Read Hadiyya Asse'amaa'n Baxo 24 Bible Online

Asse'amaa'n Baxo 24 - Hadiyya bible

Asse'amaa'n Baxo 24

¹Onti balliinsi lasage hundiinsi lob qeessichchi Hanaaniy mat qax lommannaa Xarxuloosa yakkam hayyo'i manchoo amadaa Qiisaariya dillukko. Ixxuwwim gassaanchi Filiksi beyyo hincita'a waatto'i woshsha kutto'o.

²Filiksim Phaawuloosa weeshisaa woraa lasage Xarxuloos «Lophphitakko'oo Filiksa, ki'n gassi doollenne neese lobakat xummaa danaam luwwaa siixxinaammo.

³Ee ki'n issitakko'i eroommi hundam neese yoommine'i beyyi hundannem duuha'i hundinnem aa'nnoommuullak lobakat liiranchinnette.

⁴Ki'nne hawwisoobee'i hoffi woshshichchom wocummuuyyi erisa macceessakkamisina an uunxoommo.

⁵Kuk uulli hundannem yoo Ayihuxxi minaadaba hambalaachchukkuuyyii ee huushisaanchi Naazireexxi Yesuusa awwontam keeno awwonsukkuuyyii siindaammoo jor mancho.

⁶Eehanniinsi odim Keesammi Mine haashaasseena ihonam siindaa amandaa[32] ni see'llisanne ooganteena hansaa hee'nnummo.

⁷Ihukkaarem gaadaa'n ijaajaanchi Lusiyoos lobakat malaayyinne waaraa niinniinsi hooraa massaa

⁸waallaa ki'nnenne kasansoommisina ijaajukko. Neese kasansummi woshshi hanqo'an ihukkisa laqqakkeena hassakkolas ixxo qoxxissakka'a saarayyimminne luwwi hundam laqqakkeena xantakkamo» yaa kasasimma asheerukko.

⁹Ayihuxxi manni hundim «Oo Xarxuloos wocu woshshi hundim hanqame» yita'a bakkiisso'o.

¹⁰Ee lasage Phaawuloos wocoo'isina gassaanchi anginne moo'isukkaare Phaawuloosim «Ki'n ka minaadabina lobakat hiinchiinsi ki'isaa gassaanchi ikkakko'isa la'ummi bikkina ixxuwwi eese kasasso'i woshshina liiranchinne dabaroommo.

¹¹An Waa'ina otosseena Yerusaaleema marummaanniinsi tommiinsii lam balliinsii lophphoobee'an ihukkisa laqqakkeena xantakkamo.

¹²Ixxuwwim an Keesammi Minennettem ihukko, wixxixxi minneewwannettem ihukko, beero'onnettem ihukko mat manchinnem wocamummuuyyi te'im manna hambalaachchummuuyyi eese amaddo'oyyo.

¹³Kabadem ixxuwwi eese kasasso'i luwwanne mahannem neegatteena xantamoyyo.

¹⁴Ihukkaarem an ka ixxuwwi ‹Qophpha'n googo› yitamoka Seerii hiraagaa'n kitaabbuwwii yookkoka hundam amma'nnaa niyyanno'i Waa'ina otossoomman ihummisa ki'nnena caakkisaa kureena hasoommo.

¹⁵Odim ixxuwwi amma'nnitamisam er keenoo jor keenoo Waa'i lehiinsi ki'isoo'isa anim amma'nnoommo.

¹⁶Ee bikkina an hundi ammanem Waa'i illagennee manni illagennee i tiir acceeqasoobee'i heechcha hee'eena yakoommo.

¹⁷ «An Yerusaaleemiinsi firummaanniinsi lobakat hiinchiinsi lasage kiti'm diinatee i shumo'ina tasbo'oo amadaa Yerusaaleema daba'llaa waarummo.

¹⁸Ixxuwwi eese amaddo'ok an Seer ijaajoo'isinne Keesammi Minenne i gaga muccussaqqaa amadaa waarummi luwwa uwwonatteme bagaan manna hambalaachchummaareyyoo Seera gindummaareyyo.

¹⁹Ihukkaarem Keesammi Minenne an hee'onam Issiyiinsi waatta'a eekke'enne hee'llo'i mat mat Ayihuxxi manni eese kasassam luwwi yoolas keyye waatta'a ki'n illagenne kasassona.

²⁰An ixxuwwi lambe'enne uullaa ‹An kaballa kasasamaa ki'nnuwwi illagenne hincummok leto'i keen lehiinsi ki'llamisa amma'nnummaanninatte› yaa shuurummaanniinsi bagaan dummichchi daannuwwi illagenne hincummi ammane eesenne siiddo'i bi'ishshi yoolas huno'o, kaba ixxuwwim kuttona» yukko.

²²Filiksi Moollanni Yesuusika googo erisa qoossaa la'am hee'u bikkina Phaawuloosa kasasso'i keenina «Gaadaa'n ijaajaanchi Lusiyoos aad waaroo ammane ki'nnuwwi fitantakkam woshsha oogatoommo» yaa mattamisa issaa

²³mat xibbi halaqichchina «Phaawuloosa qoxxitaa egere. Ixxi qarmanni ixxena hasisoo mat mat luwwa uwwiteena waattam ammane hoottitte» yaa Phaawuloosina hofqax wolabbanom uwwukko.

²⁴Mat qax ammaniinsi lasage Filiksi Ayihudichchotte hee'llo'i Diruusiile yakkam ixxi arenne maqirem waaraa Phaawuloosa weeshisaa woraa Yesuus Kiristoosanne amma'nnimmi bikkina Phaawuloosiinsi macceesukko.

²⁵Phaawuloosim xabbeenoo'm bikkina, gaga ege'llimmi bikkinaa lasaanchonne mannanne Waa'i oogatoo oogaxxi bikkinaa kuru ammanenne Filiksi baddaa «Iina makku ammane weeshisoommo; kaba ihookko mare» yukko.

²⁶Eehid yukkaarem Phaawuloos maqanxa uwwona hasaa hee'u bikkina dut ammane weeshisaa atoorassam hee'ukko.

²⁷Lam hiinchiinsi lasage Filiksi beyyonne Barqiyoos Fisxoos gassaanchi ihukko. Filiksi Ayihuxxi manna liiranseena yaa Phaawuloos karamukkisam hee'ona urukko.