Read Hadiyya Asse'amaa'n Baxo 15 Bible Online

Asse'amaa'n Baxo 15 - Hadiyya bible

Asse'amaa'n Baxo 15

¹ Mat mat manni Yihuxxi uulliinsi Anxooke'e dillita'a amma'nnito'i keenina «Muse'i See'llisanne ballachchantakkobeelas[17] gattakkeena xantakkamoyyo» yita'a losissam hee'llo'o.

²Phaawuloosii Baarnabaasii ee keeninne malaayyaamisa fitanto'o. Ee lasage Anxooke'enne hee'llo'i amma'nnaan Phaawuloosaa Baarnabaasaa ixxuwwi lambe'iinsi mat qax mannaa doo'llita'a oo keen Yerusaaleema fitta'a matta'a Yesuus asse'amaaninnee lommanninnee ka woshshi bikkina a'llantona qooddo'o.

³Amma'nnaanim ixxuwwa geegeesso'aare Fiinqe'innee Samaare'innee aa'lla'a higgu'uuyyi mulli minaadabiinsi Waa'i kollonne daba'llito'isa kutto'aare oo woshshi amma'nnaan hundam lobakata liiransukko.

⁴Yerusaaleema affo'i ammanenne Yesuus asse'amaan, lommannii amma'nnaanii hundim ixxuwwa aa'llo'o. Ixxuwwim Waa'i ixxuwwinne ihaa baxu bax hundam kutto'o.

⁵Ihukkaarem Farisaawe'uwwiinsi amma'nnito'i kee'nnek mat mat ki'lla'a «Mulli minaadabiinsi amma'nnito'i keeno ballachchimmii Muse'i Seera egettamisa issimmii hasisookko» yito'o.

⁶Yesuus asse'amaanii lommannii ee woshsha a'llanta'a mutteena dummito'o.

⁷ Ixxuwwim lobakata fitanta'a lasage Pheexiroos ki'aa «Iyyabbaayyuwwa, mulli minaadab iinniinsi mishiraachchi sagara macceessa'a amma'nnita'a gattamisina Waa'i gaassaatim ki'nnuwwi lambe'iinsi eese doo'llukkisa laqqakkamo.

⁸ Mannika wodano la'oo Waa'i niina uwwu Keesammi Ayyaana ixxuwwinam uwwimminne ixxuwwam aa'ukkisa caakkisaa la'isaakko.

⁹Ixxim ixxuwwi Yesuusanne amma'nnito'i bikkina ixxuwwika wodano muccussukko bagaan ni lambe'ennee ixxuwwi lambe'ennee annannooma issukkoyyo.

¹⁰Ee bikkina niyyanno'ii neesee iyyineena xannumbee'i iyyo amma'nnaa'n gudumonne iyyiisimminne kaba Waa'a mahina keentakkamuulla?

¹¹Ihona bagaan neesem ixxuwwisam Moollanni Yesuus eroommanne amma'nnimminne gantummisa amma'nninoommo» yukko.

¹²Ee ammanenne Baarnabaasii Phaawuloosii Waa'i ixxuwwinne ihaa mulli minaadaphphi lambe'enne issu maalalsiisoo dut mare'ee agannaa kuttu'uuyyi dummito'i manni hundim cawwita'a macceesso'o.

¹³Ixxuwwi kutta'a guullita'a lasage Yaaqoobim «Iyyabbaayyuwwa, anim wocoommi woshsha macceessehe.

¹⁴Waa'i gaassaatim mulli minaadabiinsi ixxi lombina ihoo manna doo'llimminne hinkido'i eroomminne ixxuwwa moo'uda'e Simi'oon kuraakko.

¹⁵Hiraagaan ka woshshinne kobi'lloo woshsha

¹⁶ ‹Siriinsim ki'isaa ka hundam la'isu Waa'i «Gatto'i minaadab hundim oohim mulli minaadab hundim i summinne weeshanto'i keen i kollonne daba'llitamisina an ka lasage daba'llaa waaraa gindamu Daawiit mine baxoommo. [18] Ee gindamukkokam baxaa uullisoommo» yaakko› yita'a kitaabbo'ookko.

¹⁹Ee bikkina i sawwit mulli minaadabiinsi Waa'i kollonne daba'llito'i keeno hawwinsoombee'isinatte.

²⁰ Ihona bagaan qophpha'n waa'ina kitimamaa haashaaramu maara itimma, saa'immaa baytu diinaxxi maaraa xiigaa itimmaa uttamisina kitaambaa asse'nnona.

²¹Mashka'oomim Muse'i Seera Usheexxaxxi Ayyaamonne wixxixxi minneewwannee beero'uwwi hundannee gaassiinsim ki'issa'a qananaa'llu'uuyyii kuttu'uuyyii yo'o» yukko.

²²Ee lasage Yesuus asse'amaan, lommannii Yerusaaleemanne hee'llo'i amma'nnaanii hundim mat ikka'a Phaawuloosinnee Baarnabaasinnee maqire mattamisina mat qax manna doo'llita'a Anxooke'e asse'immi eran ihukkisa sawwito'o. Ee bikkina amma'nnaa'n lambe'iinsi la'anto'oo keeno Baarsabaasa yakkam Yihudaa Sillaasaa doo'llita'a asse'llo'o.

²³Asse'llo'i assim, «Neese ki'nnuwwi abbaayyuwwi Yesuus asse'amaan, lommannii ka beyyonne yo'i amma'nnaanii hundim Anxooke'enne, Sooriyannee Kilqe'ennee hee'llakkam mulli minaadabiinsi Yesuusanne amma'nnitakko'i niyyabbaayyuwwina xummaato hincaa'nnoommuulla.

²⁴Mat mat keen ni lambe'iinsi ki'nnuwwi beyyo matta'a asse'nnumbee'i luwwa kuttu'uuyyi ki'nnuwwa hawwisso'isaa tiiro bi'issoo'isaa neese macceensaammo.

²⁵Ee bikkina neese dumminaa mat wodan inkaa iittammaa ni Moollanni Yesuus Kiristoos bikkina ixxuwwi gaga higissa'a uwwito'i neese iittinoommi Baarnabaasinnee Phaawuloosinnee maqirem ki'nnuwwi beyyo mattamisina mat qax manna doo'llinaa asse'nnaammo.

²⁷Neese woshsha mullaa kitaambaa asse'nnummi asso suuminnem edda'a kuttamisina Yihudaa Sillaasaa endaa asse'nnaammo.

²⁸Kanniinsi woroon yoo hasisoo ijaajiinsi bagaan mulli iyyo endaa iyyiinsoombee'isina neesee Keesammi Ayyaanii iittammaammo.

²⁹Oo ijaajim qophpha'n waa'ina kitimakko'i luwwa itimmiinsi, xiigaa bayitaa itimmiinsii saa'immiinsii ki'nnuwwi gaga ege'llehe. Ee keeniinsimdu ki'nnuwwi gaga ege'llitakkolas hore'em danaamo. Xummanne hee'llehe» yita'atette.

³⁰Oo asse'anto'i keenim geegeesanta'a lasage Anxooke'e dillita'a amma'nnaan hundam wixxaa'lla'a ee kitaabamu asso uwwito'o.

³¹Amma'nnaanim ee kitaabamu asso qananaa'lla'a lobakata liiranto'o.

³²Odim Yihudii Sillaasii hiraagaan hee'llo'i bikkina amma'nnaano qoxxisoo dut luwwa soggo'o.

³³Ixxuwwim lobakat balla afuutta'a lasage amma'nnaan ixxuwwa «Xumminne mallehe» yita'a geegeesso'aare Yesuus asse'amaa'n beyyo daba'llita'a matto'o.[19]

³⁵Ihukkaarem Phaawuloosii Baarnabaasii dut mulli keeninne maqirem ee Anxooke'enne Moollanni sagara losissamii kuttamii hee'llo'o.

³⁶Hofqax ayyaamiinsi lasage Phaawuloos Baarnabaasina «Moollanni sagara kullummi beero'uwwanne hundannem yo'i amma'nnaan hinkid yoda'e moo'nneena daba'llinaa mallona» yukko.

³⁷Baarnabaasim Maarqoosa yakkam Yohaannisa ixxuwwinne maqire maroo'isina hasukko.

³⁸ Ihukkaarem Phaawuloos oo Maarqoos baxina ixxuwwinne maqire maroo'n sabaa Phimfiliya yakkam uullanne ixxuwwiinsi annanni ihaa gatu bikkina ixxuwwinne edamaa marona hasukkoyyo.

³⁹Maarqoos mashka'inne ixxuwwi lambe'enne malaayyaam wocanchi firukkaare annanni ikka'a Baarnabaas Maarqoosa amadaa markabanne aagaa Qoophphiroosa yakkam uulla marukko.

⁴⁰Phaawuloosim Sillaasa amadaa mareena doo'llukkaare amma'nnaan Waa'ik eroommi ixxenne maqire ihoo'isina Waa'ina yabo uwwita'a lasage

⁴¹Sooriyannee Kilqe'ennee do'ukkuuyyi amma'nnaano qoxxisam hee'ukko.