Read Hadiyya Asse'amaa'n Baxo 26 Bible Online

Asse'amaa'n Baxo 26 - Hadiyya bible

Asse'amaa'n Baxo 26

¹Adil Agriiphphi Phaawuloosina «Ki gaqqi bikkina wocceena xantootto» yukko. Ee lasage Phaawuloos ixxi anga biddiqaa'aa ixxo kasasakko'i luwwina

²«Adil Agriiphpha, Ayihuxxi manni eese kasasso'i woshshi hundinam ka balla ki'n illagenne uullaa dabaroommisina gada'a siixxummi bikkina lobakata liiramaammo.

³Annannam ki'nne Ayihuxxi manni losanoo fitantam fitanchaa hundam qoossitakka'a laqqakkam bikkina an wocoommi woshsha iyyaqqimminne macceessakkamisina gaassaa ki'nne uunxoommuulla.

⁴ An oosoommaniinsim ki'isaa qaramummi uullannee Yerusaaleemannee hinkido'i heechcha hee'umda'e Ayihuxxi manni hundim erisa laqqamo.

⁵Ha'yyitolas neese amma'nninoommi luwwi bikkinatte yakkota'n an Seera qoxxaallisa egettam Farisaawe'i kolliinsette ihummisa lobakat ammaniinsim ki'issa'a laqqam bikkina hasso'aare kutteena xantamo.

⁶Kaba an ka beyyonne oogaxxameena hincummok Waa'i niyyanno'ina ‹Issoommo› yu neeyyato issoo'isa amma'nnummi bikkinatte.

⁷Ee Waa'i ‹Issoommo› yu neeyyatom niikki tommii lamem Isra'ee'l sullim ‹Siixxinoommo› yita'a hiimoo ballaa Waa'ina qoxxita'a otossitamuulla. Adila, eese kaba Ayihuxxi manni kasasso'ok eehanni bikkinatte.

⁸Lehu keeno Waa'i lehiinsi ki'isoohan ihukkisa ka beyyonne yoontakke'i keen mahina amma'nnimma hooggakka'ate?

⁹ An i gagim Naazireexxi Yesuus summa sabaa ‹Dut jor luwwa issimmi hasisookko› yaa sawwam hee'ummo.

¹⁰Ee bikkina an qeessa awwonsaaniinsi aa'ummi malaayyinne Yesuusanne amma'nnito'i kee'nneka dut keeno karaxxi minenne aagisaa kassiisimmi xale'i ihoo'n ixxuwwa shakku'uuyyim shimmanne iittamaa Yerusaaleemanne ee jor luwwa issummo.

¹¹Odim dut ammane wixxixxi minneewwanne hundannem ganummuuyyi ixxuwwi amma'nnito'i Yesuusa game'llitamisa isseena yakam hee'ummo. Eehanniinsim ixxuwwanne lobakata nadadaa mulli uulli beero'uwwi afeebe'em laseesummuuyyi maraa jorisa hawwisam hee'ummo.

¹²«Adil Agriiphpha, ee woshshi bikkina eese qeessa awwonsaan ijaajjo'aare malaayye siixxaa Damaasqo'i beero'o marummuuyyi

¹³googonne hee'onam ballaannonne sammi gudonne i kululleetannee iinninne maqire mattam hee'llo'i kee'n kululleetannee eelliinchi caakkiinsi lophphoo caakki iimaniinsi belelaa iina moo'amukko.

¹⁴Neesem ee caakka moo'nnummi ammanenne hundim uullanne umbaa yoommine'aannonne iina Ibro'i manni suuminne ‹Saawula! Saawula! At eese mahina hawwissoolla? Qasoo xaara kade'llittaare hawwodantootto!› yoo sagara macceesummo.

¹⁵Anim ‹Moollanna! At ayyette?› yaa xa'mmummo. Moollannim ‹An at hawwissoo Yesuusatte.

¹⁶Kaba at ki'llaa uulle; an kiina moo'amummok iina awwaadaanchi issaa keese doo'lleenatte. At ka balla moo'llitti luwwaa ka lasagem an kiina moo'isoommi luwwaa mulli keenina kuttoo'isina iina awwaadaanchi issaa keese doo'lleenatte.

¹⁷Isra'ee'l minaadabii mulli minaadabii ixxuwwika baaxiilo haafoommaare eesenne amma'nnita'a i minaadab ikko'i keeninne maqirem gulumma siixxiteena tuunsiinsi caakkanne fittamisinaa Sheexaa'n malaayyiinsi Waa'i kollonne daba'llitamisinaa at ixxuwwika ille fooqaa'lloo'isina an keese ixxuwwi beyyo asse'aammo. Ixxuwwiinsim keese egeroommo› yaa eese asse'aakko.

¹⁹«Adil Agriiphpha, iimaniinsi kaaltanne iina moo'amu woshshina an ijaajancha sabummoyyo.

²⁰ An gaassaatim Damaasqo'onne hee'llam mannina kuraa lasage Yerusaaleemanne, Yihuxxi uulli hundannee mulli uullannee hee'llam minaadab hundim baaxiilo biira yita'a Waa'i kollonne daba'llitamisinaa baaxiiliinsi daba'llito'isa moo'isoo baxo baxxamisinaa wocummaare

²¹Ayihuxxi manni eese Keesammi Minenne siidda'a amadda'a shiteena hasso'o.

²²Kaballi afeebe'e Waa'i iina hara'mmukkuuyyi yookko. Ee bikkina an keyye uullummok Waa'i sagar Kiristoos luxxeka hawwoo'isaa lehiinsi luxxan ihaa ki'aa Isra'ee'l minaadabinaa mulli minaadabinaa laminam caakka eeboo'isaa hiraagaanii Muse'ee kutto'i woshshi wo'mmimmi hasisoo'isa hoffaanninaa lobaanninaa kurummi bikkinatte» yukko.

²⁴Phaawuloos ixxi gaqqi bikkina eehid yaa wocu ammanenne Fisxoos «Phaawuloosa, at machchaattaatto! Lobakat lachchi keese machchaassaakko» yaa shuuraa wocukko.

²⁵Ihukkaarem Phaawuloos «Lombaam Fisxoosa, an ishittiggaa hanqo'i woshsha wocoommuulla bagaan machchaarummoyyo.

²⁶Adil Agriiphpha, ka woshsha hundam ki'nne qoossitakka'a laqqakkam bikkina an lobakata iggaa ki'nnena woceena xanoommo. Odim ku woshshi maaxaqqanne ihoo'n yoohan ihu bikkina ki'nne ka woshsha hundichchom guullitakka'a laqqakko'isa an qoossaa la'aammo.

²⁷Adil Agriiphpha, hiraagaan kutto'i woshsha amma'nnitakkamoyyonnihe? Amma'nnitakkamisam an la'oommo» yukko.

²⁸Adil Agriiphphim Phaawuloosina «Ka gundi ammanenne eese Kiristoosanne amma'nnisseena yakitoollannihe?» yukko.

²⁹Phaawuloosim dabaraa «Gundi ammanennette ihukko qeeraa'l ammanenne xale'i ki'nnette ikkakkoo'n kaballa iinniinsi macceesukkok hundim ka eesenne afu karatiinsi bagaan i'isa ihoo'isina Waa'a uunxoommuulla» yukko.

³⁰Ee lasage adil, gassaanchi, Baarniiqee ixxuwwinne maqire afuutta'a hee'llo'i keenii afuuchchiinsi ki'llo'o.

³¹Ee beyyiinsi ki'lla'a matqaxa matta'a ixxuwwina'i ixxuwwim «Ku manchi ixxo shisiisoo te'im kassiisoo luwwa maham issukkoyyo» yitam hee'llo'o.

³²Agriiphphim Fisxoosina «Ku manchi ‹I woshshi adilluwwi adil Qeesaarina higona› yubeeta'n tiramoohan hee'ukko» yukko.