Read Hadiyya Yohaannis Mishiraachcha 3 Bible Online

Yohaannis Mishiraachcha 3 - Hadiyya bible

Yohaannis Mishiraachcha 3

¹Ayihuxxi manna awwonsaanchi mat Niqoodimoosa yakkam Farisaawekkichchi hee'ukko.

²Oo Niqoodimoos hiimonne Yesuus beyyo waaraa «Losisaancho! Ayyim ka at issitoo maalalsiisoo mare'uwwa Waa'i ixxennette ihubeelas isseena xanoobee'i bikkina at Waa'i beyyiinsi waattaattoo losisaanchi ikkittisa lanqoommo» yukko.

³Yesuusim Niqoodimoosina dabaraa «Hanqinam an kiina kuroommo; ayyim la'mmaagge qaramubeelas[4] Waa'i adillano moo'eenam xanooyyo» yukko.

⁴Niqoodimoos Yesuusina dabaraa «Manchi lomma'nnaa lasage la'mmaagge hinkid ihaa qarameena xanookko? La'mmaagge ixxi am godabonne aagaa qarameena xanoohonnihe?» yukko.

⁵Yesuusim dabaraa «Hanqinam an kiina kuroommo; ayyim wo'innee Keesammi Ayyaaninnee qaramubeelas Waa'i adillanonne aageena xanooyyo.

⁶Maariinsi qaramukkok maarame. Odim Keesammi Ayyaaniinsi qaramukkok Keesammi Ayyaa'nnaneme.

⁷La'mmaagge qaramimmi hasisookko yummi bikkina maalaltitte.

⁸Hafachchi hasu kolli hundannem hafachchookko. Ixxeka sagara macceessakkamo bagaan hanniinsi waaruda'e te'im hanno marooda'e laqqakkamoyyo. Keesammi Ayyaaniinsi qaramukkok hundim ee'isame» yukko.

⁹Niqoodimoos ixxena dabaraa «Kuk hinkid iheena xanookko?» yukko.

¹⁰Odim Yesuus dabaraa «At Isra'ee'l minaadabina losisaanchi ikkittuuyyi kaka hinkid laqqittoyyo?

¹¹Hanqinam an kiina kuroommo; neese lanqoommoka woncoommo; ni illinne moo'nnummokam kulloommo. Ihukkaarem ki'nnuwwi neese kulloommoka aa'llakkamoyyo.

¹²An ka uulli luwwa kurummaarem amma'nnitakkobee'ek iima'nneka kurumta'n hinkid amma'nnitakkeena xantakkamo?

¹³Iimaniinsi dillu Manchi Beetiinsi bagaan iimane firukkok matim bee'e.

¹⁴ Muse'e udma'anne naas xaariinsi hamashshichcho baxaa saqalukkisam Manchi Beetim

¹⁵ixxonne amma'nnookkok hundim heer heerina hee'oo heechcha siixxoo'isina saqalamimmi hasisookko.

¹⁶Mashka'oomim Waa'i ka uulla iittaa ixxeka mexxo'i Beeto uwwukkok ixxonne amma'nnookkok ayyim heer heerina hee'oo heechcha siixxoo'isinatte bagaan bi'oo'isinayyo.

¹⁷Waa'i ixxi Beeto ka uulla asse'ukkok ixxi Beet ka uulli minaadaba hundam gatisonatte bagaan ixxuwwanne oogatonayyo.

¹⁸Ixxonne amma'nnoohaannonne ayyennem Waa'i oogatooyyo. Ihukkaarem ixxonne amma'nnubee'ek mexxo'i Waa'i Beetonne amma'nnubee'i bikkina eraarem oogatamaakko.

¹⁹Waa'i ixxuwwanne oogatukkokim caakki ka uulla waarukkaare mannik bax jor ihu bikkina caakka sabba'a tuunso iittito'aarette.

²⁰Jora baxookkok ayyim caakkanne firukkaare ixxek bax la'amoo bikkina caakkanne firaa ha'yyooyyo.

²¹Ihukkaarem hanqa baxookkok ixxek bax Waa'i yukkisinne baxamaakkoohan ihukkis la'amoo'isina caakkanne firookko» yukko.

²²Ee lasage Yesuusii ixxi losaanii Yihuxxi uulla matta'a ee beyyonne xammaqukkuuyyi ixxuwwinne maqirem afuurukko.

²³ Yohaannisim Heenoona yakkam beyyina gadanonne yoo Saaleemanne lobakat wo'i hee'u bikkina manna xammaqam hee'ukko. Mannim waaraa xammaqamam hee'ukko.

²⁴Yohaannis ee ammane karaxxi minenne aagukkoyyi hee'ukko.

²⁵Ee ammane Yohaannis losaanii mat Ayihuxxi uulli manchii muccurimmi see'l bikkina fitantam hee'llo'o.

²⁶Yohaannis losaan waatta'a «Losisaancho! Kiinninne maqire Yoordaanoos daajji eeqidonne hee'ukkok atim ixxi bikkina kuttam hee'llittok eekke'e xammaqoolla. Manni hundim ixxi beyyo maroolla» yita'a Yohaannisina kutto'o.

²⁷Yohaannis ixxuwwina dabaraa «Ayyi manchim iimaniinsi ixxena uwwamu luwwiinsi bagaan maham isseena xanooyyo.

²⁸ ‹An ixxeensi gaassaa asse'amaammo bagaan Kiristoosatteyyo› yummisa ki'nnuwwi gagim laqqakkamo.

²⁹Idaayyichcho eebukkok ixxim idaayyichcho. Idaayyichchi wocoo woshsha uullaa macceesoo saawwim ixxi sagara macceesaa lobakata liiramookko. Ee'isam anim kaba lobakata liiramaammo.

³⁰Ixxi lophphukkuuyyi marona an hoffe'ummuuyyi marimmi hasisookko» yukko.

³¹Hanaan iimaniinsi waarookkok hundiinsim lobane. Ka uulliinsette ihookkok ka uullan ihu bikkina wocoo woshshim ka uulli woshsha. Iimaniinsi waarookkok hundiinsim lobane.

³²Ixxi moo'ukkokaa macceesukkokaa kurookko. Ihukkaarem ixxi kuroo woshsha aa'ookkok bee'e.

³³Ee ixxi kuru woshsha aa'ookkok Waa'i hanqo'an ihukkisa moo'isookko.

³⁴Waa'i asse'oo keenina ixxeka Keesammi Ayyaana keenaa uwwoobee'i bikkina Waa'iinsi asse'amukkok Waa'i sagaram wocookko.

³⁵ Waa'i ixxi Beeto iittaa ixxena yoo luwwa hundam Beetina uwwaakko.

³⁶Beetonne amma'nnoohaannina heer heerina ihoo heechchi yookko. Ihukkaarem Beetina ijaajamoobee'aannonne Waa'i quunqi ixxi hanenne yookko bagaan heechchi ixxena bee'e.