Read Hadiyya Yohaannis Mishiraachcha 4 Bible Online

Yohaannis Mishiraachcha 4 - Hadiyya bible

Yohaannis Mishiraachcha 4

¹Yohaannisiinsi loboka Yesuus lobakat keeno losaan issoo'isaa xammaqoo'isaa Farisaawe'uwwi macceesso'isa la'u ammanenne

²Yihuxxi uulla uraa daba'llaa Galiila marukko. Xale'i ixxi losaan xammaqqam hee'llo'o bagaan Yesuus xammaqukkoyyo.

⁴Ee Galiila marukkuuyyi Samaare'inne higimmi hasisoohan ihu bikkina

⁵ Yaaqoob ixxi beet Yooseefina uwwu beyyina gadan ihoo Sikaara yakkam Samaare'i uulli beero'o marukko.

⁶Ee beyyonnem Yaaqoob hinaa wo'o fissu bar hee'ukko. Yesuus taakke'aa hoogaa hee'u bikkina balli loh sa'aaxxi qunxe ihaakkoo ammanenne ee wo'i ba'l gadanonne afuurukko.

⁷Mat Samaare'i uulli meentichcho wo'o inkiitteena ee beyyo waatto'o. Yesuus ee meentichchona «Iina wo'ika agise» yukko.

⁸Ee ammane ixxi losaan hurbaata bitaa'lleena beero'o matta'a hee'llo'o.

⁹ Oo meentichcho Yesuusina dabatta'a «At Yihuxxi uulliinsette ikkittuuyyi eese Samaare'i uulli meentichcho hinkid wo'o xa'mmitoolla?» yito'o. Ayihuxxi mannii Samaare'i mannii hore'em edantam hee'llo'oyyo.

¹⁰Yesuus ee meentichchona dabaraa «Waa'i uwwu uwwanchaa ka keese ‹Wo'o agise› yookkok ayyetda'e ihukkisaa laqqita'n at ixxo uunxitam hee'llitto. Ixxim kiina heechcha uwwoo wo'o uwwam hee'ukko» yukko.

¹¹Oo meentichchom ixxena dabatta'a «Moollanna! Kiina wo'o inkiittoo mu'ut bee'e; barim xilla. Eehaare heechcha uwwoo wo'o hanniinsi siiddootto?

¹²Niina ka wo'o inkiilloommi bare uwwu niyyanni Yaaqoobiinsi at lophphitoohonnihe? Yaaqoob ixxi gagim, ixxi oosii ixxi diinatii ka ba'l wo'iinsi aggo'oohane» yito'o.

¹³Yesuus isena dabaraa «Ka wo'iinsi agookkok ayyim daba'llaa xeebe'ookko.

¹⁴Ihukkaarem an uwwoommi wo'iinsi agookkok hore'em xeebe'ooyyo. An uwwoommi wo'i ixxi woronne daadoo wo'i bu'isa ihookko. Oo daadoo bu'im ixxena heer heerina hee'oo heechcha uwwookko» yukko.

¹⁵Oo meentichcho ixxena dabatta'a «Moollanna! An xeebe'aa ka wo'iinsi inkiireena waaroombee'isina ee wo'o iina uwwe» yito'o.

¹⁶Yesuus isena dabaraa «Mattaa ki aro'o amaddaa keyye waare» yukko.

¹⁷Meentichchom dabatta'a «Iina aro'i bee'e» yito'o. Ixxim isena «At ‹Iina aro'i bee'e› yimminne hanqa woccaatto.

¹⁸Kiina onti aro'uwwi hee'llo'o. Kiinninne yookkokim kiina aro'oyyo. Eekka wocimminne hanqa woccaatto» yukko.

¹⁹Oo meentichchom dabatta'a «Moollanna! At hiraagaanchi ikkittisa an do'ixxaa la'aammo.

²⁰Niyyanno'i ka duunanne[5] Waa'ina otossito'o; ki'nnuwwi ihukkaarem Waa'ina manni otossimmi hasisookkok Yerusaaleemannette yitakkamuulla» yito'o.

²¹Yesuusim isena dabaraa «Taa meentichche, an yummi woshsha amma'nne; ka duunannettem ihukko te'im Yerusaaleemanne Anni Waa'ina ki'nnuwwi otossitakkambee'i amman waarookko.

²²Ki'nnuwwi Samaare'i manni laqqakkambee'i luwwina otossitakkamo. Ihukkaarem neese lanqoommaannina otossinoommo. Mashka'oomim Gatisaanchi waarookkok Ayihuxxi minaadabiinsette.

²³Waa'ina wodaninne otossitam keen Ayyaaninnee hanqo'isinnee otossitam amman waarookko. Ammanoomim kabadette; ee'isinne ixxena otossitam keeno Waa'i hasookko.

²⁴Waa'i ixxi gagoomim Ayyaana; ixxena otossitam keenim Ayyaaninnee hanqo'isinnee otossimmi hasisookko» yukko.

²⁵Oo meentichchom ixxena dabatta'a «Kiristoos waaroo'isa la'oommo. Ixxi waaroo ammane hundem luchchom niina kurookko» yito'o.

²⁶Yesuusim isena dabaraa «Oo at yitoottok keese atoorassoommok anetteme» yukko.

²⁷Ee ammanem Yesuusik losaan daba'llita'a waatta'a meentichchonne atooraroo'isa moo'lla'a lobakata maalalto'o. Ihukkaarem «Maha hassaate?» te'im «Isenne mahina atoorattoolla?» yukkok matichchim hee'ukkoyyo.

²⁸Ee lasage oo meentichcho iseka wo'i harachcho utta'a beero'o matta'a mannina

²⁹«An issummi luwwi hundam kuraakkoo mancho waattakka'a moo'llehe; ixxi Kiristoosatte ihoo'n urooyyo» yito'o.

³⁰Ixxuwwim beero'iinsi fitta'a ixxi beyyo waatto'o.

³¹Ee ammanem ixxi losaan «Losisaancho! Hurbaata ite» yita'a xa'mmito'o.

³²Ihukkaarem Yesuus ixxuwwina «An itoommok ki'nnuwwi laqqakkambee'i hurbaat yookko» yukko.

³³Eehid yukkaare ixxi losaan ixxuwwina'i ixxuwwim «Ayyi la'ukko ixxena hurbaata eebu manchi yoohonnihe?» yito'o.

³⁴Yesuusim ixxuwwina «I hurbaat eese asse'ukkaanni ijaajo issimma; ixxi baxom guullimma;

³⁵ki'nnuwwi ‹Kaba hurbaaxxi muratina soor agan gataakko› yitakkamuullayyonnihe? An ki'nnuwwina kuroommo; ki'nnuwwi daaphphitakka'a hurbaata murakkamisa ihaa ajaaraakkoo'isa moo'llehe.

³⁶Hurbaata murookkok ixxi malaayyika a'llookko. Heer heerinam hee'oo heechchina misha wixxaa'ookko. Ee bikkina wixukkokii murukkokii maqirem liirantamo.

³⁷‹Matii wixookko, mullekii murookko› yakkamok hanqame.

³⁸Ee'isam ki'nnuwwi badattakkobee'i hurbaata muttakkamisina asse'aammo. Mulli keen badarukkaare ixxuwwi badallatonne ki'nnuwwi aaggakko'ookko» yukko.

³⁹Oo meentichcho «An issummi luwwi hundam ixxi kuraakko» yita'a kutto'i bikkina ee beero'iinsi dut Samaare'i Yesuusanne amma'nnito'o.

⁴⁰Ee bikkina Samaare'i ixxi beyyo waatta'a ixxuwwinne maqire afuuroo'isina uunxito'aare ee beyyonne lam balla hosukko.

⁴¹Yesuus wocu woshshi mashka'inne lobakat mulli keenim exxaa amma'nnukko.

⁴²Ixxuwwim ee meentichchona «Kaba neese amma'nninummok at kuttitti woshshi bikkinatte ihoo'n neese ni gagim ixxeensi macceensummi bikkinatte. Hanqinam minaadaba Gatisaanchi ihukkisa lanqaammo» yito'o.

⁴³ Yesuus lam balla ee beyyonne hosaa lasage Galiila marukko.

⁴⁴Yesuus ixxi gagim «Hiraagaanchi ixxi gaqqi uullanne lomba siixxooyyo» yaa kuraa hee'ukko.

⁴⁵ Ihukkaarem Shaashshiqqi Ugudina Galii'l manni Yerusaaleema matta'a hee'llo'i ammane Yesuus issu luwwi hundam moo'lla'a hee'llo'i bikkina Yesuus ixxuwwi uulla maru ammanenne liiranchinne aa'llo'o.

⁴⁶ Ee lasage wo'o woyi'n diqaasanne dabaru beyyo Galiilanne yoo Qaana'i beero'o daba'llaa marukko. Ee ammane Qifirinnaahoomanne ixxek beet xissaakkoo mat gassaanchi hee'ukko.

⁴⁷Yesuus Yihuxxi uulliinsi Galiila waarukkisa oo gassaanchi macceesu ammanenne ixxek beet foo'l manchi hee'u bikkina Qifirinnaahooma Yesuus dillaa fayyiisoo'isina uunxukko.

⁴⁸Ee bikkina Yesuus ixxena dabaraa «Mare'ee maalalsiisoo luwwaa moo'llakkobeelas ki'nnuwwi amma'nnitakkamoyyo» yukko.

⁴⁹Oo gassaanchim «Moollanna! I beet lehoo'n mallona» yukko.

⁵⁰Yesuus ixxena dabaraa «Ki beet lehooyyo; mare» yukko. Oo manchim Yesuus wocu sagara amma'nnaa marukko.

⁵¹Oo manchi daba'llaa maronam ixxek awwaadaan ixxenne edanta'a beetina e'llukkisa kutto'o.

⁵²Ixxim beetina e'llu amman hinki ammanda'e ihukkisa xa'mmukko. Ixxuwwim ixxena «Beeballa lamar sa'aatanne ixxek iibbi urukko» yito'o.

⁵³Ee xissu beet annim Yesuus «Ki beet lehooyyo» yu amman ee amman ihukkisa la'ukko. Ee bikkina ixxii ixxi mi'n abaroosii hundim Yesuusanne amma'nnito'o.

⁵⁴Yesuus Yihuxxi uulliinsi Galiila waaraa issu maalalsiisoo mare'ina ku mare'i la'mmane.