Read Hadiyya Asse'amaa'n Baxo 23 Bible Online

Asse'amaa'n Baxo 23 - Hadiyya bible

Asse'amaa'n Baxo 23

¹Phaawuloos dummichchi daannuwwa xuxxaa moo'aa «Iyyabbaayyuwwa, an Waa'i illagenne kaballi afeebe'em muccura» yukkaare

²ee ammane hundiinsi lob qeessichchi hee'u Hanaaniy ixxi gadanonne uullu keenina «Kannika suume aphphissehe!» yaa ijaajukko.

³ Phaawuloosim ee hundiinsi lob qeessichchina «At ka boorjo'o labakko'i gortanna labboohaanno![31] Waa'i keese aphphisookko! At Seer yoo'isanne oogatteena afuuttaa hee'llittuuyyi Seera ginditaa eese ‹Aphphissehe› yitoohonnihe?» yukko.

⁴Phaawuloos gadanonne uullita'a hee'llo'i keen «Waa'i doo'llaakkoo hundiinsi lob qeessichcho duuntoohonnihe?» yito'o.

⁵ Phaawuloosim «Iyyabbaayyuwwa, hundiinsi lob qeessichchi ihukkisa an la'ummoyyo. Waa'i sagarim ‹Minaadaba gassaanchonne jora woccitte› yaakko» yukko.

⁶ Phaawuloos ee dummichchanne hee'llo'i mannik kollii Saduuqaawe'i kollii odim Farisaawe'i ikko'isa la'u ammanenne «Iyyabbaayyuwwa, an Farisaawe'iinsi qaramaammoo Farisaawekkichcho. Kaba an oogato'ina hincummok ‹Lehiinsi kichchi yookko› yaa amma'nnummi bikkinatte» yaa shuuraa wocukko.

⁷Ixxi eekka wocukkisam Farisaawe'uwwaannonnee Saduuqaawe'i lambe'ennee woc ki'aa dummichchi lam ihukko.

⁸ Mashka'oomim Saduuqaawe'i «Lehiinsi ki'immi, Waa'i asse'amaanii ayyaanii bee'e» yitam hee'llo'o. Ihukkaarem Farisaawe'i oo hundim yoo'isa amma'nnitam keen hee'llo'o.

⁹Ee ammanenne malaayyaam woc firaa Farisaawe'i kolli manniinsi Seera losisaa'nnek mat mat keen shoottita'a uullita'a «Ka manchonne matem bi'ishsham siindummoyyo. Ixxena ayyaan te'im Waa'i asse'amaan kuraatette ihookko» yita'a qoxxaallisa fitanto'o.

¹⁰Woc lophphukkuuyyi maru ammanenne Phaawuloosa aphphissa'a shitamaannina gaadaa'n ijaajaanchi baddaa gaadaanina «Mattakka'a Phaawuloosa ixxuwwi lambe'iinsi malaayyinne fissitakka'a gaadaa'n qash woro massehe» yaa ijaajukko.

¹¹La'm balli hiimonne Phaawuloos gadanonne Moollanni Yesuus uullaa «Phaawuloosa, baddititte! Ka Yerusaalee'm beero'onne i bikkina woccittisam Oroo'm beero'onnem i bikkina woccootto» yukko.

¹²Uulli soodaa lasage Ayihuxxi mannik mat qax wixxita'a «Phaawuloosa shinoo'n maham intoommoyyoo angoommoyyoo» yita'a hide'anto'o.

¹³Ee woshshanne mat ikka'a iittanto'i keen soriinsi lophphitam manni hee'llo'o.

¹⁴Ixxuwwim qeessi awwonsaa'n beyyoo lommanni beyyoo matta'a «Neese ‹Phaawuloosa shinoo'n hurbaata suumennem amandoommoyyo› yinaa hide'nnaammo.

¹⁵Ee bikkina dummichchi lommanninne maqirem ixxi woshsha lobakata saarayyitakka'a laqqakkeena hassakko'an issitakka'a Phaawuloosa ki'nnuwwi beyyo asse'oo'isina ijaajaanchi beyyo asse'llehe. Oo ijaajaanchi asse'oo ammane Phaawuloos ki'nnuwwi beyyo affoo'nnim neese googonnem shineena gundaammo» yita'a kutto'o.

¹⁶Ee woshsha Phaawuloosina aayyi beet macceesaa gaadaa'n qash woro maraa Phaawuloosina kurukko.

¹⁷Kuraa lasage Phaawuloosim xibbi halaqquwwiinsi mato weeshaa «Ku beet ijaajaanchina kuroo woshshi yoo bikkina ixxi beyyo hincaa'e» yukko.

¹⁸Ee bikkina oo xibbi halaqichchi ee beeto ijaajaanchi beyyo awwonsaa massaa «Karamaa yoo Phaawuloos eese ixxi beyyo weeshaa ‹Ku beet ijaajaanchina kuroo luwwi yoo bikkina ixxi beyyo masse› yaakko» yaa kurukko.

¹⁹Oo ijaajaanchim ee beetika anga amadaa tochchonne fissaa «At iina kutteena hassitti luwwi maruchcho?» yaa xa'mmukko.

²⁰Oo beetim «Soriinsi lophphitam manni ‹Phaawuloosa shinoo'n maham intoommoyyoo angoommoyyoo› yita'a hide'anta'a gudda'a at asse'lleebe'e egetto'i bikkina Ayihuxxi manni Phaawuloosika woshsha lobakata saarayyita'a moo'llamoka labba'a soodo at Phaawuloosa dummichchi daannuwwi beyyo asse'llaa hincaa'lloo'isina keese xa'mmiteenatte. Ee bikkina at ixxuwwina ha'yyititte» yaa kurukko.

²²Ee lasage oo ijaajaanchim «Ka woshsha eesenne kuttittisa ayyenam kuttitte» yaa ee beeto maroo'isa issukko.

²³Oo beet maraa lasage ijaajaanchi xibbi halaqquwwika lamo weeshaa «Hii'mmaannonne sas sa'aatanne Qiisaariya mattamisina gaadaanika bisa'a lade'u kee'nneka lam xibbee lamarayyi faradaanoo lam xibbi bagadaanoo gudissehe.

²⁴Odim Phaawuloos saa'llaa gassaanchi Filiksi beyyo maroo gammaamo gudissakka'a xumminne massitakka'a afissehe» yukko.

²⁵Oo ijaajaanchim

²⁶«Lombi yoo gassaanchi Filiksina an Qalaawdiwoos Lusiyoos xummaato hincaa'oommuulla.

²⁷Ka mancho Ayihuxxi manni shiteena amadda'a hee'llo'o. Ihukkaarem an gaadaaninne maqirem afaa ixxi Oroomekkichchi ihukkisa la'aa ixxuwwiinsi gatisaammo.

²⁸Ixxo mahina kasassoda'e la'eena hasaa hee'ummi bikkina ixxuwwi dummichchi daannuwwi beyyo massaa hee'ummo.

²⁹Ixxuwwi see'l bikkina ixxo kasasso'isa siidummo bagaan ixxo shisiisoo te'im kassiisoo luwwika ixxonne maham siidummoyyo.

³⁰Ixxo shiteena ki'llo'isa macceesummi ammanenne kasassam keenim ki'nnenne kasassamisina an ixxuwwina kuraa ki'n beyyo asse'aammo» yoo assi kitaaba kitaabaa asse'ukko.

³¹Oo gaadaanim ijaajaanchi kurukkisinne Phaawuloosa hiimonne massita'a Antiphaaxira yakkam beyyo afisso'o.

³²La'm balla Phaawuloosa faradaan massitona lokkaan utta'a gattam beyyo daba'llito'o.

³³Oo faradaanim Qiisaariya affa'a lasage gassaanchina assi kitaaba uwwita'a Phaawuloosa ixxi illagenne hincaa'llo'o.

³⁴Gassaanchim assi kitaaba qananaa'aa lasage Phaawuloosa «At hinka'i uulli mancho?» yaa xa'mmaa Kilqe'i uulli manchi ihukkisa la'u ammanenne

³⁵«Keese kasassam keen waatta'a affa'a lasage ki woshsha moo'oommo» yaa adil Heeroodis baxisu minenne Phaawuloosa egettamisina gaadaano ijaajukko.