Read Hadiyya Asse'amaa'n Baxo 13 Bible Online

Asse'amaa'n Baxo 13 - Hadiyya bible

Asse'amaa'n Baxo 13

¹Ee ammane Anxooke'enne hee'llo'i amma'nnaa'n woronne hiraagaanii losisaanii hee'llo'o. Ixxuwwim Baarnabaasatte, Heemachcha yakkam Simi'oonatte, Qaaree'nnek Lusiyoosatte, Heeroodisa[12] yakkam gassaanchina dara'mmanchi hee'u Minaheenattee Saawulattee hee'llo'o.

²Ixxuwwi soommantu'uuyyii Waa'ina otossitu'uuyyii hee'llonam Keesammi Ayyaan «Baarnabaasaa Saawulaa an weeshummi baxo baxxamisina iina annanni issehe» yukko.

³Ixxuwwim soommanta'a lasage Baarnabaasaannonnee Saawulaannonnee hanenne ixxuwwi anga issita'a Waa'a uunxita'a geegeesso'o.

⁴Baarnabaasaa Saawulaa Keesammi Ayyaan asse'ukkaare Seleqe'e matta'a ee Seleqe'iinsim markabanne aagga'a Qoophphiroosa matto'o.

⁵Ixxuwwim matta'a Saalaamusa affo'i ammanenne Ayihuxxi manni wixxixxi minneewwanne wixxaa hee'u mannina Waa'i sagara kutto'o. Yohaannisa yakkam Maarqoosim ixxuwwina hara'mmam hee'ukko.

⁶Ixxuwwim wo'inne kibbamaakkoo uulla tochchiinsi tochchonne afeebe'e matta'a Phaafoosa yakkam beyyo affo'i ammanenne mat Baaryesuusa yakkam kiiraanchinne edanto'o. Oo Baaryesuus Ayihuxxi manchi hee'ukko. Ixxim «An hiraagaancho» yoo qophphanaanchi hee'ukko.

⁷Ixxi hee'am hee'ukkokim Sargiyoos Phaawuloosa yakkam qoor gassaanchinne maqirette hee'ukko. Sargiyoos Phaawuloosim Waa'i woshsha macceeseena hasaa Baarnabaasaa Saawulaa weeshisukko.

⁸Ihukkaarem Ilaamaasa yamamoo oo kiiraanchi Sargiyoos Phaawuloos amma'nnoobee'isa hooreena Baarnabaasinnee Saawulinnee uullixxamukko. Ilaamaasa yimmi kiiraancho yimma.

⁹Ihukkaarem Phaawuloosa yakkam Saawulanne[13] Keesammi Ayyaaninne wo'mmukkaare ee kiiraancho xuxxaa moo'aa

¹⁰«Kaa Sheexaanchi beeto, er luwwi hundinam masokkichcho, huushansimmii jollii hundim wo'mmaakkoohaanno! Moollannika xabbeen googo boqqisimma uttooyyonnihe?

¹¹Oono'o! Kaba Waa'i angi keese aphphisoohaare ammanoomina caakka moo'lloobee'isa ki illi qooqookko» yukko. Ee ammanchom witiriichchii tuunsii ixxi ille ifiisukkaare manni ixxi anga amadaa masakkoo'isina hasukko.

¹²Oo gassaanchim Moollanni bikkina macceesu woshshanne maalalaa hee'u bikkina eekka moo'u ammanenne amma'nnukko.

¹³Ee lasage Phaawuloosii ixxenne hee'llo'i ixxi beshii Phaafoosiinsi markabanne aagga'a Phimfiliyanne yoo Pherge'e matto'o. Ee beyyiinsim Yohaannisa yakkam Maarqoos ixxuwwa uraa Yerusaaleema daba'llukko.

¹⁴Ihukkaarem Phaawuloosii Baarnabaasii Pherge'iinsi Phisidiya yakkam uullanne yoo Anxooke'e matto'o. Eekke'em Usheexxaxxi Ayyaamonne Ayihuxxi manni wixxixxi mine aagga'a afuutto'o.

¹⁵Muse'e kitaabu See'l kitaabiinsii hiraagaan kitaabbo'i kitaabiinsii qananaa'akka'a lasage wixxixxi mi'n awwonsaan Phaawuloos beyyoo Baarnabaas beyyoo «Niyyabbaayyuwwa, ayyi la'ukko minaadaba soggakka'a qoxxissakkam luwwi yoolas woccehe» yita'a manna asse'llo'o.

¹⁶Ee bikkina Phaawuloos iimaa uullaa manni sa'aa ixxi woshsha macceesoo'isina anginne kuraa «Isra'ee'l minaadabii Isra'ee'l Waa'ina otossitakkam mulli minaadabii macceessehe!

¹⁷ Ka Isra'ee'l minaadaphphi Waa'i niyyanno'o doo'llaa Gibxanne hee'llu'uuyyi lobakat minaadab issukko. Ee Gibxiinsim ixxaanninne malaayyaam wodinne fissaa

¹⁸ udma'anne sor hiincho ixxuwwi jottu'uuyyim iyyaqqimminne abooyyukko.

¹⁹ Kaana'aa'n uullanne hee'llo'i lamarem shumo'o bi'isaa ee bi'isu kee'n uullam ixxuwwi gaqqan issaa uwwukko. Oo woshshi hundim ihukkuuyyi soor xibbee ontayyi hiinchoo ihukko.

²⁰ Eehanniinsi lasage hiraagaanchi Saamu'eelanne afeebe'e awwonsitam gassaano uwwukko.

²¹ Isra'ee'l minaadab adila uullisoo'isina Waa'a xa'mmito'aare Waa'im Biiniyaam moolliinsi Qiis beet Saa'oola sor hiincho adil ihaa gassoo'isa issukko.

²² Saa'oola adillaniinsi dilliisaa lasage Waa'i ixxuwwina Daawiit adil ihoo'isina ki'isukko. Waa'i Daawiitina ‹An yummi luwwi hundam issukkuuyyi i tii'llisa hee'oo Issayyi beeto Daawiita siixxaammo› yaa wocukko.

²³Waa'i ‹Uwwoommo› yukkisinnem ka manchi shumo'iinsi Isra'ee'l Gatisaancho Yesuusa asse'ukko.

²⁴ «Yesuus ixxi baxinne la'amoo'n illageen Isra'ee'l minaadab hundim baaxiiliinsi daba'llito'isa moo'isoo xammaqanchi bikkina Yohaannis alallaatukko.

²⁵ Yohaannisim ixxena uwwamu baxo guulleena ihaakkoohaannonne ‹Eese ayyette?› yitakkamuulla ‹An ki'nnuwwi egettakkam Kiristoosatteyyo. An ixxeka caamma'i fatiram tireena laboombee'ek iinniinsi lasage waaroolla› yam hee'ukko.

²⁶«Iyyabbaayyuwwi Abrihaam oosii Isra'ee'l Waa'ina otossitakkam mulli minaadabii! Ku neese kulloommi woshshi Waa'i niina Gatisaanchi issaa asse'ukkaanni bikkinatte.

²⁷Yerusaaleemanne hee'llam keenii ixxuwwa gassaanii Yesuus Gatisaanchi ihukkisa laqqo'oyyo. Hiraagaan kutto'i woshsha Usheexxaxxi Ayyaam hundam qananaa'llo'aarem qoossita'a la'imma hoogimminne ixxonne oogatta'a hiraagaan kutto'i woshshi wo'mmoo'isa issito'o.

²⁸ Yesuusa shisiisoo luwwa maham siidoo'nnim ixxo shoo'isina Philaaxoosa uunxito'o.

²⁹Ixxi bikkina kitaabamu woshshi hundichchom issita'a guullita'a lasage saqalto'i haqqiinsi dilliissa'a waammito'o.

³⁰Ihukkaarem Waa'i ixxo lehiinsi ki'isukko.

³¹ Lehiinsi ki'aa lasage ixxenne maqirem Galiiliinsi Yerusaaleema waatto'i keenina dut ayyaamo moo'amukkaare lehiinsi ki'ukkisa kaba minaadabina kuttamuulla.

³²Neesem Waa'i niyyanno'ina ‹Uwwoommo› yu mishiraachchi sagara ki'nnuwwina eembaammo.

³³ Oohim ixxuwwi oos inkummi niina Yesuusa lehiinsi ki'isimminne Waa'i wonshukkane. Ee'isam Mazmuu'l Kitaabanne la'm mazmuuranne ‹At iina Beeto; keese qarummok kaballa› yamamaa kitaabamukkane.

³⁴ Odim waammanne ixxi shamaa gatoobee'isa Waa'i lehiinsi ixxo ki'isimmi hanqi ihukkisa kureena ‹Hanqinam an Daawiitina uwwummi neeyyato keesamaakkoo maasso kiina uwwoommo› yaa wocukko.

³⁵ Ee'isam mulli beyyonnem ‹Waa'i ixxena keesamaakkoo awwaadaancho waammanne shamaa gatona urooyyo› yaakko.

³⁶Waa'i ‹Isse› yu luwwa Daawiit ixxi doollenne issaa guullaa lasage lehaa ixxi anno'innem waammamaa shamukko.

³⁷Ihukkaarem Waa'i lehiinsi ki'isukkok shamukkoyyo.

³⁸Ee bikkina niyyabbaayyuwwa, Waa'i Yesuus kollinne baaxiilo haafoo'isa ki'nnuwwina alallaantummisa qoossitakka'a laqqehe.

³⁹Muse'i Seera egerimminne muccuttakkeena xantakkobee'i luwwi hundiinsim Yesuusanne amma'nnimminne muccuttakkeena xantakkamo.

⁴⁰Kabadem Waa'i hiraagaa'n kollinne ihaa ‹Ki'nnuwwi naacantakkam keeno ki'nnuwwina ayyim kurukkaare amma'nnitakkambee'i luwwa an ki'nnuwwi doollenne issoommi bikkina maalallehee bi'llehee› yu woshshi ki'nnuwwanne afoobee'isa qoxxitakka'a ege'llehe» yukko.

⁴¹

⁴²Ee wixxixxi miniinsi Phaawuloosii Baarnabaasii fitto'i ammanenne waaroo Usheexxaxxi Ayyaamom ee woshsha edda'a kuttamisina uunxito'o.

⁴³Ee wixxixxi miniinsi manni binnu ammanenne Ayihuxxi minaadaphphek lobakat mannii Ayihuxxi manni amma'nnatonne daba'llito'i kee'nnek Waa'ina gatto'i keenii Phaawuloosaa Baarnabaasaa awwonto'o. Phaawuloosii Baarnabaasii ee manna losissa'a Waa'i eroommiinsi annanni ikkambee'isa qoxxissa'a soggo'o.

⁴⁴Ee Usheexxaxxi Ayyaamonnem ee beero'ik hofqax manniinsi bagaan manni hundim Waa'i sagara macceesseena mat ikka'a wixxukko.

⁴⁵Ihukkaarem Ayihuxxi manni ee wixxu minaadaba moo'llo'i ammanenne lobakata to'achchita'a Phaawuloos wocu woshsha sabba'a ixxo game'llito'o.

⁴⁶Ee bikkina Phaawuloosii Baarnabaasii eraa'llaanniinsim lobakat iggimminne «Waa'i sagar gaassaa ki'nnuwwina kuraanchi hasisookko. Ihukkaarem ki'nnuwwi ‹Heer heerina hee'oo heechcha hansoommoyyo› yitakka'a ki'nnuwwi gaganne oogattakko'aa'lleensi, oono'o, neese mulli minaadabina kulleena malloommo.

⁴⁷ Oohim Waa'i ‹At uullanne yoo minaadab hundam an gatisoommisa kuttaa mulli minaadabina caakki ikkoo'isa issaammo› yaa ijaajukkane» yito'o.

⁴⁸Mulli minaadab eekka macceesso'i ammanenne liiranta'a Waa'i sagara lonsito'o. Heer heerina hee'oo heechchina doo'llanto'i keenim amma'nnito'o.

⁴⁹Moollanni sagarim ee uulli hundam afukko.

⁵⁰Ihona bagaan Ayihuxxi manni Waa'ina gatto'oo goddaan meentoo ee beero'o gassitam geejji geejji mannaa Phaawuloosannee Baarnabaasannee ki'issa'a ee uulliinsi fissita'a hollito'o.

⁵¹ Phaawuloosii Baarnabaasii lokkiinsi dira giggissita'a[14] utta'a Iqooniyooma matto'o.

⁵²Amma'nnaanonnem liiranchii Keesammi Ayyaanii wo'mmukko.