Read Hadiyya Asse'amaa'n Baxo 20 Bible Online

Asse'amaa'n Baxo 20 - Hadiyya bible

Asse'amaa'n Baxo 20

¹Hambalaachchi uullaa lasage Phaawuloos manna asse'aa amma'nnaano mat issaa weeshisaa ixxuwwa qoxxisaa sogukko. Ee lasage «Xummanne hee'llehe» yaa ixxuwwiinsi annanni ihaa Maqeedoona marukko.

²Ee Maqeedoonanne yoo amma'nnaanom lobakata qoxxisaa sogaa lasage Giriika marukko.

³Ixxim ee uullanne sas agana afuuraa lasage Sooriya markabinne mareena sawwaakkoohaannonne Ayihuxxi manni ixxonne manna ki'isiisso'i bikkina Maqeedoo'n uullinne aa'aa daba'lleena murte'ukko.

⁴Ixxo geegeesso'i keenim Beeriy beero'i Phaaroos beet Suphaaxiroos, Tasalonqe'i beero'i manniinsi Arisxirookoosii Sikondoosii, Darbe'i beero'i Gaayoos, Issiya uulliinsim Ximootoos, Tiikiiqoosii Xarfimoosii hee'llo'o.

⁵Oo keenim higga'a matta'a Xiiroo'aadanne neese egetto'o.

⁶Ihukkaarem neese Qorosho'i uguxxi lasage Filiphphisiyusiinsi ki'nnaa markabinne onti balla taakke'nnaa lasage ixxuwwi hee'llo'i Xiiroo'aada amfaa ee beyyonne lamar balla afuullummo.

⁷Saantina luxxi ayyaa'm[30] hiimonne Moollanni hurbaata inteena wixxinaammoohaannonne Phaawuloos sooxxi dari'n mareena sawwaa hee'u bikkina luxxi baqit afeebe'e lobakata qeeraa'l woshsha ixxuwwina wocukko.

⁸Ee neese wixxinaa hee'nnummi saxxi fooqanne dut sha'uwwi aphpham hee'ukko.

⁹Ee ammane Eewxeekiisa yakkam mat woraadichchi maskootanne afuuraa hee'ukko. Ixxim Phaawuloos woshsha qeeraa'llisu bikkina ee afuuru beyyonnem qallaa diriiraa hee'ukko. Ee bikkina ee afuuraa hee'u saxxi fooqiinsi aad ubukkaare manni geeraa maraa ki'isaa moo'oohaare lehaa hee'ukko.

¹⁰Ihukkaarem Phaawuloos dillaa maraa heeshaa ki'isaa qaaphphaa «Ixxek foor yookko! Muggitakkotte» yukko.

¹¹Ee lasage Phaawuloos daba'llaa fooqa firaa amma'nnaaninne maqirem Moollanni hurbaataa mateeyyoo'm hurbaataa itaa uulli soodeebe'e qeeraa'l atoorachcha atooraraa ixxuwwiinsi annanni ihaa marukko.

¹²Ixxuwwim ee lehiinsi gatu woraadichcho mine amadda'a matta'a lobakata liiranto'o.

¹³Phaawuloos lokkinne mareena hasaa «Ki'nnuwwi higgakka'a mallehe» yaa neese ijaajaa hee'u bikkina «Ixxo aa'nnoommo» yinaa markabanne aangaa Asoos beero'o hingaa mallummo.

¹⁴Shaashshiqqi Uguxxi ontayyi ayyaamonne ihoo ugudina xansiisukkis hundinnem Phaawuloos Yerusaaleema afeena gaaggaabaa hee'u bikkina Issiyanne afuureena hasukkoyyo. Ee bikkina Phaawuloosinne ee Asoosanne edammaa lasage Efeesoo'n beero'onne uulloo'n higaa maroo markabanne aangaa ixxennem Miixiiliinii yakkam beero'o mallummo. Ee beyyiinsim dambalaqa fillaa la'm balla Kiyoosa yakkam uulli illagenne yoo beyyo amfummo. Odim saxxi ballina Saamoosa yakkam uulla amfummo. Soo'l ballinam Miiliixa beero'o amfummo.

¹⁷Phaawuloos Miiliixiinsi manna asse'aa Efeesoonanne yo'i amma'nnaa'n lommanna ixxi beyyo waattamisina weeshisukko.

¹⁸Oo lommannim ixxi beyyo waatta'a lasage Phaawuloos «An ka Issiya yakkam uulla i lokkinne luxxeka hancaacummi ayyaamiinsi ki'isaa kaballi afeebe'e ki'nnuwwi lambe'enne hinkid hee'umda'e ki'nnuwwi gagim laqqakkamo.

¹⁹Ayihuxxi manni eesenne ki'lla'a afisso'i hawwi hundannem lobakata hawwummuuyyii indiidda dunummuuyyii Moollannina maashaalloominne awwaadummisa ki'nnuwwi laqqakkamo.

²⁰An ki'nnuwwi wixxitakkam beyyuwwannee ki'nnuwwi minneewwannee ki'nnuwwina awwaadoo luwwa losisummoo kurummoo bagaan ki'nnuwwina awwaadoo luwwika maham gatisummoyyo.

²¹Oohim Ayihudii mulli minaadabii baaxiilo biira yimminne Waa'i kollonne daba'llita'a Moollanni Yesuus Kiristoosanne amma'nnitamisina kuraammo.

²²Oono'o, kabadem an Keesammi Ayyaan ki'isukkaare Yerusaaleema maroommuulla. Ee beyyonnem eesenne mah afooda'e la'oommoyyo.

²³Ihona bagaan karatii hawwii eesenne afoo'isa Keesammi Ayyaan afummi beero'i hundannem iina kuroolla.

²⁴ Ihukkaarem an hasoommok Waa'i issu eroommi mishiraachchi sagara kurimminne iina Moollanni Yesuus uwwu baxo guulleenatte ihu bikkina i gaga mahannem xigoommoyyo.

²⁵«Kaballi afeebe'e ki'nnuwwi lambe'enne daba'llamummuuyyii Waa'i adilla'n bikkina kurummuuyyii hee'ummi eese ka lasage ki'nnuwwiinsi matim hore'em moo'oobee'isa an la'oommo.

²⁶An ki'nnuwwina Waa'i sawwixxeka maham gatisoo'n kurummi bikkina ki'nnuwwi xiigiinsi muccur ihummisa ki'nnuwwi kaballa laqqehe.

²⁸Waa'i ixxi Beet xiiginne ixxi gagina bitaa'u amma'nnaano allaattakkamisina Keesammi Ayyaan allaaraan issaa ki'nnuwwa doo'llu bikkina ee allaachchaa ki'nnuwwi gagaa qoxxitakka'a egellehe.

²⁹An annanni ihaa maraa lasage ee allaachchina qishixxitambee'i oro'i'nnoo'i mogaalluwwi keen ki'nnuwwi lambe'enne aaggamisa an la'oommo.

³⁰Ee'isam mat mat keen ki'nnuwwi lambe'iinsi ki'lla'a hanqa boqqissu'uuyyi dut amma'nnaano ixxuwwi kollonne dabattamo.

³¹Ee bikkina an ki'nnuwwa annannichchom sas hiincho hiimoo ballaa muroo'n indiidda dunummuuyyi sogummisa sawwitakku'uuyyi qoxxehe.

³²«Kabadem an ki'nnuwwa qoxxiseenaa ixxi doo'llu keen hundinam uwwoo gulumma ki'nnuwwinam uwweenaa xanoo Waa'inaa ixxi eroommi sagarinaa yabo uwwaammo.

³³An ki'nnuwwiinsi ayyeensim bir ihukko te'im worqi ihukko te'im eddechchi ihukko maham heele'ummoyyo.

³⁴I gaginatte ihukko iinninne yo'i i beshina hasisoo luwwi hundam i anginne baxummuuyyi hara'mmam hee'ummisa ki'nnuwwim laqqakkamo.

³⁵‹Aa'oohaanniinsi uwwookkok maasse'amaakkoohane› yoo Moollanni Yesuus sagara sawwitakku'uuyyi anginne baxxakka'a hoogu keeno hara'mmitakkamisa an dut googinne ki'nnuwwina moo'isaammo» yukko.

³⁶Phaawuloos eekka wocaa guullaa ixxuwwi hundinnem guruphphaa Waa'a uunxaa lasage

³⁷hundim wi'llitu'uuyyi Phaawuloosa qaaphphita'a suunqito'o.

³⁸Lophphita'ahim kichche'llo'ok ixxuwwi od ixxo moo'lleena xantambee'isa kuru bikkinatte. Ee lasage ixxo markabanne aagoo beyyi afeebe'e geegeesso'o.