Read Hadiyya Yohaannis Mishiraachcha 7 Bible Online

Yohaannis Mishiraachcha 7 - Hadiyya bible

Yohaannis Mishiraachcha 7

¹Ee lasage Yesuus Galiilanne daba'llamam hee'ukko. Mashka'oomim Ayihuxxi manni gassaan ixxo shiteena hasso'i bikkina Yihuxxi uullanne daba'llameena hasukkoyyi hee'ukko.

² Ee ammane Ayihuxxi manni daasanne ikka'a lonsitam ugud hincaa hee'ukko.

³Ee bikkina Yesuusik abbaayyuwwi ixxena «At baxxoo baxo ki losaan moo'llamisina ka beyyo uttaa Yihuxxi uulla mare.

⁴Mashka'oomim mannina la'ameena hasoo ayyim maaxaqqanne baxooyyo. At kido'i baxo baxxoolli ihu bikkina ki gaga ka manni hundinam la'ise» yito'o.

⁵Ixxi abbaayyuwwim ixxonne amma'nnito'oyyi hee'llo'o.

⁶Yesuus ixxuwwina «Iina amman afukkoyyome; ihukkaarem ki'nnuwwina hundi ammanim danaamo.

⁷Ka uulli minaadab ki'nnuwwa sabbeena xantamoyyo. Ihukkaarem an ixxuwwik bax jor ihukkisa kuroommi bikkina eese sabbamo.

⁸Ugudina ki'nnuwwi mallehe; iina amman afubee'i bikkina ee ugudina maroommoyyo» yukko.

⁹Eekka ixxuwwina kuraa Galiilanne gatukko.

¹⁰Ihukkaarem ugudina ixxi abbaayyuwwi matta'a lasage Yesuusim manni la'oobee'isa maaxamaa ee beyyo marukko.

¹¹Ayihuxxi manni ixxo uguxxi beyyonne «Hanno afukko?» yitu'uuyyi hassam hee'llo'o.

¹²Odim minaadabiinsi kolli «Ixxi er mancho» yitu'uuyyi, kolli odim «Ee'isayyo; manna huushansoolla» yitu'uuyyi ixxi bikkina lobakata hashaashshantam hee'llo'o.

¹³Ayihuxxi awwonsaano baddu bikkina ayyim ixxi bikkina fissaa wocukkoyyo.

¹⁴Ugud beeddeena kolli ihaakkoohaannonne Yesuus maraa Keesammi Minenne losisam hee'ukko.

¹⁵Ayihuxxi mannim «Ku manchi lobakata losoo'n yoo manchi ihaa hinkid kaa'nna la'eena xanukko?» yita'a maalalto'o.

¹⁶Ee bikkina Yesuus ixxuwwina dabaraa «An losisoommi losan i gaqqan ihoo'n eese asse'ukkaannane.

¹⁷Waa'i yu luwwa isseena hasoo manchi ku losan Waa'iinsette ihukkisa te'im an i malaayyinne wocoomman ihukkisa la'ookko.

¹⁸Ixxi gaqqi malaayyinne wocookkok ixxi gaqqi lomba hasookko. Ihukkaarem asse'ukkaanni lomba hosookkok ixxi hanqo'ane bagaan qophphanaanchoyyo.

¹⁹Muse'e ki'nnuwwina Seera uwwukkoyyonnihe? Ihukkaarem ki'nnuwwiinsi matim ee Seera egettakko'oyyo. Eese mahina shitakkeena hassakkamuulla?» yukko.

²⁰Minaadab ixxena dabatta'a «Keese habus amadaakko! Keese sheena hasukkok ayyette?» yito'o.

²¹Yesuus ixxuwwina dabaraa «An mat luwwa baxummaare eehannonne ki'nnuwwi hundim maalaltakko'o.

²² Muse'e ki'nnuwwina goo'n ooso ballachchitakkamisina ijaajaa hee'ukko. Oo ballachchanchi losan waarukkok Muse'eensette ihoo'n ki'nnuwwi anno'iinsetteme. Ki'nnuwwi Usheexxaxxi Ayyaamonne mancho ballachchitakkamo.

²³ Ee Usheexxaxxi Ayyaamonne ballachchitakkam ammane Muse'i Seer gindamubee'aa'lleensi an Usheexxaxxi Ayyaamonne mat manchika orachchi hundoomam fayyiisummaare mahina eesenne quuqqakkamuulla?

²⁴Hanqo'i oogato'o oogattehe bagaan ki'nnuwwina labukkisa oogattakkotte» yukko.

²⁵Ee bikkina mat mat Yerusaalee'm manni «Gassaan shiteena hassam manchi kaneyyonnihe?

²⁶Moo'llehe; maaxamoo'nnim manni illagenne wocoolla; ixxuwwi maham wocco'oyyo. Ayyi la'ukko ixxi Kiristoosatte ihukkisa gassaan hanqinam laqqa'atennihe?

²⁷Kiristoos waaroo ammane ixxi hanniinsi waaruda'e ayyim la'ooyyo. Ihukkaarem ku manchi hanniinsi waaruda'e neese lanqoommo» yito'o.

²⁸Ee bikkina Keesammi Minenne Yesuus losisukkuuyyi «Ki'nnuwwi eesee an waarummi beyyoo laqqakkamo? An i gaginne waarummoyyo. Eese asse'ukkok amma'nnamaakkoohane; ixxom ki'nnuwwi laqqakkamoyyo.

²⁹An ixxi beyyiinsi waarummi bikkina ixxo la'oommo. Eese asse'ukkokim ixxotte» yaa sagara iimaa'aa wocukko.

³⁰Ee bikkina ixxo amaddeena hasso'o. Ihukkaarem ixxena amman afubee'i bikkina ayyim ixxo amadukkoyyo.

³¹Ihona bagaan ee minaadabiinsi lobakat keen ixxonne amma'nnito'o. Ixxuwwim «Kiristoos waaroo ammane ku manchi baxu mare'iinsi lonsaa baxoohonnihe?» yito'o.

³²Minaadab eehid yita'a ixxi bikkina hashaashshantu'uuyyi Farisaawe'uwwi macceessa'a Yesuusa amaddamisina qeessa awwonsaanii Farisaawe'uwwii gaadaano asse'llo'o.

³³Ee ammane Yesuus «An hofqax ammanem ki'nnuwwinne afuuraa lasage eese asse'ukkaanni beyyo maroommo.

³⁴Ki'nnuwwi eese hassakkamo; ihukkaarem siiddakkamoyyo. An yoommi beyyo ki'nnuwwi waattakkeena xantakkamoyyo» yukko.

³⁵Ayihuxxi manni ixxuwwina'i ixxuwwim «Ku manchi neese siindoombee'i beyyo hanno mareena hasaate? Ayyi la'ukko Giriik uullanne binnito'i Ayihuxxi manni beyyo maraa Giriik uulli manna losiseenattennihe?

³⁶‹Eese hassakkamo; ihukkaarem siiddakkamoyyo. An yoommi beyyom waattakkeena xantakkamoyyo› yaa wocukkok mayyeena hasaate?» yito'o.

³⁷ Ugud beeddeena lasaanchi lob ayyaamonne Yesuus uullaa «Xeebe'ukkok ayyim yoolas i beyyo waaraa agona!

³⁸ Keesammi Kitaab yoo'isam eesenne amma'nnoohaanni wodaniinsi heechcha uwwoo wo'i daadookko!» yaa sagara iimaa'aa wocukko.

³⁹Ixxi eekka wocookkok ixxonne amma'nnito'i keen aa'lleena yoo Keesammi Ayyaa'n bikkinatte hee'ukko. Mashka'oomim ixxi lomba siixxoo'n hee'u bikkina ixxuwwanne Keesammi Ayyaan dilloo'nnim hee'ukko.

⁴⁰Ixxuwwi eekka macceesso'i ammanenne mat mat keen «Hanqinam kuk hiraagaancho» yito'o.

⁴¹Mulli keenim «Kuk Waa'i doo'llaakkoo Kiristoosatte» yito'o. Ihukkaarem mulli keen «Kiristoos Galiiliinsi waaroohonnihe?

⁴² Kiristoos waarookkok Daawiit shumo'iinsi Daawiit hee'u Beeteelihee'm beero'iinsette ihukkisa Keesammi Kitaab kuraakkoollayyonnihe?» yito'o.

⁴³Ee bikkina ixxi mashka'inne manni lambe'enne annannaatoom ihukko.

⁴⁴Mat mat keen ixxo amaddeena hasso'o. Ihukkaarem ixxo ayyim amadukkoyyo.

⁴⁵Ee lasage gaadaan qeessa awwonsaa'n beyyoo Farisaawe'uwwi beyyoo daba'llita'a matto'aare «Mahina ixxo amaddakka'a eebbakko'oyyo?» yito'o.

⁴⁶Gaadaanim ixxuwwina dabatta'a «Ka manchisa wocookkok ayyim bee'e» yito'o.

⁴⁷Farisaawe'uwwi ixxuwwina dabatta'a «Ki'nnuwwam huushisukkonnihe?

⁴⁸Gassaaniinsi te'im Farisaawe'uwwiinsi ixxonne amma'nnukkok yoohonnihe?

⁴⁹Seera la'oobee'i ku minaadab duumamaakkoohane» yito'o.

⁵⁰ Ixxuwwiinsi mat hee'ukkok gaassaatim Yesuus beyyo maraa hee'u Niqoodimoos

⁵¹ixxuwwina «Ni seer mat manchi issu luwwa macceessakkoo'nnii laqqakkoo'nnii oogattehe yoohonnihe?» yukko.

⁵²Ixxuwwim ixxena dabatta'a «Atim Galii'l uulli manchonnihe? Galiiliinsi hiraagaanchi ki'oobee'isa Keesammi Kitaaba saarayyitaa moo'e» yito'o.

⁵³Ee lasage hundim ixxuwwi mine elle'llo'o[9].