Read Hadiyya Asse'amaa'n Baxo 2 Bible Online

Asse'amaa'n Baxo 2 - Hadiyya bible

Asse'amaa'n Baxo 2

¹ Shaashshiqqi Ugud afu ammanenne awwonaan hundim mateeyyoominne mat beyyonne wixxita'a hee'llo'o.

²Dangonnem malaayyaam hambu'llamisa gugoo sagar waaraa ixxuwwi afuutto'i mine hundoomannem wo'mmukko.

³Allabo laboo gii'l labannuwwim waaraa ixxuwwanne annannichchonnem baxxansamaa afuurukkuuyyi moo'llo'o.

⁴Keesammi Ayyaan hundannem dillukkaare oo Ayyaan wocisukkisa mulli suuminne wocimma asheetto'o.

⁵Yihuxxek Waa'ina gatto'oo keen uulli hundiinsim waatta'a Yerusaaleemanne hee'llo'o.

⁶Ixxuwwim ee sagara macceessa'a wixxito'o. Annannichchim ixxi gaqqi suuminne amma'nnaan woccu'uuyyi macceessa'a maalalto'o.

⁷Ixxuwwim lobakata maalalta'a «Ku woccam keen hundim Galii'l uulli mannayyonnihe?

⁸Neese annannichchim woncoommi ni gaqqi suuminne woccu'uuyyi macceensoommok kuk hinkido'i woshsha?

⁹Neese Phaarte'enne, Meede'enne, Ilaame'enne, Maspheexoome'enne, Yihuxxi uullanne, Qaphaadooqe'enne, Phaanxoosanne, Issiyanne,

¹⁰Firge'enne, Phimfiliyanne, Gibxannee Qaareena yakkam beero'i gadanonne yoo Liibiyannee hee'nnoommi keen yoommine. Odim Oroo'm beero'onne hee'nnoommi Ayihuxxi mannii Ayihuxxi manni amma'nnatonne daba'llinummi keenii yoommine.

¹¹Qarxeesa yakkam uullannee Arabannee hee'nnoommi keenim yoommine. Neese annannichchim Waa'ika malaayyaam baxo niihaanninne annannichchi suuminnem kuttu'uuyyi macceensoommuulla» yito'o.

¹²Ee bikkina ixxuwwi hundim maalalta'a mal bi'ukkaare ixxuwwina'i ixxuwwim «Kuk maruwwa?» yaqqanto'o.

¹³Ihukkaarem mulli keen «Woyi'n diqaasa agga'a dimbita'atette» yita'a naacco'o.

¹⁴Ihukkaarem Pheexiroos tomminnee mat asse'amaaninnee maqirem uullaa sagara iimaa'aa minaadabina «Yihuxxi uulli mannii Yerusaaleemanne hee'llakkam mannii hundim an wocoommi woshsha qoossitakka'a macceessehe. Ku woshshi ki'nnuwwina la'amaakkoohan ihona.

¹⁵Ki'nnuwwina laboo'isanne ku manni agaa dimbukkoyyo; mashka'oomim kaba uulli soodukkaanniinsi xale'e sas sa'aata.

¹⁶Ihukkaarem kuk Waa'i hiraagaanchi Yoo'eelinne ihaa

¹⁷ ‹Lasaanchi doollenne kid issoommo. Maara edde'u keenonne hundannem iikka Keesammi Ayyaana dilliisoommo. Ki'nnuwwik goo'n oosii landi oosii hiraago woccamo. Ki'nnuwwik harde'i keenim kaalta moo'llamo. Ki'nnuwwik lommannim haqaawwe'ookko.

¹⁸Eeyya, hanqinam ee ammane iina awwaaddam keenonne, goonannee meentonnee iikka Keesammi Ayyaana dilliisoommo. Ixxuwwim hiraago woccamo.

¹⁹Moollanni waaroo la'amaakkoo malaayyaam balliinsi gaassaa hanaan iimanennem maalalsiisoo luwwa woroon uullannem mare'e moo'isoommo. Xiig, giirii umbu'lli'nnoo'i wiriirii ihookko. Eelliinchi tuunsookko. Aganim xiiganne daba'llookko.

²⁰

²¹Moollannika summa weeshoo keen hundim gatookko› yaa wocu woshsha.

²²Isra'ee'l minaadaba, ka woshsha macceessehe. Waa'i malaayyaam baxo, maalalsiisoo luwwaa mare'ee ki'nnuwwi lambe'enne ixxi kollinne issaa ki'nnuwwina la'isu mancho, ixxom Naazireexxi Yesuusa ki'nnuwwi gagim laqqakkamo.

²³ Ee Yesuusa Waa'i sawwaa gudisu sawwitinnee gaassim ixxena yoo lachchinnee ki'nnuwwina uwwukkaare ixxo jor manni anganne saqalamaa lehoo'isa issitakko'o.

²⁴ Ihukkaarem ixxo leh kaa'eena xanoobee'i bikkina lehika malaayye Waa'i ixxeensi hooraa lehiinsi ki'isukko.

²⁵ Daawiitim Yesuus bikkina ‹An i Waa'a hundi ammanem i illagenne moo'oommuulla. Ixxim iinninne maqire yoo bikkina kaa'amoommoyyo.

²⁶Ee bikkina an lobakata liiramoommo. Wocummuuyyim liiranchinne wocoommo. Ee hanniinsim lophphaa an sooxxi eroomma neeyyato issummuuyyi hee'oommo.

²⁷Mashka'oomim at i foore Si'oolanne uttooyyo. Kiina keesamukkokam shamona uttooyyo.

²⁸At iina heechchanne massoo googo moo'issaatto. Odim at iinninne maqir ihimmi eese lobakata liiransookko› yukko.

²⁹Iyyabbaayyuwwa, niyyanni Daawiit lehukkisa, waammamukkisaa ixxi waammim kaballi afeebe'e ni beyyonne yoo'isaa an ki'nnuwwina caakkisaa kuroommo.

³⁰ Daawiit hiraagaanchi hee'u bikkina Waa'i ixxi shumo'iinsi mat mancho ixxi adilla'n barcumanne afuusseena ixxena hide'ukkisa la'aa hee'ukko.

³¹Ee bikkina Waa'i doo'llaakkoo Kiristoos Si'oolanne gatoobee'isaa ixxi maarim shamoobee'isaa gaassaatim la'aa lehiinsi ki'oo'isa kurukko.

³²Ee Yesuusa Waa'i lehiinsi ki'isaakko. Ee woshshinam neese hundim naqaashshuwwa.

³³Ee bikkina Yesuus Waa'i makkanne lombinne afuurimminnee Waa'i ‹Uwwoommo› yu Keesammi Ayyaana aa'imminnee ka moo'llakkamokaa macceessakkamokaa issoolla.

³⁴ Daawiit iimane firukkoyyo. Ihukkaarem ixxi ‹Waa'i i Moollannina «Ki diina'a ki lokkiinsi woroon isseembe'e i makki kollonne afuure» yaakko› yaa Yesuus bikkina wocukko.

³⁵

³⁶Ee bikkina ka ki'nnuwwi saqaltakko'i Yesuusa Waa'i Moollannaa ixxi doo'llaakkoo Kiristoosattee issukkisa Isra'ee'l minaadab hundim qoossitakka'a laqqehe» yukko.

³⁷Mannim eekka macceesso'i ammanenne ixxuwwik wodan nakkamukkaare Pheexiroosinaa Yesuus asse'u mulli keeninaa «Niyyabbaayyuwwa, maha issino?» yito'o.

³⁸Pheexiroosim ixxuwwina dabaraa «Ki'nnuwwik baaxiil haafamoo'isina annannichchim baaxiilo biiraa yitakka'a Yesuus Kiristoos summinne xammaqammehe. Keesammi Ayyaa'n uwwancham aa'llakkamo.

³⁹Mashka'oomim Waa'i ‹Uwwoommo› yu neeyyat ixxi kollonne weeshu keenina ayyenam ki'nnuwwina, ki'nnuwwi oosinaa Waa'i eroommiinsi qee'llito'i keeninaa hundinatteme» yukko.

⁴⁰Odim lobakat mulli woshshinnem qoxxisaa kuraa «Ka boqqi qaranchiinsi ki'nnuwwi gaga gatixxehe» yaa sogukko.

⁴¹Ee bikkina ee balla sas kuma ikkamqax manni ixxi woshsha aa'lla'a xammaqanta'a amma'nnaa'n xigonne exxito'o.

⁴²Oo exxito'i keenim Yesuus asse'u keen losissam losishshina, mateeyyoomina, mateeyyoo'm ichchinaa Waa'a uunximminaa ixxuwwi gaga higissa'a uwwito'o.

⁴³Lobakat maalalsiisoo luwwii agannii Yesuus asse'u kee'n kollinne iham hee'u bikkina manni hundim baddukko.

⁴⁴Amma'nnito'i keen hundim mateeyyoominne hee'llam hee'llo'o. Ixxuwwina yoo luwwi hundim maqi'llan hee'ukko.

⁴⁵Ixxuwwina yoo luwwa hundam biteessu'uuyyi ayyenam hasisoo'isinne baxxansitam hee'llo'o.

⁴⁶Odim balli hundam mat ikka'a Keesammi Mine mattam hee'llo'o. Ixxuwwi minneewwannem hurbaata danaam wodaninne liirantu'uuyyi mat ikka'a ittam hee'llo'o.

⁴⁷Waa'am galaxxitam hee'llo'o. Odim manni hundim ixxuwwi er manni ikko'isa wocam hee'ukko. Moollannim amma'nnaa gatu keeno ballina ballina ixxuwwanne edam hee'ukko.