matta'a wongiranne aaggo'o. Ihukkaarem ee hiimo qurxumme'ika maham amaddo'oyyo.

⁴Uulli soodukkuuyyim Yesuus dambalaq tochchonne uullukko. Ihukkaarem Yesuusatte ihukkisa losaan laqqo'oyyo.

⁵Yesuusim ixxuwwina «I ooso, qurxumme'ika maham amaddakko'oyyonnihe?» yukko. Ixxuwwim «Amandummoyyo» yito'o.

⁶ Yesuusim ixxuwwina «Wongi'l makki kollonne shikka darabbehe siiddakkamo» yukko. Ee bikkina ixxuwwim darabbo'i ammanenne shikkanne qurxumme'i wo'mmu bikkina gosaasimma hooggo'o.

⁷Yesuus iittoo losaanchi Pheexiroosina «Kuk Moollannatte» yukko. Pheexiroosa yakkam Simi'oonim Moollanni ihukkisa macceesu ammanenne baxina sheelataa hee'u eddechcha edde'aa Yesuus beyyo mareena wo'onne xophukko.

⁸Ihukkaarem mulli losaan shikkanne wo'mmu qurxumme'e gosaassu'uuyyi wongirinne waatto'o. Mashka'oomim uulliinsi honsayyi meetira ihooqaxa qee'llita'a wo'i woronne hee'llo'o bagaan eehaa'nnam qee'lto'oyyi hee'llo'o[16].

⁹Wo'i woriinsi tochchonne fitto'i ammanenne giira, ee giiranne issamaakkoo qurxumme'ee qorosho'oo moo'llo'o.

¹⁰Yesuusim ixxuwwina «Kaba amaddakko'i qurxumme'ika eebbehe» yukko.

¹¹Ee bikkina Pheexiroosa yakkam Simi'oon wongiranne firaa shikkanne wo'mmaakkoo geejji qurxumme'e mat xibbee ontayyee sasoo wo'i woriinsi tochchonne gosaasukko. Qurxumme'i lobakat ihukkaarem shikkoom dereeramukkoyyo.

¹²Yesuusim ixxuwwina «Waallehe, ginjira ittehe!» yukko. Moollanni ihukkisa laqqa'a hee'llo'i bikkina matim ixxo «At ayyette?» yaa xa'mmeena iggukkoyyo.

¹³Yesuusim waaraa qorosho'o aa'aa ixxuwwina uwwukko. Ee'isam qurxumme'ikam uwwukko.

¹⁴Yesuus lehiinsi ki'aa lasage losaanina moo'amimmina kuk saxxi kore.

¹⁵Ginjira itta'a lasage Pheexiroosa yakkam Simi'oonina Yesuus «Yoona'i beet Simi'oona, at eese ka keeniinsi lonsitaa iittitoohonnihe?» yukko. Simi'oonim Yesuusina «Eeyya, Moollanna! An keese iittoommisa atim laqqootto» yukko. Yesuusim ixxena «Iikka geex gereebba abooyye» yukko.

¹⁶La'm korem «Yoona'i beet Simi'oona, eese iittitoohonnihe?» yukko. Simi'oonim «Eeyya, Moollanna! An keese iittoommisa atim laqqootto» yukko. Yesuusim «Iikka gereebba allaare» yukko.

¹⁷Odim saxxi korem «Yoona'i beet Simi'oona, eese iittitoohonnihe?» yukko. Saxxi korem «Eese iittitoohonnihe?» yu bikkina Simi'oon kichche'aa «Moollanna! At hundi luwwam laqqootto; an keese iittoommisam atim laqqootto» yukko. Yesuusim ixxena «Iikka gereebba abooyye.

¹⁸Hanqinam an kiina kuroommo; at harde'i hee'llittuuyyi ki anginnem lade'llaa hassitti beyyo taakke'llaatto. Ihukkaarem at lomma'nnitoo ammane ki anga biddiqaa'lloohaare mulli manni keese ladiisaa at matteena iittitoobee'i beyyo massookko» yaa

¹⁹«Eese awwone» yukko. Eehid yukkok Pheexiroos hinkido'i leho lehimminne Waa'ina lomba uwwooda'e moo'iseenatte hee'ukko.

²⁰ Yesuusa awwonukkuuyyim Pheexiroos laso qerephaa Yesuus iittoo losaanchi ixxuwwa awwonukkuuyyi moo'ukko. Oo losaanchim hii'm hurbaata itukkuuyyi Yesuusaannonne gadanonne afuuraa «Moollanna! Keese higisaa uwwookkok ayyette?» yukkane.

²¹Pheexiroosim ixxo moo'aa «Moollanna! Ku manchahe?» yaa Yesuusa xa'mmukko.

²²Yesuusim dabaraa «An waareembe'e ixxi hee'ona hasumta'nnim keese mah aagisaate? At eese awwone» yukko.

²³Ee bikkina oo Yesuus iittoo losaanchi «Lehooyyo» yakkam woshshi amma'nnaan abbaayyuwwi lambe'enne hundannem binnukko. Ihukkaarem Yesuus «An waareembe'e ixxi hee'ona hasumta'nnim keese mah aagisaate? At eese awwone» yukko bagaan «Oo losaanchi lehooyyo» yukkoyyo.

²⁴Ka woshshi bikkina kurookkokim ee losaancho. Odim ka woshsha kitaabukkokim ixxotte. Ixxi kuru woshshi hanqi ihukkisam neese lanqoommo.

²⁵Yesuus issukkok lobakat mulli luwwim yookko. Ixxi issu luwwi hundim kitaabamaakkoohan yakkota'n ee kitaabamu kitaabbuwwa dissimmina uulli hundim ihookkoka labisoommoyyo.