Read Hadiyya Asse'amaa'n Baxo 28 Bible Online

Asse'amaa'n Baxo 28 - Hadiyya bible

Asse'amaa'n Baxo 28

¹Neese dambalaq woriinsi xummam fillaa lasage oo amfummi uulli wo'inne kibbamaakkoo Maalta'i ihukkisa lanqummo.

²Ee ammane xeen ga'nneena asheeraa hee'u bikkinaa uullim qiidam hee'u bikkinaa neese iibbixxinoommisina ee uullanne hee'llam manni giira giitta'a maalalsiisoo eroomma issita'a neese aa'llo'o.

³Phaawuloosim mat qaaphphi haqqa feeraa giiranne edukkaare gii'l iibbi mashka'inne hamashshichchi firaa Phaawuloosika anga qasukko.

⁴Ee uullanne hee'llam hee'llo'i manni oo hamashshichchi Phaawuloos anga ga'mmaa calcalaakkoo moo'lla'a «Ku manchi manna shaakkoohan ihoo'n urooyyo! Mashka'oomim dambalaqiinsi xummam firukkaarem hanqinam ixxi baxu baxim ixxo amadaakko» yaqqanto'o.

⁵Ihukkaarem Phaawuloos hamashshichchooma angiinsi giggissaa giiranne darabukko bagaan maham ihukkoyyo.

⁶Ixxuwwim Phaawuloosik orachchi dashshoo'isa te'im ixxi dangonnem lehaa uboo'isa lobakat ammane egetta'a ixxi eraa'llisiinsi maham ihubee'isa moo'llo'i ammanenne sawwite dabatta'a «Ku manchi Waa'a!» yito'o.

⁷Ee uulla gassoo Phuphiloosina neese hee'nnummi beyyina gadanonne uulli hee'ukko. Oo Phuphiloos ee woshsha macceesu ammanenne neese ixxi mine massaa sas balla koyyinano aa'ukko.

⁸Ee ammanenne ee Phuphiloosik anni lobakat iibbii aaditii amadaa iinse'aa hee'ukko. Phaawuloosim ee xissaa iinse'u manchi beyyo maraa ixxi anga ee manchi hanenne issaa Waa'a uunxaa fayyiisukko.

⁹Ee lasage odim ee uullanne hee'llo'i jabbaan hundim waatto'aare fayyiisukko.

¹⁰Oo manni neese lobakata lonsita'a irifo'o uwwito'o. Saxxi aganiinsi lasage mat Qaf waa'a yakkam markabanne Alaksaandir beero'aannonne aangaa malleena ki'nnummaare oo manni niina googina hasisoo luwwa ee markabanne iyyiisso'o. Oo markab hagayyi beeddeebe'e ee wo'i kibbu uullanne uullaa hee'ukko.

¹²Sirkaasa yakkam beero'o amfaa lasage ee beero'onnem sas ayyaamo afuullummo.

¹³Ee beyyiinsim markabanne aangaa mallaa odim Ireegiyoom beero'o amfummo. Odim ee beyyiinsim mat balla taakke'nnaa lasage danaam hafachchi hafachchukkaare ki'nnummi saxxi ballina Baatool beero'o amfummo.

¹⁴Ee Baatoo'l beero'onne amma'nnaan niinninne edanta'a ixxuwwinne maqire mat saanta afuulloommisina xa'mmito'aare neesem afuullaa Oroo'm beero'o mallummo.

¹⁵Mallummuuyyim Oroomanne hee'llo'i amma'nnaan ni bikkina macceesso'i ammanenne niinninne edanteena Aphphiyoos beero'i meera higga'a Sas Gatti Beyyo yakkam beyyi afeebe'e waatto'o. Phaawuloosim ixxuwwa moo'u ammanenne lobakata liiramaa Waa'a galaxxukko.

¹⁶Neese Oroo'm uulla amfaa lasage Phaawuloos ixxo egeroo mat gaadaanchinne maqirem mullam afuuroo'isa issakko'o.

¹⁷Sas balliinsi lasage Phaawuloos ee uullanne hee'llam Ayihuxxi manni awwonsaano weeshisukkaare waatta'a wixxito'i ammanenne «Iyyabbaayyuwwa, an Isra'ee'l minaadaba hawwodoo'nnim te'im niyyanno'iinsi aa'nnummi losa'nneka maham gindoo'nnim Yerusaaleemanne yo'i ni minaadab eese katta'a Oroo'm mannina higissa'a uwwito'o.

¹⁸Ihukkaarem Oroo'm manni i woshsha lobakata saarayyita'a moo'lla'a lasage eese shisiisoo luwwika maham siiddobee'i bikkina titteena hassa'a hee'llo'o.

¹⁹ Titteena hasso'aarem Ayihuxxi manni i tirancha sabbo'i ammanenne hawwinam ‹I woshshi Oroo'm adil Qeesaarina higona› yummo bagaan i minaadaba kasasoommi mashka'i ma'lluchchim bee'e.

²⁰Ki'nnuwwa weeshisaa edamaa ki'nnuwwinne maqire woceena hasummok ee bikkinatte. Kaba an chimchiminne karamaa yoommok Waa'i Isra'ee'l minaadabina ‹Issoommo› yu eroommi bikkinatte» yukko.

²¹Ixxuwwim Phaawuloosina «Neese Ayihuxxi uullanne hee'llam manniinsi ki bikkina kitaabamu assi kitaaba siindummoyyo. Odim ee beyyiinsi waatto'i niyyabbaayyuwwiinsim ki bikkina matem jor luwwam te'im matem jor sadom macceensummoyyo.

²²Ihukkaarem ka at amma'nnitti amma'nnato amma'nnitam keeno manni beyyi hundannem sabukkisa macceensummi bikkina at woccoo woshsha kiinniinsi macceenseena hansoommo» yita'a jinna amaddo'o.

²³Phaawuloosinne jinna amaddo'i ayyaamonne dut manni Phaawuloos hee'am hee'u mine waatto'aare dariinsi ki'isaa hiim afeebe'e Waa'i adilla'n bikkina Muse'i See'l kitaabiinsii hiraagaan kitaabbo'i kitaabbuwwiinsii qananaa'aa ixxi sawwixxeka caakkisaa kurimminne ixxuwwa Yesuus bikkina amma'nniseena yakam hee'ukko.

²⁴Mat mat keen ixxi wocu woshsha amma'nnito'aarem mulli keen amma'nnito'oyyo.

²⁵Ixxuwwina'i ixxuwwim iittantoo'nnim annanni ikka'a matteena ki'llo'aare Phaawuloos ixxuwwina mat woshsha «Keesammi Ayyaan hiraagaanchi Issaayyaasinne niyyanno'ina

²⁶ ‹At ka minaadaphphi beyyo mattaa «Ki'nnuwwi macceesimmoomina macceessakkamo; ihukkaarem qoossitakkamoyyo. Moo'immoominam moo'llakkamo; ihukkaarem xoossitakkamoyyo» yitaa kure.

²⁷Mashka'oomim «Ka mannik wodan duudaakko. Maccim macceesoobee'isa gawwaakko; illim moo'oobee'isa qooqaakko. Eehid ihubeeta'n i kollonne daba'llitamaare an ixxuwwa fayyiisoommisina ixxuwwi illim moo'am hee'ukko; maccim macceesam hee'ukko; tiirim qoossam hee'ukko» yaa Waa'i wocaakko› yu woshshi hanqa» yukko.

²⁸Odim Phaawuloos «Waa'i manna gatisoo'isa mulli minaadabina afinsoommisina neese asse'ukkisa laqqehe! Ixxuwwim macceessamo» yukko.

²⁹Phaawuloos eekka wocaa lasage Ayihuxxi manni ixxuwwina'i ixxuwwim fitantu'uuyyi matto'o.[35]

³⁰Phaawuloos kera'a miqukkuuyyi garoo minenne ixxo xa'mmeena waaru manni hundam aa'ukkuuyyi lam hiinchi hundoomam

³¹Waa'i adilla'n bikkinaa Moollanni Yesuus Kiristoos bikkinaa ayyem baddoo'n iggimminne kurukkuuyyi losisam hee'ukko.