Read Hadiyya Asse'amaa'n Baxo 1 Bible Online

Asse'amaa'n Baxo 1 - Hadiyya bible

Asse'amaa'n Baxo 1

¹ Iittantaattoo Teewoofiloosa, an luxxeka kitaabummi kitaabanne Yesuus Kiristoos luxxaanniinsi ki'isaa iimane massamoo balli afeebe'e issu luwwaa losisu luwwaa hundam kitaabaammo.

²Iimane marukkokim ixxi doo'llu asse'amaanina Keesammi Ayyaa'n kollinne ijaajo uwwaa lasage.

³Ixxim lehiinsi ki'aa lasage sor balla lobakat googinne lehiinsi ki'ukkisa ixxuwwina moo'isukko. Waa'i adilla'n bikkinam kurukko.

⁴ Odim Waa'i aagu neeyyata egerimmiinsi bagaan Yerusaaleemiinsi fittambee'isa ixxuwwinne maqire hee'u ammanem qoxxisaa kurukko.

⁵ Oohim «Yohaannis wo'inne xammaqaakko. Ihukkaarem hofqax ammaniinsi lasage ki'nnuwwanne Keesammi Ayyaan hee'oo'isa issimminne xammaqoommo» yaa ixxuwwina kuru luwwa.

⁶Awwonaan Yesuusinne maqire mat ikka'a wixxito'i ammanenne Yesuusina «Moollanna! Kaba Isra'ee'l adillano dabattaa uullissoohonnihe?» yita'a xa'mmito'o.

⁷Yesuusim ixxuwwina «Iyyanni Waa'i ixxi malaayyinne issu doollee ammanee laqqakkamisina ki'nnuwwina uwwamukkoyyo.

⁸ Ihukkaarem Keesammi Ayyaan ki'nnuwwanne dilloohaare malaayye aa'llakka'a Yerusaaleemanne, Yihuxxi uulli hundanne, Samaare'i uullannee uulli hundannemii i bikkina kuttakkam keen ikkakkamo» yukko.

⁹ Eekka wocukkisam ixxuwwi moo'llu'uuyyim iim ki'ukko. Duubim ixxuwwi illiinsi daphphaa'ukko.

¹⁰Yesuus iimane marukkaare awwonaan iim xuxxita'a moo'llonam qadaalli eddechcha edde'llo'oo lam manchi ixxuwwi gadanonne uullito'o.

¹¹Ixxuwwim awwonaanina «Galii'l uulli manna, iimane moo'llakku'uuyyi mahina uullitakka'ate? Ku ki'nnuwwiinsi iimane massamu Yesuus moo'llakku'uuyyi iimane marukkisam ee'isam daba'llaa waarookko» yito'o.

¹² Ee lasage asse'amaan Wee'l duuniinsi Yerusaalee'm beero'o daba'llito'o. Oo Wee'l duun Yerusaalee'm beero'iinsi honsi xibbi meetira ihooqax goog hee'ukko.[1]

¹³Ixxuwwim Yerusaalee'm beero'o aagga'a eraare usheexxitam beyyo oohim biddiqaa baxamaakkoo mi'n iimane fitto'o. Fitto'i keenim Pheexiroosatte, Yohaannisatte, Yaaqoobatte, Indiraasatte, Filiphphoosatte, Toomaasatte, Bartoloomoosatte, Maatiwoosatte, Ilfiyoos beet Yaaqoobatte, to'achchaanchi Simi'oonattee Yaaqoob beet Yihudattee hee'llo'o.

¹⁴Oo keen hundim mat ikka'a Yesuus ama Maaraame, Yesuus abbaayyuwwaa mulli meentoo edda'a Waa'a uunxatonne guruphphanto'o.

¹⁵Mat ayyaamo Pheexiroos mat xibbee lamiyyee ikkam amma'nnaan abbaayyuwwi lambe'enne uullaa

¹⁶«Iyyabbaayyuwwa, Keesammi Kitaabanne [2] Yesuusa amadiisu Yihud bikkina Daawiit kollinne ihaa Keesammi Ayyaan gaassaatim wocu woshshi wo'mmimmi hasisookko.

¹⁷Yihud niinninne maqirem doo'llamaa ka awwaadonnem ixxena qood hee'ukko.

¹⁸ Oo Yihud hantaarinne siidu diinatinne uulla bitaa'ukko. Eekke'em illillaachcha ubaa diqamukkaare godaphphi mu'ut daadukko.

¹⁹Ee woshsham Yerusaaleemanne hee'llam manni hundim laqqo'o. Ee bikkina oo uulli ixxuwwi suuminne Akeldaama yamamaa weeshamukko. Eehid yimmim ‹xiiqqi uulla› yimma. [3]

²⁰ Oohim Daawiit kitaabu kitaabanne ‹Ixxi hee'u beyyi udma'i ihona. Ee uullanne ayyim hee'oone› yamamukkane. Odim ‹Ixxi awwonsimmi baxom mulli manni aa'ona› yamamaa kitaabamukkane.

²¹ Ee bikkina Yohaannis xammaqam hee'u ammaniinsi ki'isaa Moollanni Yesuus iimane mareebe'i afeebe'e ni woronne daba'llamam hee'u amman hundam niinninne maqire hee'u mannik mat manchi Yesuus lehiinsi ki'ukkisa niinninne maqirem kurona» yukko.

²³Ee lasage Yoosxoosa te'im Baarsabaasa yakkam Yooseefaa Maatiyaasaa lam mancho amma'nnaan hincaa'llo'o.

²⁴Ixxuwwim «Manni hundikam wodano laqqoo Moollanna, Yihud ixxena laboo beyyo mareena uru beyyonne asse'amaanchi ihaa awwaadoo'isina ka lamem manchiinsim at doo'llittok ayyetda'e ihukkisa niina moo'ise» yita'a Waa'a uunxito'o.

²⁶Ee lasage laminam saamo issito'aare saam Maatiyaasina afukko. Maatiyaasim tomminnee mat asse'amaaninnee exxaa xigamukko.