Read Hadiyya Yohaannis Mishiraachcha 9 Bible Online

Yohaannis Mishiraachcha 9 - Hadiyya bible

Yohaannis Mishiraachcha 9

¹Yesuus googinne higukkuuyyim qaramukkaanniinsim qooqaakkoo mat mancho moo'ukko.

²Ixxi losaan Yesuusina «Losisaancho! Ku manchi qooq ihaa qaramoo'isa issukkok ixxi baaxiilonnii ixxi amaa annii baxxo'i baaxiilo?» yita'a xa'mmito'o.

³Yesuusim dabaraa «Waa'ik malaayyi ixxonne la'amoo'isinatte bagaan ixxi te'im ixxi amaa annii baaxiilo baxxo'oyyo.

⁴Eese asse'ukkaanni baxo caakki hee'ukkuuyyi neese baximmi hasisookko. Ayyim baxeena xanoobee'i tuunsi waaroolla.

⁵ An ka uullanne hee'ummuuyyi ka uullina caakka» yukko.

⁶Eehid yaa uullanne anja tuhaa ee anjinne buchcha qufisaa har issaa ee hara ee manchi illenne labaa

⁷«Mattaa Saalooma yakkam leeraakkoo delbanne aanshaqqe» yukko. Saalooma yimmi «Asse'amaakkoohane» yimma. Ee bikkina oo manchi maraa aanshaqqaa lasage moo'ukkuuyyi waarukko.

⁸Ixxek olla'ii eraare uunxukkuuyyi moo'llo'i mannii «Ku manchi afuuraa uunxam hee'u manchoyyonnihe?» yito'o.

⁹Mat mat keen «Ixxotte» yito'o. Mulli keen odim «Ixxo laboo mancho bagaan ixxotteyyo» yito'o. Ixxim dabaraa «Oo yitakkam manchi anetteme» yukko.

¹⁰Ixxuwwi ixxena «Eehaare ki illi hinkid ihaa fooqukko?» yito'o.

¹¹Ixxim «Yesuusa yakkam manchi buchcha qufisaa har issaa ee hara i illenne labaa ‹Mattaa Saaloo'm Delbanne aanshaqqe› yukkaare maraa aanshaqqummaare i illi fooqukko» yukko.

¹²Ixxuwwim ixxena «Ixxi hannonnette?» yito'o. Ixxim «An la'oommoyyo» yukko.

¹³Ixxuwwim ee qooq hee'u mancho Farisaawe'uwwi beyyo massito'o.

¹⁴Yesuus ee qooq manchi illenne hara issaa fayyiisukkok Usheexxaxxi Ayyaamonnette hee'ukko.

¹⁵Farisaawe'uwwim ixxek illi hinkid ihaa moo'uda'e xa'mmito'o. Ixxim ixxuwwina «Ixxi i illenne hara issaa lasage an aanshaqqummaare i illi moo'ukko» yukko.

¹⁶Mat mat Farisaawe'uwwi «Ku manchi Usheexxaxxi Ayyaamo egeroobee'ek Waa'iinsi waaroo'n yoohane» yito'o. Ihukkaarem mulli keen «Baaxiilaanchi manchi kido'i maalalsiisoo mare'e hinkid isseena xanookko?» yito'o. Ixxuwwi lambe'ennem annannoom ihukko.

¹⁷Odim ixxuwwi ee qooq hee'u manchina «Ki ille fooqaa'u manchi bikkina at mayyitoolla?» yito'o. Ixxim dabaraa «Hiraagaancho» yukko.

¹⁸Ayihuxxi manni gassaan ee manchika amaa annaa weeshsheebe'i afeebe'e oo manchi qooq hee'ukkisaa illi fooqukkaare moo'ukkisaa amma'nnito'oyyi hee'llo'o.

¹⁹Ixxuwwim ee qooq hee'u manchika amaa annaa «Qooq qaramaakko yitakkam ki'nnuwwik beet kanennihe? Ixxi kaba hinkid moo'eena xanukko?» yita'a xa'mmito'o.

²⁰Ixxi amaa annii dabatta'a «Kuk ni beet ihukkisaa qooq ihaa qaramukkisaa neese lanqoommo.

²¹Ihukkaarem kaba ixxi hinkid moo'eena xanuda'e te'im ixxi ille ayyi fooqaa'uda'e lanqoommoyyo. Ciilichchi ihubee'i bikkina ixxi gaqqi bikkina ku'lleena xanookko; ixxom xa'mmehe» yito'o.

²²Ixxuwwi eehid yito'ok Yesuus Kiristoosatte ihukkisa wocookkok ayyim wixxixxi miniinsi yaayyamoo'isina Ayihuxxi manni gassaan iittanta'a hee'llo'i bikkina baddita'atette hee'ukko.

²³Ee bikkina ixxi amaa annii «Ciilichchi ihubee'i bikkina ixxom xa'mmehe» yito'o.

²⁴Ixxuwwi la'mmaaggem ee qooq hee'u mancho weeshsha'a «Waa'ina lomba uwwe. Ku keese fayyiisu manchi baaxiilaanchi ihukkisa neese lanqoommo» yito'o.

²⁵Ixxim dabaraa «Ixxi baaxiilaanchida'e te'im baaxiilaanchoyda'e an la'oommi luwwi mahim bee'e. An mat luwwa la'oommo; oohim an qooq hee'ummo. Ihukkaarem kaba moo'oommuulla» yukko.

²⁶Ixxuwwi ixxena «Ixxi keese hinkid issukko? Ki ille fooqaa'ukkok hinkid issaatette?» yito'o.

²⁷Ixxim dabaraa «Ki'nnuwwi macceessakkeena hassakko'oyyo bagaan an gaassaatim ki'nnuwwina kuraammo. Odim la'mmaagge macceessakkeena mahina hassakko'o? Ki'nnuwwim ixxi losaan ikkakkeena hassakka'atennihe?» yukko.

²⁸Ixxuwwim ixxena «At ixxi losaancho. Ihukkaarem neese Muse'i losaano.

²⁹Waa'i Muse'ena wocukkisam lanqoommo. Ihukkaarem ku manchi hanniinsi waaruda'e neese lanqoommoyyo» yita'a game'llito'o.

³⁰Oo manchim dabaraa «I ille fooqaa'ukkisa moo'llakku'uuyyim ixxi hanniinsetda'e ihukkisa ki'nnuwwi lachcha hoogimmi kuk maalalsiisoo woshsha.

³¹Waa'i ixxena otossoo kee'nnekaa ixxi yu luwwa issoo kee'nnekaa macceesookko bagaan baaxiilaa'nneka macceesoobee'isa lanqoommo.

³²Qooq ihaa qaramu manchika ille mat manchim fooqaa'ona uulli qooccamukkaanniinsi ki'isaa macceensummi balli bee'e.

³³Ku manchi Waa'iinsette ihubeeta'n maham isseena xanam hee'ukkoyyo» yukko.

³⁴Ixxuwwim ixxena dabatta'a «Keesenne baaxiil wo'mmaa qarantaattoottok at neese losisseenattennihe?» yita'a wixxixxi miniinsi fissito'o.

³⁵Ee mancho wixxixxi miniinsi fissito'isa Yesuus macceesaa lasage ixxenne edamaa «At Manchi Beetonne amma'nnitoohonnihe?» yukko.

³⁶Oo manchim dabaraa «Moollanna! An ixxonne amma'nnoommisina Manchi Beet ayyette?» yukko.

³⁷Yesuus ixxena «At ixxo moo'llaatto; ixxi kaba kiinninne wocoohane» yukko.

³⁸Ixxim «Moollanna! Eeyya amma'nnoommo» yaa ixxena otossukko.

³⁹Yesuusim «An ka uulla waarummok moo'llambee'i keen moo'llamisa; odim moo'llam keenim qooqqo'isa annanni issaa oogateenatte» yukko.

⁴⁰Farisaawe'uwwiinsi ixxi gadanonne hee'llo'i keen eekka macceessa'a «Neese qooqquwwannihe?» yito'o.

⁴¹Yesuus ixxuwwina «Ki'nnuwwi qooqquwwi ikkakkota'n ki'nnuwwina baaxiil iham hee'ukkoyyo. Ihukkaarem kaba ki'nnuwwi ‹Moo'nnoommuulla› yitakkam bikkina baaxiilaammuwwi ikkakko'isam hee'llakkamo» yukko.