Read Hadiyya Asse'amaa'n Baxo 11 Bible Online

Asse'amaa'n Baxo 11 - Hadiyya bible

Asse'amaa'n Baxo 11

¹Ee ammane Yihuxxi uullanne hee'llo'i Yesuus asse'u keenii mulli amma'nnaanii mulli minaadab Waa'i woshsha aa'llo'isa macceesso'o.

²Pheexiroos Yerusaaleema maru ammanenne Ayihuxxi manni amma'nnaa'nnek ballachchanchi seera egettam keen

³«Ballachchamubee'i manni beyyo mattaa ixxuwwinne maqire mahina hurbaata ittitto?» yita'a Pheexiroosinne fitanto'o.

⁴Ihukkaarem Pheexiroos ixxuwwina «An Iyyoophe'i beero'onne Waa'a uunxummuuyyi jallaa yoommaannonne soorem kasim amadamaakkoo mat weyyakki'nnoo'i geejji luwwi calcalaa iimaniinsi i beyyo dillukkuuyyi kaaltanne moo'ummo.

⁶Eekka hincaa moo'ummi ammanenne diinate, moochcha, biqinne maroo luwwaa iima'n cii'aa ee weyyakki'nnoo'i luwwanne moo'ummo.

⁷Odim mat sagar iina ‹Pheexiroosa, ki'llaa duttaa ite!› yukkuuyyi macceesummo.

⁸«Ihukkaarem an ‹Moollanna! Itakkambee'i luwwa te'im haashaassoo luwwa suumennem amadummi balbee'i bikkina itoommoyyo!› yummo.

⁹Odim oo sagar la'm korem iimaniinsi ‹Waa'i muccussu luwwa at haashaassititte!› yukko.

¹⁰Sas kore eehid ihaa lasage oo luwwi hundim iimane massamukko.

¹¹Ee ammanchom Qiisaariy beero'iinsi i beyyo asse'anto'oo sas manchi neese yoommine'i mine affo'o.

¹²Keesammi Ayyaanim malamoo'n ee manninne maqirem maroommisina iina kurukko. Ku lohem amma'nnaan abbaayyuwwim iinninne maqirem matto'o. Mallaa weeshisu manchi mine amfaa aangummaare

¹³oo weeshisu manchim Waa'i asse'amaanchi ixxi minenne uullaa ‹Iyyoophe'i beero'o manna asse'llaa Pheexiroosa yamamoo Simi'oona weeshise.

¹⁴Atii ki mi'n abaroosii hundim gattakkam asso kurookko› yukkuuyyi moo'ukkisa kurukko.

¹⁵«An woceena amadummisam Keesammi Ayyaan luxxeka neesenne dillukkisam ixxuwwannem dillukko.

¹⁶ Ee ammanenne Moollanni ‹Yohaannis wo'inne xammaqaakko; ihukkaarem ki'nnuwwi Keesammi Ayyaaninne xammaqantakkamo› yu woshsha an tiirummo.

¹⁷Eehaare neese Moollanni Yesuus Kiristoosanne amma'nninummi ammane Waa'i niina uwwu Keesammi Ayyaana ixxuwwinam uwwukkaa'lleensi Waa'i uwwoobee'isa hooreena an ayyette?» yaa ogorinne caakkisaa kurukko.

¹⁸Ixxuwwim eekka macceesso'i ammanenne fitancha utta'a «Mulli minaadabim baaxiilo biira yita'a heechcha siixxitamisa Waa'i issaakko» yita'a Waa'a galaxxito'o.

¹⁹ Isxifaanoosa shakko'i ammane afu hawwinne ki'ukkok binnito'i amma'nnaan mishiraachchi sagara xale'i Ayihuxxi minaadabina kuttu'uuyyi Fiinqe'e, Qoophphiroosaa Anxooke'i afeebe'ee matto'o.

²⁰Ihukkaarem ee kee'nnek Qaareena yakkam beero'i mannikii Qoophphiroosa yakkam uulli mannikii mat qax manni Anxooke'i beero'o matta'a mulli minaadabina Yesuus Kiristoosika mishiraachcha alallaatto'o.

²¹Waa'i malaayyim ixxuwwinne maqire hee'ukko. Lobakat mannim amma'nnita'a Moollanni kollonne daba'llito'o.

²²Ee woshsha Yerusaaleemanne yo'i amma'nnaan macceessa'a Baarnabaasa Anxooke'e asse'llo'o.

²³Baarnabaasim Anxooke'e maraa afaa Waa'i issu eroomma moo'aa liiramukko. Ixxim Keesammi Ayyaanii amma'nnatii wo'mmaakkoo er manchi hee'u bikkina amma'nnito'i keen hundim hanqo'i wodaninne Moollannanne amma'nnita'a qoxxita'a hee'llamisina sogukko. Lobakat mannim Moollannanne amma'nnita'a exxito'o.

²⁵Ee lasage Baarnabaas Saawula haseena Xarses beero'o marukko.

²⁶Ixxim Saawula siidu ammanenne Anxooke'e worukko. Eekke'em mat hiincho hundoomam amma'nnaaninne maqirem lamim afuutta'a lobakat manna losisso'o. Ee Anxooke'enne amma'nnaan luxxi amma'n «Kiristoosa awwonaano» yamanta'a weeshanto'o.

²⁷Ee ammane hiraagaan Yerusaaleemiinsi Anxooke'e dillito'o.

²⁸ Ee keeniinsim mat Agaaboosa yakkam mancho Keesammi Ayyaan wocisukkaare uulli hundannem malaayyaam sibaar ihoo'isa gaassaahim hiraagukko. Oo ixxi kuru woshshi Qalaawdiwoosa yakkam adi'l doollenne ihukko.

²⁹Ee bikkina amma'nnaan annannichchim xantoqaxa fissita'a Yihuxxi uullanne hee'llam amma'nnaanina hara'mmato asse'llamisina woshsha mutto'o.

³⁰Hara'mmatom amma'nnaa'n awwonsaa'n beyyo Baarnabaasannee Saawulannee asse'llo'o.