Read Hadiyya Yohaannis Mishiraachcha 8 Bible Online

Yohaannis Mishiraachcha 8 - Hadiyya bible

Yohaannis Mishiraachcha 8

¹Ihukkaarem Yesuus Wee'l duunanne firukko.

²Yesuus la'm balla soodaraar daram Keesammi Mine daba'llaa marukko. Manni hundim ixxi beyyo waarukkaare ixxi afuuraa losisukko.

³Saa'llu'uuyyi amadanto'oo mat meentichcho seera losisaanii Farisaawe'uwwii wotta'a ixxuwwi lambe'enne uullissa'a

⁴Yesuusina «Losisaancho! Tu meentichcho saa'llu'uuyyi amadanto'ookkotane.

⁵ Ni Seeranne Muse'e kido'i meento kininne aphphinsaa shinoommisina ijaajaakko. Kaba at mayyitootto?» yito'o.

⁶Ixxuwwi eekka yito'ok ixxo kasassam googo siidda'a woshshinne digaaddeena hassa'atette hee'ukko. Ihukkaarem ixxi qubbaa maxxaarinne uullanne kitaabam hee'ukko.

⁷Ixxo dabaransita'a xa'mmito'i ammanenne uullaa ixxuwwina «Ki'nnuwwi lambe'iinsi baaxiil bee'ek gaassaa kina huushaa ise aphphisona» yukko.

⁸Eehid yaa odim qubbaa maxxaarinne uullanne kitaabukko.

⁹Ixxuwwi eekka macceesso'i ammanenne lommanniinsi ki'issa'a mat mat ikku'uuyyi utta'a matto'o. Yesuus ixxi illagenne uullita'a hee'llo'i meentichchonne maqirem mullam gatukko.

¹⁰Yesuus ee meentichcho xabbaa moo'aa isena «Taa meentichche, kabaxxi manni hanno affo'o? Ayyim keesenne oogatukkoyyonnihe?» yukko.

¹¹Isem «Moollanna! Matim eesenne oogatukkoyyo» yito'o. Yesuusim «Anim keesenne oogatoommoyyo, mare! Od baaxiilo baxxitte» yukko.

¹² Odim Yesuus «An ka uullina caakka. Eese awwonookkok ayyim heechcha uwwoo caakka siixxookko bagaan tuunsonne hee'ooyyo» yukko.

¹³ Ee bikkina Farisaawe'uwwi «At ki gagina ku'llitoolli ihu bikkina woccoo woshshi hanqayyo» yito'o.

¹⁴Yesuus dabaraa «An i gagina ku'llummaare waarummi beyyoo maroommi beyyoo la'oommi bikkina an kuroommok hanqa. Ihukkaarem ki'nnuwwi an hanniinsi waarumda'e te'im hanno maroomda'e laqqakkamoyyo.

¹⁵Ki'nnuwwi oogattakkamok manni sawwixxisa. Ihukkaarem an ayyennem oogatoommoyyo.

¹⁶Ihona bagaan an oogatummaarem oogatoommok mullatte ihoo'n eese asse'u Iyyanninne maqirette ihu bikkina an oogatoommi oogato'i hanqo'ane.

¹⁷ Ki'nnuwwi seeranne lam manchi naqqassolas oo naqqasso'i woshshi hanqi ihukkisa kitaabamaakko.

¹⁸An i gaqqi bikkina kuroommo; eese asse'u Iyyannim i bikkina kurookko» yukko.

¹⁹Ee bikkina ixxuwwi ixxena «Kiyyanni hannonnette?» yito'o. Yesuus dabaraa «Ki'nnuwwi eesem Iyyannam laqqakkamoyyo. Eese laqqakko'oohan ihuta'n Iyyannam laqqakkam hee'llakko'o» yukko.

²⁰Yesuus kaka wocukkok Keesammi Minenne losisukkuuyyi Waa'ina diinate uwwakkam mu'uxxi gadanonnette hee'ukko. Ihukkaarem ixxena amman afubee'i bikkina ayyim ixxo amadukkoyyo.

²¹Odim Yesuus Ayihuxxi mannina «An uraa maroommaare ki'nnuwwi eese hassakkamo; ihukkaarem ki'nnuwwi baaxiilinnem letakkamo. An maroommi beyyo mattakkeena xantakkamoyyo» yukko.

²²Ee bikkina Ayihuxxi manni «Ku ixxi ‹An maroommi beyyo mattakkeena xantakkamoyyo› yukkok ixxi gaga sheena hasaatennihe?» yito'o.

²³Yesuus ixxuwwina «Ki'nnuwwi ka uulliinsette. Ihukkaarem an iimaniinsette. Ki'nnuwwi ka uulliinsette. Ihukkaarem an ka uulliinseyyo.

²⁴An ki'nnuwwina ki'nnuwwi baaxiilinnem letakkamo yoommok ee bikkinatte. An anette ihummisa amma'nnitakkobeelas baaxiilinnem letakkamo» yukko.

²⁵Ixxuwwi ixxena «At ayyette?» yito'o. Yesuus ixxuwwina «An luxxaanniinsim ki'isaa ki'nnuwwina kuraammo.

²⁶An ki'nnuwwi bikkina wocoommokii oogatoommi luwwii lobakat luwwi yookko. Ihukkaarem eese asse'ukkok hanqo'an ihu bikkina ixxeensi macceesummi luwwa ka uulli minaadabina kuroommo» yukko.

²⁷Yesuus wocukkok Waa'i bikkinatte ihukkisa ixxuwwi qoossito'oyyi hee'ukko.

²⁸Ee bikkina Yesuus «An anette ihummisaa Iyyanni losisukkisaa wocoommo bagaan i malaayyinne maham issoombee'isa Manchi Beeto saqaltakkam ammane laqqakkamo.

²⁹Eese asse'ukkok iinninne maqirem yookko. An hundem ammanem ixxo liiransoo luwwa issoommi bikkina eese mulla urooyyo» yukko.

³⁰Ixxi eekka wocukkisam lobakat keen ixxonne amma'nnito'o.

³¹Yesuus ixxonne amma'nnita'a hee'llo'i Ayihuxxi mannina «An yummisa hee'llakkolas ki'nnuwwi hanqo'i i losaano.

³²Ki'nnuwwi hanqa laqqakkamo. Hanqim ki'nnuwwa wolabbanonne fissookko» yukko.

³³ Ixxuwwi dabatta'a «Neese Abrihaam shumo'o! Ayyenam agiddano galloommoyyo. At neese hinkid ‹Wolabbanonne fittakkamo› yitoolla?» yito'o.

³⁴Yesuus ixxuwwina dabaraa «Hanqinam an ki'nnuwwina kuroommo; ayyim baaxiilo baxookkok baaxiilina agishsho.

³⁵Ihu ammanem agishshi gaqqi qachchisa ihaa minenne hee'ooyyo. Ihukkaarem Beet heer heerinam gaqqi qachchi ihaa minenne hee'ookko.

³⁶Ee bikkina Beet ki'nnuwwa wolabbanonne fissulas hanqinam wolabbanonne fittakkamo.

³⁷Ki'nnuwwi Abrihaam shumo'i ikkakko'isa la'oommo. Ihukkaarem an wocoommi woshsha aa'llakkobee'i bikkina eese shitakkeena hassakkamuulla.

³⁸An wocoommok iina Iyyanni moo'isu luwwa. Ihukkaarem ki'nnuwwi issitakkamok ki'nnuwwi anniinsi macceessakko'i luwwa» yukko.

³⁹Ixxuwwim dabatta'a «Niina anni Abrihaamatte» yito'o. Yesuus ixxuwwina «Ki'nnuwwi Abrihaam oos ikkakkota'n Abrihaam issu luwwa issitakkam hee'llakko'o.

⁴⁰Ihukkaarem kaba ki'nnuwwi Waa'iinsi macceesummi hanqa kurummi eese shitakkeena hassakkamuulla. Abrihaam ee'isa issukkoyyo.

⁴¹Ki'nnuwwi issitakkamok ki'nnuwwi anni issu luwwa» yukko. Ixxuwwi ixxena «Neese hincarabe'uwwayyo. Niina anni mexxo'i Waa'a» yito'o.

⁴²Yesuus ixxuwwina «Waa'i ki'nnuwwina anni ihuta'n Anni Waa'i beyyiinsi waarummi bikkina eese iittitakkam hee'llakko'o. An waarummok ixxi asse'ukkaarette bagaan i tii'llisayyo.

⁴³An wocoommoka qoossitakkambee'ek mahinatte? An wocoommoka qoossitakkambee'ek i woshsha macceessakkeena hassakkambee'i bikkinatte.

⁴⁴Ki'nnuwwik anni Sheexaancho; ki'nnuwwi issitakkeena hassakkamokim ki'nnuwwi anni mixano. Ixxi gaassiinsim ki'isaa foore shoohane. Ixxonne hanqibee'i bikkina hanqanne uullooyyo. Ixxi qophphanaanchoo qophphaninam annaa ihu bikkina ixxena qophphano wocimmi aalo'ome.

⁴⁵Ihukkaarem an hanqa wocoommi bikkina ki'nnuwwi eese amma'nnitakkamoyyo.

⁴⁶Ki'nnuwwiinsi eese ‹baaxiilaancho› yaa acceeqasookkok ayyette? An ki'nnuwwina hanqa kuroommuulli ihulas eese mahina amma'nnitakkamoyyo?

⁴⁷Waa'iinsette ihukkok Waa'i sagara macceesookko. Waa'i sagara ki'nnuwwi macceessakkambee'i mashka'i Waa'iinsette ikkakkobee'i bikkinatte» yukko.

⁴⁸Ayihuxxi manni ixxena dabatta'a «Neese ‹At Samaarekkichcho; keese habus amadaakko› yinummok hanqayyonnihe?» yito'o.

⁴⁹Yesuusim ixxuwwina dabaraa «An Iyyanna lonsoommuulla bagaan eese habus amadukkoyyo. Ihukkaarem ki'nnuwwi eese sholliissakkamuulla.

⁵⁰An i gagina lomba hasoommoyyo. Ihukkaarem iina lomba hasookkokii oogatookkokii mat yookko.

⁵¹Hanqinam an ki'nnuwwina kuroommo; ayyim an yummi woshsha macceesaa ijaajamookkok ixxi hore'em lehooyyo!» yukko.

⁵²Ayihuxxi mannim ixxena «Keese habus amadukkisa kaba lanqummo. Abrihaam lehukko, hiraagaanim leto'o. Ihukkaarem at ‹An yummi woshsha macceesaa ijaajamookkok ayyim hore'em lehooyyo› yitoolla.

⁵³At lehu niyyanni Abrihaamiinsi lophphitoohonnihe? Hiraagaanim leto'o. Eehaara'i at ki gaga ayyette yitoolla?» yito'o.

⁵⁴Yesuus dabaraa «An i gaga lonsaqqumta'n i lombi maham awwaadooyyo. Eese lonsookkok ki'nnuwwi niina Waa'a yitakkam Iyyanna.

⁵⁵Ihukkaarem ki'nnuwwi ixxo laqqakko'oyyo. An ixxo la'oommo. ‹An ixxo la'oommoyyo› yumta'n anim ki'nnuwwisam qophphanaancho. Ihukkaarem an ixxo la'oommo; ixxi sagarinam ijaajamoommo.

⁵⁶Ki'nnuwwina anni Abrihaam an waaroommi balla moo'eena mixukko. Moo'aatim liiramukko» yukko.

⁵⁷Ee bikkina Ayihuxxi manni ixxena «At qarantittaanniinsi ontayyi hiinchom ihoo'n hinkid Abrihaama moo'lleena xantitto?» yito'o.

⁵⁸Yesuus ixxuwwina «Hanqinam an ki'nnuwwina kuroommo; an Abrihaamiinsim gaassaa hee'ummo» yukko.

⁵⁹Ee bikkina ixxo aphphisseena kina ki'isso'o. Ihona bagaan Yesuus maaxamaa Keesammi Miniinsi firaa marukko.