Read Hadiyya Asse'amaa'n Baxo 19 Bible Online

Asse'amaa'n Baxo 19 - Hadiyya bible

Asse'amaa'n Baxo 19

¹Aphphuloos Qorontoos beero'onne hee'onam Phaawuloos hanaa'n kollonne yoo uullinne higaa Efeesoo'n beero'o waarukko. Eekke'em mat qax amma'nnaano siidukko.

²Ixxim ixxuwwina «Ki'nnuwwi amma'nnitakko'i ammane Keesammi Ayyaana aa'llakko'onnihe?» yaa xa'mmukko. Ixxuwwim «Neese aa'nnummoyyo; hore'em Keesammi Ayyaan yoo'isam macceensummoyyo» yito'o.

³Ixxim «Eehaara'i ki'nnuwwi hinkido'i xammaqancha xammaqantakko'ok?» yaa xa'mmukko. Ixxuwwim «Yohaannis xammaqam hee'u xammaqanchannette» yita'a dabatto'o.

⁴ Odim Phaawuloos «Yohaannis xammaqam hee'ukkok ‹Iinniinsi lasonne waaroohaannonne oohim Yesuusanne amma'nnehe› yaa kurukkuuyyi baaxiilo biira yimma moo'isoo xammaqancha» yukko.

⁵Ixxuwwim eekka macceessa'a Moollanni Yesuus summinne xammaqanto'o.

⁶Ee lasage Phaawuloos ixxi anga ixxuwwi hanenne issukkaare Keesammi Ayyaan ixxuwwanne dillukko. Ixxuwwim mulli suuminne wocimmaa hiraago wocimmaa asheetto'o.

⁷Ixxuwwi hundim tommoo lam manchoo ikkamqax hee'llo'o.

⁸Phaawuloos Ayihuxxi manni wixxixxi minenne sas agan afeebe'e Waa'i adilla'n bikkina iggimminne caakkisaa kurukkuuyyi amma'nniseena yakam hee'ukko.

⁹Ihukkaarem mat mat keen wodano kin issita'atii amma'nnimma sabba'atii manni illagenne Moollannika Googo jor issita'a game'llitu'uuyyi woccam hee'llo'i bikkina Phaawuloos amma'nnaano ixxuwwiinsi annanni issaa massaa Xiraanos haraar minenne ballina ballina losisam hee'ukko.

¹⁰Ee'isinne Phaawuloos lam hiincho ihooqaxa muroo'n losisu bikkina Issiya yakkam uullanne hee'llam Ayihuxxi mannii mulli minaadabii hundim Moollanni sagara macceesso'o.

¹¹Waa'i Phaawuloosinne ihaa annanni ihaakkoo maalalsiisoo aganna issam hee'ukko.

¹²Phaawuloosika sabbatam ihukko edde'u eddechcham ihukko massakka'a xissu mannanne issakkamaare oo xissu manni fayye'am hee'ukko. Odim habus amadu mannannem issakkamaare ee manniinsi habus firam hee'ukko.

¹³Ee ammane Ayihuxxi mannik mat mat keen habusa fissitu'uuyyi do'llam hee'llo'i kee'nnek «Phaawuloos kuroo Yesuus summinne fittakkamisina neese ijaanjoommuulla» yitu'uuyyi Moollanni Yesuus summinne manniinsi habusa fissiteena yakitam hee'llo'o.

¹⁴Ayihuxxi mannina hundiinsi lob qeessichchi hee'u Asqeewwik lamar oos ee'isa issitam hee'llo'o.

¹⁵Ihukkaarem oo habus ixxuwwina «An Yesuusam la'oommo, Phaawuloosam la'oommo; ihukkaarem ki'nnuwwi ayyayyaamo?» yukko.

¹⁶Oo habus amadaa hee'u manchi ixxuwwanne xophaa ixxuwwi hundam malaayyisaa kaa'aa ixxi miniinsi umba'ad issaatii omassaatii hollukko.

¹⁷Efeesoo'n beero'onne hee'llam Ayihuxxi mannii Yihud ikkobee'i mulli mannii hundim ee woshsha macceesso'i ammanenne baa'lla'a Moollanni Yesuus summa lobakata lonsito'o.

¹⁸Ee ammane amma'nnita'a hee'llo'i kee'nnek dut keen baxxo'i jor baxo biiraa yitu'uuyyi waattam hee'llo'o.

¹⁹Gennimmi baxo baxxam hee'llo'i kee'nnekim dut keen kitaabbuwwa wixxaa'lla'a eebba'a manni illagenne shokkiisso'o. Ee shokkiisso'i kitaabbuwwikam bito shallagakko'aare ontayyi kum diinaar ihukko.[27]

²⁰Ee'isinne Moollanni sagar ee uullanne lobakata haraarukkuuyyii qoxxukkuuyyii marukko.

²¹Oo luwwi ihaa higaa lasage Keesammi Ayyaan tiissiisukkaare [28] Phaawuloos «An Maqeedoonaa Akaayaa afaa lasage Yerusaaleema maraa ee beyyiinsim Oroo'm uulla maraa moo'immi hasisookko» yaa qoodukko.

²²Ee bikkina ixxena hara'mmitam hee'llo'i keeniinsi Ximootoosaa Eraasxoosaa lamom Maqeedoo'n uulla asse'aa ixxi hoffi ammaninam Issiyanne afuurukko.

²³Ee ammane Moollanni gooqqi mashka'inne malaayyaam hambalaachchi ki'ukko.

²⁴Ee hambalaachcha ki'isukkok kin biriinsi mu'uta baxoo Dimeexiroosa yakkam manchi hee'ukko. Ee Arxeemeese[29] mi'n misila kin birinne baxxu'uuyyi Dimeexiroosii mulli keenii lobakat diinate siiddam hee'llo'o.

²⁵Ee bikkina Dimeexiroos ee Arxeemeese mi'n misila baxxam keenoo eehido'i baxo baxxam mulli keenoo hundam mat issaa wixxaa'aa «Manna, neese goddinummok ka baxinnette ihukkisa laqqakkamo.

²⁶Ku Phaawuloos ‹Manni baxu misilluwwi Waa'ayyo› yaa xale'i Efeesoo'n beero'onnette ihoo'n hofqax uulliinsi bagaan Issiyanne yoo minaadab hundam huushansaa dabarukkisa ki'nnuwwi gagim moo'llakko'ookkoo macceessakko'ookkoo.

²⁷Kabadem ihukkaare ee woshshinne ki'ukkok neese banxoommi bax gadanchi xale'i ihoo'n lob waa'ik Arxeemeese min awwaad bee'an ihaa gateenatte. Odim Issiya'i uullannee uulli hundannemii manni otossoo lob Arxeemeese mi'n lombii nuurii gadamaakkoohan ihimmayyonnihe?» yukko.

²⁸Ixxuwwi eekka macceesso'i ammanenne lobakata nadajjinne «Efeesoo'n Arxeemeese hundiinsi lobotane!» yita'a shuutto'o.

²⁹Ee bikkina beero'i hundoomim dambaqukkaare Phaawuloosinne maqirem Maqeedooniinsi waatto'i beshshuwwa Gaayoosaa Arsixikoosaa lamom amadda'a manni wixxaa lello moo'oo beyyo geetto'o.

³⁰Amma'nnaan maroobee'isa hootto'o bagaan Phaawuloosim ee manni beyyo mareena hasaa hee'ukko.

³¹Issiy uulli daannuwwiinsi Phaawuloosina beshshuwwi hee'llo'i mat mat keen manna asse'lla'a «Lello moo'lleena manni wixxoo beyyo mattoobee'isa» yita'a Phaawuloosa uunxito'o.

³²Ee ammanenne manni hundim hambalaachchamam hee'u bikkina kolli mannii mat luwwa yukkuuyyi kollii odim mulli luwwam yukkuuyyi shuuram hee'ukko bagaan mahina wixxuda'em laqqam hee'llo'oyyo.

³³Ee wixxu minaadaphphi lambe'enne hee'llo'i mat mat Ayihuxxi manni Alaksaandiroosa yakkam manchi wocoo'isina gafe'ansita'a manni illagenne fissito'o. Alaksaandiroosim manni sa'oo'isina anginne kuraa Ayihuxxi bikkina fitameena asheerukko.

³⁴Ihukkaarem Alaksaandiroos Ayihudichchi ihukkisa laqqo'i ammanenne «Efeesoo'n Arxeemeese hundiinsi lobotane!» yitu'uuyyi lam sa'aata ihooqax ammane hundim mat ikka'a shuuttam hee'llo'o.

³⁵Lasaanchonne Efeesoo'n beero'i gassaanchi manna sa'issiisaa «Efeesoon beero'i minaadaba, lob Arxeemeese minee iimaniinsi ubu Arxeemeese misilaa Efeesoo'n beero'i egeraanchi ihukkisa la'oobee'ek ayyi hee'aate?

³⁶Eekka lagookkok ayyim bee'i bikkina ki'nnuwwi qoossitakkoo'n gaaggaabimminne matem luwwam issitakkotte.

³⁷Ki'nnuwwi Arxeemees mi'n mu'uta game'ubee'i manna te'im ni waa'i Arxeemeese game'llubee'i manna amaddakka'a keyye eebbakko'ookko.

³⁸Dimeexiroosii Dimeexiroosinne maqire baxxam keenii ayyem kasasseena hassolas niina daannuwwii uulli gassaanii oogattam ayyaam yoo bikkina eekke'e matta'a fitantona.

³⁹Ki'nnuwwimdu eehanniinsi lophphoo luwwa hassakkolas dummichchi moo'ookko.

⁴⁰Kaballa firu hambalaachchina ‹Ku hambalaachchi mahane?› yakka'a neesenne woshsha eebbakkota'n neese daballoommi dabachchi bee'i bikkina ku woshshi neese hawwisookko»

⁴¹yaa wixxu manna binnaa'ukko.