Read Hadiyya Yohaannis Mishiraachcha 6 Bible Online

Yohaannis Mishiraachcha 6 - Hadiyya bible

Yohaannis Mishiraachcha 6

¹Ee lasage Yesuus Galii'l Dambalaq eeqido firukko. Oohim Xibiriyaadoos Dambalaq hee'ukko.

²Yesuus jabbaano fayyiisimminne issu maalalsiisoo mare'e moo'llo'i bikkina lobakat manni ixxo awwonto'o.

³Duunanne firaa ixxi losaaninne maqirem Yesuus afuurukko.

⁴Ee ammane Ayihuxxi minaadaphphi Shaashshiqqi Ugud hincaa hee'ukko.

⁵Lobakat minaadab ixxi beyyo waarukkuuyyi moo'u ammanenne Filiphphoosina Yesuus «Ku manni itona qorosho'o hanniinsi bito aa'nnoommo?» yukko.

⁶Yesuus eehid yukkok Filiphphoosa keeneenatte bagaan issoo luwwa ixxi gagim la'am hee'ukko.

⁷Filiphphoos ixxena dabaraa «Annannichchinam gootto'o gootto'o afisimminam lam xibbi diinaa'l[7] qorosho'im ihooyyo» yukko.

⁸Ixxi losaaniinsi mat hee'u Indiraas ixxim Pheexiroosa yakkam Simi'oonina abbaayyi Yesuusina

⁹«Onti xeffo'i so'i qorosho'oo lam qurxumme'ee amadaakkoo mat beet keyye yookko. Ihukkaarem ka manni hundinam kuqaxichchi hinkid iheena xanookko?» yukko.

¹⁰Yesuus dabaraa «Manna afuussehe» yukkaare afuussito'o. Ee beyyonne manni afuuroo'isina lobakat hix hee'ukko. Ee mannikim goo'nnek xig onti kuma ihooqax hee'ukko.

¹¹Manni afuuraa lasage Yesuus ee qorosho'o aa'aa Waa'a galaxxaa ee afuuru mannina baxxansukko. Ee'isam qurxumme'em ixxuwwi hassoqaxa baxxansukko.

¹²Ixxuwwi itta'a goddita'a lasage ixxi losaanina «Beyyonne gatu giggiriinsi mahim gatoobee'isa ki'issehe» yukko.

¹³Ee bikkina ixxuwwi ee ontem xeffo'i qorosho'iinsim itakka'a gatu giggira wixxaa'lla'a tommonnee lam sanfonnee wonshita'a ki'isso'o.

¹⁴Oo manni ixxi issu mare'e moo'lla'a «Kuk hanqinam ‹Ka uulla waarookko› yakko'i hiraagaancho!» yito'o.

¹⁵Mannim waatta'a ixxo amadda'a malaayyinne adil issiteena hasso'isa Yesuus la'aa annanni ihaa mullam odim duunanne firukko.

¹⁶Uulli hiimukkaare ixxi losaan dambalaqa dillita'a

¹⁷wongirannem aagga'a dambalaq eeqidonne yoo Qifirinnaahooma matto'o. Oo ammanim tuunsi hee'ukko. Ee ammane Yesuus ixxuwwi beyyo waaroo'nnim hee'ukko.

¹⁸Mattonam malaayyaam hafachchi ki'u bikkina dambalaqanne womoor ki'ukko.

¹⁹Ixxuwwi onto te'im loh kiilomeetira[8] ihooqaxa matto'isam dambalaq hanenne Yesuus taakke'ukkuuyyi wongi'l kollonne hincukkuuyyi moo'lla'a baddito'o.

²⁰Ihukkaarem Yesuus ixxuwwina «Anette; badditakkotte!» yukko.

²¹Ee lasage ixxo liiranchinne aa'lla'a wongiranne aagisso'isam mattam hee'llo'i uulla affo'o.

²²La'm balla dambalaq eeqidonne gatta'a hee'llo'i minaadab eekke'e uullaa hee'ukkok mexxo'i wongir ihukkisaa Yesuus ee wongiranne aagoo'nnim ixxi losaan mullam utta'a matto'isaa laqqo'o.

²³Ee ammanem Moollanni Yesuus Waa'a galaxxaa lasage qorosho'o itto'i beyyina gadano Xibiriyaadoosiinsi wongilluwwi waarukko.

²⁴Manni Yesuusii ixxi losaanii ee beyyonne bee'llo'isa moo'llo'i ammanenne ixxuwwim wongilluwwanne aagga'a Yesuusa hassu'uuyyi Qifirinnaahooma matto'o.

²⁵Ixxuwwim dambalaq eeqidonne Yesuusa siidda'a lasage ixxena «Losisaancho! Ka beyyo hinki ammane waattitto?» yito'o.

²⁶Yesuusim ixxuwwina dabaraa «Hanqinam an ki'nnuwwina kuroommo; eese hassakkamuullak qorosho'o godditakka'a ittakko'i bikkinatte bagaan mare'e moo'llakko'i bikkinayyo.

²⁷Bi'oo hurbaatina baxxakkotte; ihukkaarem Manchi Beet uwwoo heer heerina hee'oo hurbaatina baxxehe. Mashka'oomim anni Waa'i ixxonne koobo'o koobaakko» yukko.

²⁸Ixxuwwim ixxena «Waa'ika baxo banxeena neese maha issino?» yito'o.

²⁹Yesuus ixxuwwina dabaraa «Waa'i ki'nnuwwi issitakkona hasoo bax ixxi asse'ukkaannonne amma'nnitakkonatte» yukko.

³⁰Ee bikkina ixxuwwi odim «Eehaare neese moo'nnaa keesenne amma'nninoommisina maalalsiisoo mare'e maha issitootto? Madu baxxootto?

³¹ Keesammi Kitaabanne ‹Ittamisina iimaniinsi hurbaata uwwukko› yamamaa kitaabamukkisanne niyyanno'i udma'anne maanna'a itto'o» yito'o.

³²Odim Yesuus ixxuwwina «Hanqinam an ki'nnuwwina kuroommo; ki'nnuwwina iimaniinsi hurbaata uwwukkok Muse'eyyo. Iimaniinsi hanqo'i hurbaata uwwookkok Iyyanna.

³³Mashka'oomim Waa'i uwwu hurbaat mannina heechcha uwwookkok iimaniinsi dillukkane» yukko.

³⁴Ixxuwwim ixxena «Moollanna! Ee hurbaata niina hundi ammanem uwwe» yito'o.

³⁵Yesuus ixxuwwina «An heechcha uwwoommi hurbaata. I beyyo waarookkokim sibaarooyyo. Eesenne amma'nnookkokim hore'em xeebe'ooyyo.

³⁶Ihukkaarem ki'nnuwwi eese moo'llakko'aarem amma'nnitakkobee'isa kuraammo.

³⁷Iyyanni iina uwwukkok hundim i beyyo waarookko. Ee i beyyo waarookkokam an biiranne holloommoyyo.

³⁸Mashka'oomim an iimaniinsi dillummok eese asse'ukkaanni doo'lla isseenatte bagaan i doo'lla isseenayyo.

³⁹Eese asse'ukkaannik doo'l iina uwwu keeniinsi matichchim bi'oo'n lasaanchi ayyaamonne hundam lehiinsi ki'isoommisinatte.

⁴⁰Iyyanni hasookkok Beeto moo'aa ixxonne amma'nnookkok hundim heer heerina hee'oo heechcha siixxoo'isinatte. Anim ixxo lasaanchi ayyaamonne lehiinsi ki'isoommo» yukko.

⁴¹Yesuus ixxuwwina «Iimaniinsi dillu hurbaat anette» yu bikkina wixxito'i Ayihuxxi minaadab ixxonne quunquunto'o.

⁴²Ixxuwwim «Ku Yesuus Yooseef beetoyyonnihe? Ixxeka annaa amaa neese lanqoommaneyyonnihe? Ixxi kaba hinkid ‹Iimaniinsi dillaammo› yoolla?» yito'o.

⁴³Yesuus ixxuwwina dabaraa «Ki'nnuwwina'i ki'nnuwwim quunquuntakkotte.

⁴⁴Eese asse'u Iyyanni i beyyo worubeelas ayyim i beyyo waareena xanooyyo. Ixxom lasaanchi ayyaamonne lehiinsi ki'isoommo.

⁴⁵ Hiraagaan ‹Hundim Waa'iinsi lossam keen ikkamo› yita'a kitaabbo'ookko. Iyyanniinsi macceesukkokii losukkokii hundim i beyyo waarookko.

⁴⁶An eehid yoommok manni Waa'a moo'aakko yimminayyo. Waa'i beyyiinsi waarukkaanniinsi bagaan Waa'a moo'ukkok matim bee'e.

⁴⁷Hanqinam an ki'nnuwwina kuroommo; eesenne amma'nnoohaannina ayyenam heer heerina hee'oo heechchi yookko.

⁴⁸An heechcha uwwoommi hurbaata.

⁴⁹Ki'nnuwwi anno'i maanna'a udma'anne itto'aarem leto'o.

⁵⁰Manni ixxeensi itaa lehoobee'isina kaba iimaniinsi dillu hurbaat kane.

⁵¹Iimaniinsi dillu heechcha uwwoo hurbaat anette. Ayyim ka hurbaatiinsi itulas heer heerinam hee'ookko. Ka uulli minaadabina heechcha uwwoo'isina an uwwoommi hurbaat i maara» yukko.

⁵²Ee lasage Ayihuxxi minaadab ixxuwwina'i ixxuwwim «Ku manchi neese intoommisina ixxeka maara hinkid issaa uwweena xanookko?» yita'a fitanto'o.

⁵³Ee bikkina Yesuus ixxuwwina «Hanqinam an ki'nnuwwina kuroommo; Manchi Beetika maara ittakkobeelas ixxeka xiigam aggakkobeelas ki'nnuwwina heechchi bee'e.

⁵⁴I maara itoohaannina i xiigam agoohaannina heer heerina hee'oo heechchi yookko. Ixxo an lasaanchi ayyaamonne lehiinsi ki'isoommo.

⁵⁵Iikki maar hanqo'i hurbaata. I xiigim hanqo'i agga.

⁵⁶I maara itookkok odim i xiigam agookkok iinninne hee'ookko. Anim ixxenne hee'oommo.

⁵⁷Hee'oo Iyyanni eese asse'u bikkinaa iyyanni hee'oo'isam anim hee'oommi bikkinaa an hee'oommisam i maara itookkokim hee'ookko.

⁵⁸Iimaniinsi dillu hurbaat kane; ki'nnuwwi anno'i maanna'a itto'aarem leto'o. Ihukkaarem ka hurbaata itookkok heer heerinam hee'ookko» yukko.

⁵⁹Yesuus kaka kurukkok Qifirinnaahoomanne Ayihuxxi manni wixxixxi minenne losisukkuuyyette hee'ukko.

⁶⁰Ixxi losaa'nnek lobakat keen ee Yesuus wocu woshsha macceesso'i ammanenne «Kuk kee'mmaalli woshsha; kaka ayyi aa'eena xanookko?» yito'o.

⁶¹Ihukkaarem Yesuus losaan ee woshshanne quunquunto'isa la'aa «Ka woshshanne ki'nnuwwi qolantakkamuullannihe?

⁶²Manchi Beet eraare hee'u beyyo daba'llaa firukkuuyyi moo'llakkota'n maha ikkakkamo?

⁶³Heechcha uwwookkok Keesammi Ayyaana bagaan maar maham awwaadooyyo. An ki'nnuwwina wocummi sagar heechchaa ayyaanaa» yukko.

⁶⁴Ihukkaarem Yesuus ixxonne amma'nnitambee'i keenoo ixxom higisaa uwwookkok ayyetda'e ihukkisaa luxxaanniinsim ki'isaa la'am hee'u bikkina «Ki'nnuwwiinsi mat mat amma'nnitakkambee'i keen yoontakke'e» yukko.

⁶⁵Odim Yesuus «I beyyo waaroo'isa Iyyanni issubee'ek ayyim waareena xanooyyo yummok eehanninatteme» yukko.

⁶⁶Ee mashka'inne lobakat ixxi losaan ixxo awwonimma utta'a laso daba'llito'o. Ee lasage ixxenne maqire od matto'oyyo.

⁶⁷Yesuus tomminaa lamem losaaninam «Ki'nnuwwim uttakka'a mattakkeena hassakkamonnihe?» yukko.

⁶⁸ Pheexiroosa yakkam Simi'oonim ixxena dabaraa «Moollanna! Neese ayyi beyyo malloommo? Ki sagar heer heerina hee'oo heechcha uwwoohane.

⁶⁹At keesantaattoo Waa'i Beet ikkittisa neese amma'nninaammoo lanqaammoo» yukko.

⁷⁰Yesuusim ixxuwwina dabaraa «An ki'nnuwwa tommoo lamoo doo'llummoyyonnihe? Ki'nnuwwiinsi matom Sheexaancho» yukko.

⁷¹Yesuus eekka wocukkok ixxo higisaa uwwoo Asqorotokkichchi hee'u Simi'oon beet Yihud bikkinatte. Oo Yihud tommiinsii lam losaaniinsii mat hee'ukko.