Read Hadiyya Asse'amaa'n Baxo 18 Bible Online

Asse'amaa'n Baxo 18 - Hadiyya bible

Asse'amaa'n Baxo 18

¹Ee lasage Atee'n beero'iinsi firaa Qorontoos beero'o marukko.

²Ee Qorontoos beero'onnem Phaanxoos uullan ihoo mat Aqila yakkam Ayihuxxi manchi hee'ukko. Ixxim Phirisqile yamantam ixxi arennem ee beyyo maraa hee'ukkok Qalaawdiwoosa yakkam Oroo'm adil Ayihuxxi manni hundim Oroo'm beero'iinsi firoo'isina ijaajaa hee'u bikkinatte. Phaawuloosim ixxuwwinne edamukko.

³Phaawuloosik bax ee Aqilisam dukkaana gobimmi hee'u bikkina ixxuwwinne maqirem afuuraa dukkaana gobam hee'ukko.

⁴Ixxim Usheexxaxxi Ayyaamonne saantina saantina ee Ayihuxxi manni wixxixxi mine maraa Ayihuxxi manninaa Waa'ina gatto'i Giriik uulli manninaa Kiristoos bikkina caakkisaa kurukkuuyyi amma'nniseena yakam hee'ukko.

⁵Sillaasii Ximootoosii Maqeedoo'n uulliinsi waatta'a lasage Yesuus Gatisaanchi Kiristoosatte ihukkisa Ayihuxxi mannina hundi ammanem Phaawuloos losisamii kuramii hee'ukko.

⁶Ixxuwwim ixxo sabba'a game'llato lonsito'i bikkina «Ki'nnuwwi ki'nnuwwi gaginnem bi'llakkeena hassakkolas ki'nnuwwi quuxo! Anette ihummaare ki'nnuwwi xiigiinsi muccura; kabadiinsi ki'isaa an mulli minaadaphphi beyyo maroommo» yaa ixxeka eddechcha giggissukko.

⁷Ee bikkina Phaawuloos ixxuwwiinsi annanni ihaa Waa'ina garaakkoo Tiitoos Yoosxoosa yakkam manchi mine marukko. Ixxekim min Ayihuxxi manni wixxixxi mi'n gadanonnette hee'ukko.

⁸Ee wixxixxi mi'n awwonsaanchi hee'u Qarisphoosa yakkam manchi ixxi mi'n abaroosinnem Moollannanne amma'nnukko. Ee'isam Qorontoos beero'i mannik Phaawuloosiinsi macceessa'a dut keen amma'nnita'a xammaqanto'o.

⁹Moollanni Phaawuloosina mat hiimo kaaltanne moo'amaa «An kiinninne maqire yoommi bikkina ayyi manchim keese hawwodeena xanooyyo; baddititte. Odim ka beero'onne iina lobakat minaadab yoo bikkina woce bagaan badditaa cawwititte» yukko.

¹¹Ee beyyonne Phaawuloos Waa'i sagara losisukkuuyyi mat hiinchoo loh aganaa ixxuwwinne maqirem afuurukko.

¹²Gaaliyoosa yakkam manchi Akaaya yakkam uulla gassam hee'u ammane Ayihuxxi manni mat ikka'a Phaawuloosanne ki'lla'a amadda'a gassaanchi oogatoo beyyo massita'a

¹³«Ku manchi Seer yoobee'isanne manni Waa'ina otossoo'isa issoolla» yito'o.

¹⁴Phaawuloos woceena ihonam Gaaliyoos Ayihuxxi mannina «Ki'nnuwwi Ayihuxxi manni, macceessehe! Ixxi ki'nnuwwa hawwodaakkoohan te'im ki'nnuwwanne damigaakkoohan yakkota'n ki'nnuwwi ixxo kasassakko'oka macceesam hee'ummo.

¹⁵Ihukkaarem ki'nnuwwi kasassakko'ok saga'l bikkinatte, summuwwi bikkinattee ki'nnuwwi see'l bikkinattee ihu bikkina ki'nnuwwi gagim moo'llehe bagaan an ka woshsha oogatoommoyyo» yaa dummichchiinsi ixxuwwa hollukko.

¹⁷Ixxuwwi hundim ee ammane wixxixxi mi'n awwonsaanchi hee'u Soostinoosa yakkam mancho amadda'a gassaanchi Gaaliyoos illagenne ganto'aarem Gaaliyoos ee woshsha mahannem xigukkoyyo.

¹⁸ Phaawuloos Qorontoosanne lobakat balla afuuraa lasage Sooriy uulla mareena amma'nnaano «Xummanne hee'llehe» yaa Phirisqilennee Aqilinnee maqirem maraa Kinkiroos beero'i afukkisam uga'a aagaa hee'u bikkina ixxi horoore hogoossaqqukko.

¹⁹Ixxuwwim markabanne aagga'a matta'a Efeesoo'n beero'o affa'a lasage Phirisqilee Aqilaa uraa Phaawuloos mullam Ayihuxxi manni wixxixxi mine maraa Ayihuxxi mannina caakkisaa losisam hee'ukko.

²⁰Ixxuwwim ee beyyonne mat qax balla afuuroo'isina uunxito'aare afuurimma sabaa

²¹ixxuwwina «Waa'i yukkaare ki'nnuwwi beyyo mulli ammane daba'llaa waaroommo» yaa Efeesooniinsi markabanne aagaa ixxuwwiinsi annanni ihaa marukko.

²²Qiisaariya afaa markabiinsi dillaa amma'nnaano xummaatiseena iim Yerusaaleema maraa ee beyyiinsim Anxooke'e dillukko.

²³Ee beyyonnem matqaxa afuuraa lasage Galatiyaa Firge'ee yakkam uullanne beyyi hundam marukkuuyyi amma'nnaan hundam qoxxisam hee'ukko.

²⁴Alaksaandir beero'onne qaramaakkoo Aphphuloosa yakkam Ayihuxxi manchi Efeesoona waarukko. Ixxi Keesammi Kitaaba lobakata la'oohanee danaamisa gudisaa wocoohanee hee'ukko.

²⁵Ixxim Waa'i googo losaakkoohan hee'u bikkina malaayyi hundinnem Yesuus woshsha hanqo'isa wocamii losisamii hee'ukko. Ihona bagaan ixxi la'am hee'ukkok[26] xale'i Yohaannis xammaqam hee'u xammaqancha hee'ukko.

²⁶Ixxim Ayihuxxi manni wixxixxi minenne iggimminne wocimma asheerukko. Ihukkaarem Aqilii Phirisqilee ixxeensi macceessa'a lasage ixxo mine massita'a Waa'i googo edda'a danaamisa caakkissa'a kutto'o.

²⁷Aphphuloos Akaaya yakkam uulla firaa mareena hasukkisa amma'nnaanina kurukkaare ixxuwwim ixxi sawwite aa'llo'o. Oo Akaayanne hee'llo'i amma'nnaanim ixxo aa'llamisina assi kitaaba kitaabba'a uwwito'o. Ixxim ee beyyo afaa lasage oo Waa'i eroomminne amma'nnito'i keen amma'nnatonne qoxxitamisina lobakata hara'mmukko.

²⁸Yesuus Gatisaanchi Kiristoosatte ihukkisa Keesammi Kitaabiinsi qananaa'aa kurukkuuyyi Ayihuxxi manninne qoxxaallisa fitamaa neegaram hee'ukko.