Read Hadiyya Yohaannis Mishiraachcha 5 Bible Online

Yohaannis Mishiraachcha 5 - Hadiyya bible

Yohaannis Mishiraachcha 5

¹Ee lasage Ayihuxxi mannik ugud hee'u bikkina Yesuus Yerusaaleema marukko.

²Yerusaaleemanne Gereebbi Gooca yakkam beyyonne leeraakkoo delbi wo'i hee'ukko. Ee wo'ikim summi Ibro'isinne Beetasaayda yakkaman hee'ukko. Ee beyyonne odim daba'llamakkam onti gooc hee'ukko.

³Ee daba'llamakkam goocannem jabbaa'nnk, qooqquwwik, dimmuwwikii shiihuwwikii dut minaadab iinse'aa hee'ukko[6].

⁴

⁵Sadee sadeenti hiinchoo jabbaakkoo mat manchim ee beyyonne hee'ukko.

⁶Yesuus ee mancho moo'aa ee beyyonne lobakat ammane iinse'aa hee'ukkisa la'aa «Mancho, fayye'lleena hassoohonnihe?» yukko.

⁷Oo jabbaanchim dabaraa «Moollanna! Wo'i heekke'oo ammane eese wo'onne aagisoo manni bee'e. An aageena maronam mullek iinniinsi gaassaa aagookko» yukko.

⁸Yesuus ixxena «Iimitaa kiikka dakka iyyitaa taakke'llaa mare» yukko.

⁹Ee ammanem oo manchi fayye'aa ixxeka dakka iyyaa taakke'aa marukko. Oo ballim Usheexxaxxi Ayyaam hee'ukko.

¹⁰ Ee bikkina Ayihuxxi manna awwonsaan ee fayye'u manchina «Kaballi Usheexxaxxi Ayyaamo. Usheexxaxxi Ayyaamonne dakka iyyitona Seer uwwooyyo» yito'o.

¹¹Ihukkaarem oo manchi ixxuwwina dabaraa «Eese fayyiisu manchi ‹Kiikka dakka iyyitaa mare› yaakko» yukko.

¹²Ixxuwwim ee manchina «Keese ‹Dakka iyyitaa mare› yu manchi ayyette?» yito'o.

¹³Ee beyyonne lobakat minaadab hee'ukko. Yesuus ee minaadaphphi lambe'enne aagaa daphphaa xa'u bikkina oo fayye'u manchi fayyiisukkok ayyetda'e ihukkisa la'ukkoyyi hee'ukko.

¹⁴Eehanniinsi lasage Yesuus ee mancho Keesammi Minenne siidaa ixxena «Oono'o! At fayye'llaatto; kanniinsi lophphookkok keesenne afoobee'isa ka lasage baaxiilo baxxitte» yukko.

¹⁵Oo manchim maraa ixxo fayyiisukkok Yesuusatte ihukkisa Ayihuxxi manni awwonsaanina kurukko.

¹⁶Ayihuxxi manni awwonsaanim Usheexxaxxi Ayyaamonne ee mancho fayyiisu bikkina Yesuusa hawwisso'o.

¹⁷Ihukkaarem Yesuus ixxuwwina «Iyyanni kabad afeebe'em baxoolli ihu bikkina anim baxoommuulla» yukko.

¹⁸Ayihuxxi manni awwonsaan Yesuusa shiteena murte'lla'a ki'llo'ok Usheexxaxxi Ayyaa'm seera gindu bikkina xale'i ihoo'n ixxi gaga Waa'ina Beet issaa Waa'inne gudaanchi ihu bikkinatte.

¹⁹Yesuus ixxuwwina dabaraa «Hanqinam an ki'nnuwwina kuroommo; anni issukkuuyyi moo'ukkan xale'e bagaan beet ixxi gaginne maham isseena xanooyyo. Anni issookkoka hundam beetim issookko.

²⁰Anni beeto iittoo bikkina baxoo luwwi hundam ixxena moo'isookko. Ki'nnuwwi maalaltakkamisina ka keeniinsim lophphoo baxo moo'isookko.

²¹Waa'i leto'i keeno lehiinsi ki'isaa heechcha uwwoo'isam Beetim hasukkaannina heechcha uwwookko.

²²Anni ayyennem oogatooyyo. Oogatimmi malaayye hundam Beetina uwwaakko.

²³Ee'isa issukkokim manni hundim anna lonsoo'isam Beetom lonsoo'isinatte. Beeto lonsoobee'ek ayyim ixxi Beeto asse'u Waa'am lonsoobee'ane.

²⁴Hanqinam an ki'nnuwwina kuroommo; an wocoommi woshsha macceesookkokii eese asse'ukkaannonne amma'nnookkokii heer heerina hee'oo heechcha siixxaakko. Ixxi lehiinsi heechchanne higaakko bagaan ixxonne oogatoommoyyo» yukko.

²⁵Odim Yesuus «Hanqinam an ki'nnuwwina kuroommo; leto'i keen Waa'i beetika sagara macceessam amman waarookko. Oohim kabadette. Macceessam keenim heechcha siixxitamo.

²⁶Waa'i heechchina bu'i ihukkisam ixxi beetom heechchina bu'i issaakko.

²⁷Ixxi Manchi Beet ihu bikkina oogatoo malaayye anni ixxena uwwaakko.

²⁸Kannonne maalaltakkotte! Waammi woronne yo'i keen hundim ixxi sagara macceessa'a waammi woriinsi fittam amman waarookko.

²⁹ Eroka baxxo'i keen lehiinsi heechchina ki'llamo. Odim jora baxxo'i keen oogato'o aa'lleena lehiinsi ki'llamo» yukko.

³⁰Odim Yesuus «An eese asse'ukkaanni doo'lla ixxeensi macceesummisinne isseena hasoommo bagaan i doo'lla issoombee'i bikkina an oogatoommi oogato'i hanqo'ane. An i malaayyinne maham isseena xanoommoyyo.

³¹An i gaqqi bikkina kurumta'n i woshsha ayyim hanqi issaa aa'ooyyo.

³²Ihukkaarem i bikkina kurookkok mullekim yookko. Ixxi i bikkina kuru woshshi hanqi ihukkisa la'oommo.

³³ Ki'nnuwwi Yohaannis beyyo manna asse'llakko'aare hanqi bikkina ixxi kuraakko.

³⁴Eekka yummok ki'nnuwwi gattakkona hasaatette bagaan i bikkina manni naqqasona hasaateyyo.

³⁵Ixxim gii'llisa aphphoohanee caakkisoohanee hee'ukko. Ki'nnuwwi hoffi ammanina ee caakkanne liirantakkeena doo'llitakko'o.

³⁶Ihukkaarem i bikkina Yohaannis kurukkaanniinsi lonsaa kurookkok yookko. Oohim an baxaa guullona Iyyanni uwwu baxo. Oo an baxoommi bax ixxi gagim Iyyanni eese asse'ukkisa kurookko.

³⁷ Eese asse'u Iyyanni ixxi gagim i bikkina kuroolla. Ixxeka sagara ki'nnuwwi hore'em macceessakko'oyyo. Ixxeka hagaram hore'em moo'llakko'oyyo.

³⁸Ixxi asse'ukkoka amma'nnitakkambee'i bikkina ki'nnuwwi woronne ixxek sagar bee'e.

³⁹Keesammi Kitaabanne heer heerina hee'oo heechchi ki'nnuwwina yookkoka labissakka'a saarayyitakkamo. Oo kitaabim i bikkina kuroohane.

⁴⁰Ihona bagaan heechcha siixxitakkeena i beyyo waarimma sabbakko'ookko.

⁴¹Manni eese lonsona hasoommoyyo.

⁴²Ki'nnuwwi woronne Waa'ik iitti bee'isa an la'oommo.

⁴³An Iyyanni summinne waarummaare ki'nnuwwi eese aa'llakko'oyyo. Mullek ixxi gaqqi summinne waaruta'n aa'llakkamo.

⁴⁴Odim ki'nnuwwi matem Waa'iinsi waaroo lomba sabbakka'a ki'nnuwwina'i ki'nnuwwim lonsaqqantakkam keen hinkid amma'nnitakkeena xantakkamo?

⁴⁵An ki'nnuwwa Iyyannanne kasasoommoka labissakkotte. Ki'nnuwwa kasasookkok ki'nnuwwi neeyyato issitakkam Muse'ette.

⁴⁶Muse'e amma'nnitakko'oohan yakkota'n eesem amma'nnitakkam hee'llakko'o. Mashka'oomim Muse'e kitaabukkok i bikkinatteme.

⁴⁷Ihukkaarem ixxi kitaabu luwwa amma'nnitakkobeelas hinkid i sagara amma'nnitakkamo?» yukko.