Read Hadiyya Asse'amaa'n Baxo 22 Bible Online

Asse'amaa'n Baxo 22 - Hadiyya bible

Asse'amaa'n Baxo 22

¹Phaawuloosim Ibro'isinne «Iyyanno'oo iyyabbaayyuwwa, kaba eese kasassakko'i woshshisina an dabaroommi woshsha macceessehe» yaa wocimma asheerukko.

²Phaawuloos Ibro'isinne wocukkuuyyi macceesso'i ammanenne hore'em cawwito'o.

³ Phaawuloosim ixxuwwina «An Kilqe'enne yoo Xarsees beero'onne qaramaammoo Ayihudichcho; ihona bagaan li'ummok ka Yerusaalee'm beero'onnette ihaa eese losisukkokim Gamaaliyaalatte hee'ukko. Odim niyyanno'i seeram mahim gatoobee'isa qoxxaa losaa kaballa ki'nnuwwi hundim to'achchitakkamisam Waa'ina to'achchoomman hee'ummo.

⁴ Moollanni googo awwontam goonaa meentoo amadaa karaxxi minenne aagisaa sheena hawwisam hee'ummo.

⁵Ku an wocoommi woshshi qophphan ihubee'isa hundiinsi lob qeessichchii dummichchi daannuwwii hundim kutteena xantamo. Eehanniinsim Damaasqo'i beero'o maraa ee beero'onne yo'i amma'nnaano amadaa woroommaare Yerusaaleemanne karantamisinaa guzumo'antamisinaa kitaabamu assi kitaaba aa'ummok ka ixxuwwiinsetteme.

⁶«An Damaasqo'i beero'o marummuuyyi afeena ihaammoohaannonne balli kolli ammanenne dangonnem iimaniinsi malaayyaam caakki i kululleetanne caakkukko.

⁷An uullanne ubaa yoommaannonne ‹Saawula! Saawula! Eese mahina hawwissoolla?› yoo sagara macceesummo.

⁸Anim ‹I Moollanna! At ayyette?› yaa xa'mmummo. Ixxim iina ‹An at hawwissoo Naazireexxi Yesuusatte› yukko.

⁹Iinninne maqire hee'llo'i keen caakka moo'llo'o bagaan iinninne mayyaa wocoolda'e macceesso'oyyo.

¹⁰Anim ixxena ‹I Moollanna! An maha isso?› yaa xa'mmummo. Ixxim iina ‹Ki'llaa Damaasqo'i beero'o mare. At issitona gudisummi luwwi hundam eekke'e kurakkamo› yukko.

¹¹Ee caakki belellaaxxi lophphimmiinsi ki'ukkok i illi qooqu bikkina iinninne maqire hee'llo'i keen masakkita'a Damaasqo'o afisso'o.

¹²«Ee beero'onnem Waa'ina garaakkoo seeram erisa egeroo Hanaaniya yakkam manchi hee'ukko. Ixxom ee beero'onne hee'llam Ayihuxxi manni hundim lobakata lonsitam hee'llo'o.

¹³Ixxim waaraa i gadanonne uullaa ‹Iyyabbaayyi Saawula, ki illi fooqihona!› yukkaare ee ammanchom i illi fooqaa ixxo moo'ummo.

¹⁴Ixxim iina ‹At ixxi doo'lla laqqoo'isina, ixxeka Xummaanchi awwaadaancho moo'lloo'isinaa ixxi wocoo woshsha macceessoo'isinaa niyyanno'i Waa'i keese doo'llaakko.

¹⁵Doo'llukkokim at ixxi bikkina moo'llittokaa macceessittokaa manni hundinam kuttoo'isinatte.

¹⁶Kaba at maha egettaate? Ki'llaa ixxi summa weeshshittuuyyi xammaqantaa ki baaxiiliinsi muccure› yaa kurukko» yukko.

¹⁷«An Yerusaaleema daba'llaa maraa Keesammi Minenne Waa'a uunxummuuyyi hee'onam kaalti moo'amukko.

¹⁸Ee kaaltannem Moollanni iina ‹At i bikkina kuttoottoka ixxuwwi macceessambee'i bikkina Yerusaaleemiinsi qaqqissaa fire› yukkuuyyi moo'ummo.

¹⁹Anim ixxena ‹Moollanna! An keese amma'nnu keeno wixxixxi minneewwa maraa amadaa karummisaa ganummisaa ixxuwwi gagim laqqamo.

²⁰ Kiina naqqasaanchi hee'u Isxifaanoosa shakko'i ammane an i gagim ixxo shimmanne iittamaa hee'ummi bikkina ee beyyonne uullaa ixxo shoo kee'nneka eddechcha egeraa hee'ummo› yaa dabarummo.

²¹Ixxim iina ‹An keese mulli minaadaphphi beyyo asse'eenatte ihu bikkina Yerusaaleemiinsi fittaa mare› yaa kurukko» yukko.

²²Eehid yaa woceebe'i afeebe'e Phaawuloos woshsha ixxuwwi macceessam hee'llo'o. Ihukkaarem eekka macceessa'a lasage «Ixxi ka uullanne hee'eena laboobee'i mancho; shitakka'a hoollehe!» yitu'uuyyi sagara iimaa'lla'a shuutto'o.

²³Ixxuwwim nadadda'a shuuttu'uuyyi edde'llo'i eddechcha binbinnaa'llu'uuyyi darabbamii diram hafachchanne binnaa'llamii hee'llo'o.

²⁴Ijaajaanchim gaadaan gattam beyyo Phaawuloosa massita'a ixxo manni sabaa shuuroo mashka'a gantu'uuyyi saarayyita'a laqqamisina gaadaano ijaajukko.

²⁵Ihukkaarem ixxuwwi usinne katta'a ganteena guddo'oohaannonne Phaawuloos ixxi gadanonne uullaa hee'u xibbi halaqichchina «Mat Oroomekkichcho oogatamoo'nnim ka'isam karimmii ganimmii hanqannihe?» yukko.

²⁶Oo xibbi halaqichchim eekka Phaawuloosiinsi macceesu ammanenne ijaajaanchi beyyo maraa «Ku manchi Oroomekkichchi ihu bikkina at ixxo maha issiteenatte?» yaa xa'mmukko.

²⁷Ee bikkina oo ijaajaanchim Phaawuloos beyyo maraa «Hino'o kure, at Oroomekkichchonnihe?» yaa xa'mmukko. Phaawuloosim «Eeyya» yaa dabarukko.

²⁸Oo ijaajaanchim «An Oroomekkichchi iheena xanummok lobakat diinate miqaatette» yukkaare Phaawuloos «An siixxummok qaranchinnetteme» yukko.

²⁹Ee bikkina ixxo saarayyita'a xa'mmiteena gudda'a hee'llo'i keen ee ammanchom Phaawuloosiinsi annanni ikka'a matto'o. Oo ijaajaanchi Phaawuloosa kassiisaa hee'u bikkina Phaawuloos Oroomekkichchi ihukkisa la'u ammanenne lobakata baddukko.

³⁰Oo ijaajaanchim Ayihuxxi manni Phaawuloosa kasasso'i luwwika hanqi woshsha la'eena hasu bikkina la'm balla daram qeessa awwonsaanii dummichchi daannuwwii hundim wixxitamisina ijaajaa Phaawuloosa tiraa woraa ixxuwwi illagenne uullisukko.