Read Hadiyya Asse'amaa'n Baxo 21 Bible Online

Asse'amaa'n Baxo 21 - Hadiyya bible

Asse'amaa'n Baxo 21

¹Efeesoo'n amma'nnaa'n lommanna «Xummanne hee'llehe» yinaa ixxuwwiinsi annanninkaa markabanne aangaa mallaa Qosa amfummo. Ee beyyiinsim la'm ballina Oroodoosa mallummo. Odim ee beyyiinsim Phaaxir beero'o mallaa amfummo.

²Ee Phaaxiriinsi Finqe'e maroo markaba siindaa ee markabanne aangaa mallummo.

³Qoophphiroosa amfeena hincinaa lasage ee Qoophphiroosa qeddi kollonne gatinsaa Sooriyanne yoo Xiiroos beero'onne markabanne iyyiisakko'i mu'uta dilliisakkam bikkina ee Xiiroosanne dillinummo.

⁴Ee beyyonnem amma'nnaano hansaa siindaa ixxuwwinne maqirem lamar balla afuullummo. Ixxuwwa Keesammi Ayyaan wocisukkaare Phaawuloosina «Yerusaaleema mattitte» yito'o.

⁵Ihukkaarem neese ixxuwwiinsi annanni inkaa malloommi ayyaam afukkaare ixxuwwi, ixxuwwi meentii ixxuwwi oosii hundim beero'iinsi fissita'a dambalaq tochchi afeebe'e geegeesso'aare ee beyyonnem hundim guruphphinaa Waa'a uunxinaa lasage hundichchim «Xumma hee'llehe» yaqqammaa

⁶markabanne aangaa mallummo. Ixxuwwim ixxuwwi mine daba'llita'a elle'llo'o.

⁷Ee Xiiroosiinsi ki'nnaa dambalaq googo guullinaa lasage Pheexeleemaayisa yakkam beero'o amfaa ee beyyonnem amma'nnaano xummaatinsaa ixxuwwinne maqirem mat ayyaamo honsummo.

⁸ Ee beyyiinsim la'm balla ki'nnaa Qiisaariya mallummo. Ee beyyonnem amma'nnaanina awwaaddamisina doo'llanto'i lamarem manniinsim mat hee'u Filiphphoos ee Qiisaariyanne hee'ukko. Neesem ixxi minenne usheexxinummo. Ixxim mishiraachchi sagara kuraanchi hee'ukko.

⁹Hiraago kuttam soor baajaam landim ixxena hee'llo'o.

¹⁰ Ee beyyonne mat qax balla afuullaammoohaannonne Agaaboosa yakkam manchi Yihuxxi uulliinsi waarukko. Ixxim hiraagaanchi hee'ukko.

¹¹Ixxi ni beyyo waaraa Phaawuloos lade'oo sabbata aa'aa angaa lokkoo ka'llaa «Keesammi Ayyaan ‹Ka sabbaxxi annichcho Yerusaaleemanne hee'llam Ayihuxxi manni ka'isa katta'a mulli minaadabina higissa'a uwwitamo› yoolla» yukko.

¹²Eekka macceensummi ammanenne neesee ee beyyonne hee'llo'i mulli mannii Phaawuloos iim Yerusaaleema maroobee'isina uunxinummo.

¹³Ihukkaarem Phaawuloos «Mahina ikkakkamisa? Wi'llitakku'uuyyi i wodano mahina hoogissakkamuulla? Anette ihummaara'i Yerusaaleemanne i Moollanni Yesuus bikkina karanchi xale'i ihoo'n leheenam gudaammoohane» yukko.

¹⁴Ixxi ni sogitano aa'imma sabukkaare neesem «Waa'i yukkok ihona» yinaa ullummo.

¹⁵Mat qax balliinsi lasage mu'uta gudixxinaa Yerusaaleema malleena ki'nnummo.

¹⁶Yerusaaleema amfummi ammanenne Qiisaariyanne hee'llo'i amma'nnaa'nnek niinninne maqire matto'i keen Qoophphiroosanne luxxeka amma'nnito'i keeniinsi mat hee'u Minaasoon minenne usheexxinona massito'o.

¹⁷Yerusaaleemanne hee'llo'i amma'nnaanim neese liiranchinne aa'llo'o.

¹⁸La'm balla Phaawuloos niinninnem Yaaqooba moo'eena maraakkoohaannonne amma'nnaa'n lommanni hundim eekke'e hee'llo'o.

¹⁹Phaawuloos ixxuwwa xummaatisaa lasage Waa'i ixxenne ihaa mulli minaadaphphi lambe'enne issu luwwi hundam ogorinne kurukko.

²⁰Ixxuwwim eekka ixxeensi macceesso'i ammanenne Waa'a galaxxito'o. Ee lasage Phaawuloosina «Niyyabbaayyo, Ayihuxxi manniinsi mee'i kum amma'nnitoda'e ixxuwwi hundim ixxuwwi Seerina hinkaa'nna to'achchitamda'e at laqqootto.

²¹Ixxuwwinam ‹Phaawuloos «Mulli minaadaphphi uullanne yo'i Ayihuxxi manni hundim Muse'i Seera egerimmi, ooso ballachchimmii anno'i losanom egerimmii hasisooyyo» yaa losisoolla› yakka'a kurakko'ookko.

²²Hanqinam at waattittisa ixxuwwi ma'isinnem macceessoo'n gattambee'i bikkina maha issimmi erane?

²³ Ee bikkina kaba at ka'isa isse. Uga'a aaggo'oo soor manchi niinninne yo'o.

²⁴At ee manninne mattaa ixxuwwinne maqirem ki gaga muccusse; ixxuwwi kitimina miqqam luwwam at miqe. Ee lasage ixxuwwi horoore hogoossaqqitamo. Ki gagim seera egettoohan ikkittisaa ixxuwwi kutto'i woshshi hundim qophphan ihukkisaa eehanninne laqqamo.

²⁵ Ihukkaarem mulli minaadabiinsi amma'nnito'i keenina qophpha'n waa'ina kitimamu diinaxxi maara itimma, xiiga itimma, bayita itimmaa saa'immaa uttamisina woshsha mullaa assi kitaaba asse'nnaammo» yito'o.

²⁶Ee lasage Phaawuloos la'm ballina ee manninne maqirem ixxi gaga muccussaqqaa hinkaa'n balli afeebe'e muccurakkamda'ee annannichchim kitima hinki balla hincaa'llamda'ee qeessichchina kureena Keesammi Mine marukko.

²⁷Ixxuwwim muccuttam lamarem ballim beeddeena ihaakkoohaannonne Issiyiinsi waatto'oo Ayihuxxi manni Phaawuloos Keesammi Minenne yoo'isa moo'lla'a manni hundam ixxonne ki'issa'a ixxo amadda'a

²⁸«Isra'ee'l minaadaba, niina hara'mmehe! Beyyi hundannem ni minaadaba, ni Seeraa ka keesammi beyyoo manni saboo'isa losisookkok ka mancho. Odim eehanniinsim higaa kaba ka keesammi beyyo Giriik manna amadaa aagaa Keesammi Mine haashaassaakko» yita'a laatto'o.

²⁹ Eehid yito'i mashka'im kanniinsi illageen Xarfimoosa yakkam Efeesoo'n mancho ixxenne maqire beero'onne moo'lla'a hee'llo'i bikkina Phaawuloos Xarfimoosa amadaa Keesammi Mine waarukkoka labissa'atetti hee'ukko.

³⁰Ee lasage beero'i minaadab hundim mat ikka'a geetta'a matta'a Phaawuloosa amadda'a gosaassu'uuyyi Keesammi Miniinsi fissita'a ee ammanem gooccuwwa xuffo'o.

³¹Ixxom shiteena amaddo'i ammanenne «Yerusaalee'm beero'i hundannem hambalaachchi firaakko» yakkam woshshi Oroo'm gaadaa'n ijaajaanchina afukko.

³²Ixxim gaadaanoo xibbi halaqquwwaa amadaa ee hambalaachcha ki'isu kee'n beyyo qaqqisaa geerukkuuyyi dillukko. Ixxuwwim ee ijaajaanchoo gaadaanoo moo'llo'i ammanenne Phaawuloosa aphphisimma utto'o.

³³Oo ijaajaanchim afukkisam Phaawuloosa amadaa lam chimchiminne karakkamisina ijaajukko. Odim ee lasage «Ku manchi ayyette? Issu luwdu maruchcho?» yaa minaadaba xa'mmukko.

³⁴Ee beyyonne wixxu mannik kollii mat luwwa kolli odim mullekam kuttu'uuyyi hambalaachchitam hee'llo'i bikkina hanqo'i woshsha la'eena xanukkoyyo. Ee bikkina gaadaan garoo beyyo Phaawuloosa massakkamisina ijaajukko.

³⁵Minaadab lobakat quunqinne ki'aa hee'u bikkina gaadaan garoo beyyi gardabba affo'i ammanenne gaadaan Phaawuloosa iyyito'o.

³⁶Ixxonne ki'aa hee'u mannim «Ixxo shi'llehe!» yaa shuurukkuuyyi awwonam hee'ukko.

³⁷Gaadaan Wiidda'n beyyo Phaawuloosa agisseena ikko'i ammanenne Phaawuloos ee ijaajaanchina «An kiina mat luchcho woconnihe?» yaa xa'mmukko. Oo ijaajaanchim «Giriik suume laqqoohanennihe?

³⁸At ka abbis ammanenne bangujjaata ki'issaa manna shu kee'nneka soor kum manna amaddaa udma'a aagti Gibxi uulli manchoyyonnihe?» yaa xa'mmukko.

³⁹Phaawuloosim «An Kilqe'enne yoo hundiinsi lob Xarsees beero'onne qaramaa ee beero'onnem hee'oommi Ayihudichcho. Hay ka mannina mat luwwa wocoommo» yaa uunxukko.

⁴⁰Oo ijaajaanchim «Woce» yaa lasage Phaawuloos gardabbanne uullaa manni cawwoo'isina anginne kurukkaare manni cawwukko.