Read Hadiyya Asse'amaa'n Baxo 17 Bible Online

Asse'amaa'n Baxo 17 - Hadiyya bible

Asse'amaa'n Baxo 17

¹Phaawuloosii Sillaasii Anfiphoolaa Aphpholooniyaa yakkam beero'oo higga'a matta'a Tasalonqe'i beero'o affo'o. Ee beero'onnem Ayihuxxi manni wixxixxi min hee'ukko.

²Phaawuloos ixxi losa'nnisam ee wixxixxi mine maraa sas Usheexxaxxi Ayyaamo Keesammi Kitaabiinsi[22] Kiristoos hawwo aa'immi, lehimmii lehiinsim ki'immii hasisoohan ihukkisa mannina caakkisaa kurukkuuyyi «Ku an ki'nnuwwina alallaatoommi Yesuus Gatisaanchi Kiristoosatte» yam hee'ukko.

⁴Ixxuwwiinsim Ayihuxxi mannik mat mat keen, Waa'ina gatto'oo Giriik mannikii la'anto'oo meentik lobakat keenii amma'nnita'a Phaawuloosinnee Sillaasinnee mat ikko'o.

⁵Ihukkaarem Ayihuxxi manni Phaawuloosannee Sillaasannee to'achchita'a meeranne manniinsi boggam jor manna wixxaa'lla'a ee beero'onne hambalaachcha ki'issamisina soggo'o. Ee lasage beero'i manni hundam wixxaa'lla'a Phaawuloosaa Sillaasaa mannina fissita'a uwwiteena Iyyaasoona yakkam manchi mine kibbito'o.

⁶Kibbito'aarem ixxuwwa siiddeena xantobee'i bikkina Iyyaasoonaa mat qax amma'nnaanoo amadda'a gosaassu'uuyyi daannuwwi beyyo massito'o. Oo amaddo'i keenim «Uulli hundam iimii aadii hambaaccam hee'llo'i keen ka uullam waatto'ookko.

⁷Iyyaasoonim ixxuwwa aa'aa gassoohane. Ixxuwwim ‹Yesuusa yakkam adil yookko› yita'a Oroo'm adi'l seera sabbam keeno» yitu'uuyyi shuuttam hee'llo'o.

⁸Minaadabii gassaanii ee woshsha macceesso'i ammanenne hambalaachchanto'o.

⁹Ee lasage ixxuwwi Iyyaasoonaa mulli keenoo lubbato weeshissa'a mattona utto'o.

¹⁰Amma'nnaan ee ammanchom Phaawuloosaa Sillaasaa hiimonne Beeriy beero'o mattamisa issito'aare ixxuwwim matta'a affa'a lasage Ayihuxxi manni wixxixxi mine matto'o.

¹¹Oo Beeriy beero'onne hee'llo'i Ayihuxxi manni Tasalonqe'i manniinsi haraar sawwit yoo manni hee'llo'i bikkina Phaawuloos losisam hee'u losishsha lobakat qulunxinne macceessam hee'llo'o. Oo Phaawuloos losisam hee'u losishshi hanqida'e ihukkisa laqqeena ballina ballina Keesammi Kitaaba saarayyitu'uuyyi qananaa'llam hee'llo'o.

¹²Ixxuwwiinsim Ayihuxxi mannik dut keenii Giriik manniinsi la'anto'oo meentikii goo'nnekii lobakat mannii amma'nnito'o.

¹³Ihukkaarem Tasalonqe'enne hee'llo'i Ayihuxxi manni Phaawuloos odim Beeriy beero'onnem Waa'i sagara alallaatukkisa laqqo'i ammanenne ee beero'om waatta'a hambalaachchita'a Phaawuloosaamonne manna ki'isso'o.

¹⁴Amma'nnaan ee ammanchom dambalaq gadano Phaawuloosa afissa'a ee beyyiinsim Atee'n beero'i afeebe'e geegeesso'o. Ihukkaarem Sillaasii Ximootoosii Beeriyannem gatto'o. Ee lasage Phaawuloos ixxuwwina «Sillaasii Ximootoosii xansiisukkis hundinnem qaqqissa'a Atee'n beero'o i beyyo waattona» yukkaare ijaajo amadda'a Beeriy beero'o daba'llito'o.

¹⁶Phaawuloos Atee'n beero'onne Sillaasaa Ximootoosaa egerukkuuyyim Ateenanne hee'llam manni Waa'i bikkenne otossitam luwwi wo'mmukkisa moo'aa ixxi tiironne lobakata kichche'ukko.

¹⁷Kichche'u bikkina wixxixxi minenne Ayihuxxi manninnee Waa'ina gatto'i mulli manninnee odim ballina ballina meeranne edamu keen hundinnem lobakata wocam hee'ukko.

¹⁸Ephiikoroosa[23] yakkam kolli manniinsii Istooka[24] yakkam kolli manniinsii lachchaammuwwi hee'llo'i mat mat keen Phaawuloos beyyo waatta'a «Ku wocaa hoogoobee'i manchi mayyoolla?» yito'o. Odim mulli keenim Phaawuloos Yesuus bikkinaa kichchi bikkinaa losisu bikkina «Neese lanqoombee'i dut waa'i bikkina kurookkoka laboolla» yito'o.

¹⁹Ee bikkina Aryoosfaagoosa[25] yakkam beyyo Phaawuloosa massita'a «Neese kanniinsi illageen lanqoombee'i mat mat luwwa woccittuuyyi macceensummi bikkina ku at losissoo haareechchi losan maruchda'e ihukkisa lanqeena hansaammo. Huno'o, caakkissaa niina kure» yito'o.

²¹Eehid yito'okim Atee'n mannii mulli uulliinsi waatta'a Atee'n beero'onne hee'llam mannii hundim haareechchi woshsha wocimminnee macceesimminnee ammane higissam hee'llo'o bagaan hore'em mulluwwinne ammane higisimma iittitam hee'llo'oyyo.

²²Ee ammane Phaawuloos Arfaagoosanne wixxu manni lambe'enne uullaa «Atee'n manna, ki'nnuwwi lobakat luwwanne amma'nnitakkam keen ikkakko'isa an qoossaa la'aammo.

²³Eehid yeena xanummok an ki'nnuwwi beero'onne daba'llamummuuyyi Waa'i bikkenne ki'nnuwwi otossitakkam luwwaa ee keeninam diinate kitimtakkam beyyuwwaa moo'ummo. Ee kitimtakkam beyyuwwaannonne matonne ‹La'akkambee'i waa'inatte› yoo luwwi kitaabamaakkoo moo'ummo. Kaba an ki'nnuwwina alallaatoommok laqqakkoo'n otossitakkam Waa'i bikkinatte.

²⁴ Uullaa uullanne yoo luwwaa hundam qooccu iimaninaa uullinaa Moollanni Waa'i manni baxu minenne hee'ooyyo.

²⁵Mannina fooree fooshshaa odim hasisoo luwwi hundam uwwukkok ixxotte ihu bikkina ixxena hanqatoo luwwi mahim bee'e. Manni hara'mmatim ixxena hasisooyyo.

²⁶Ixxim minaadab hundam mexxo'i manchiinsi qooccaa uulli hundannem wo'mmitamisa issukko. Odim ixxuwwi hee'llam doollee hee'llam beyyoo gaassaahim gabala issukko.

²⁷Waa'i ee hundam issukkok manni ixxuwwi tiirinnem ki'lla'a ixxo hassamisinaa hassa'atim siiddamisinaa hasu bikkinatte. Ihukkaarem Waa'i niinniinsi annannichchiinsim qee'lloo'n yoohane.

²⁸Ki'nnuwwiinsi mat manchi ‹Neese foore siindummok, mikmiknoommokii yoommine'ekii ixxennette› yaakko. Odim ki'nnuwwiinsi mat mat hayyo'uwwi ‹Neese hundichchim Waa'i ooso› yito'ookko.

²⁹Eehaara'i ‹Neese Waa'i ooso› yinoomman ihulas manni qooroominne worqiinsi, biriinsii kiniinsii baxamu luwwa ‹Waa'i kaka labookko› yinaa sawwimmi hasisooyyo.

³⁰Lachcha hoonginne manni issukkuuyyi hee'u doolle Waa'i cawwaa uraa higisimminne ixxi doo'llu manchi kollinne uullanne xabbeen oogato'o oogatoo ayyaamo amadu bikkina kaba beyyi hundannem yoo manni baaxiilo biiraa yihona Waa'i ijaajoolla. Oohim hanqi ihukkisa manni hundinam caakkisaa la'isukkok ee doo'llu mancho lehiinsi ki'isimminnette» yukko.

³²Ixxuwwim lehiinsi kichchi woshsha macceesso'i ammanenne mat mat keen ixxonne naacimma asheetto'o. Ihukkaarem mat mat keen «Ka woshsha kiinniinsi endaa macceenseena hansoommo» yito'o.

³³Ee lasage Phaawuloos ixxuwwi lambe'iinsi uraa firukko.

³⁴Ee keeniinsi mat mat keen amma'nnita'a Phaawuloosinne mat ikko'o. Amma'nnito'i keeniinsim Arfaagoos dummichchi daannuwwiinsi mat hee'u Diyyoonaasiyoosii Damaarse yakkam meentichchoo mulli keenii ixxuwwinne maqirem hee'llo'o.