Read Hadiyya Asse'amaa'n Baxo 3 Bible Online

Asse'amaa'n Baxo 3 - Hadiyya bible

Asse'amaa'n Baxo 3

¹Mat balla Pheexiroosii Yohaannisii honsi sa'aatanne Waa'a uunxakkam ammanenne Keesammi Mine mattam hee'llo'o.

²Ee beyyonnem Danaam Gooca yakkam gooc hee'ukko. Qaramukkaanniinsi ki'isaa shiihaakkoo mat mancho Keesammi Mine aagoo manniinsi tasbo'o uunxaqqoo'isina ballina ballina iyyakka'a eebakka'a eekke'e dissakkam hee'akko'o.

³Oo manchim Pheexiroosii Yohaannisii Keesammi Mine aaggeena waattu'uuyyi moo'aa tasbo'o uwwitamisina uunxukko.

⁴Pheexiroosim Yohaannisinne maqirem ixxo xuxxaa moo'aa «Neese moo'e!» yukkaare

⁵oo shiihu manchim «Ihu luwwa uwwitamo» yaa ixxuwwa xuxxaa moo'ukko.

⁶Ihukkaarem Pheexiroos «Iina worqii birii bee'e. Iina yoo luwwa kiina uwwoommo. Naazireexxi Yesuus Kiristoos summinne ki'llaa taakke'e» yaa

⁷makki anga amadaa ki'isukkaare ee ammanchom ee manchik lokkii mogole'ii qoxxukko.

⁸Ixxim shoottaa uullaa taakke'ukkuuyyi, xophxophukkuuyyii Waa'a galaxxukkuuyyii ixxuwwinne maqirem Keesammi Mine aagukko.

⁹Manni hundim oo shiihaa hee'am hee'u manchi taakke'ukkuuyyii Waa'a galaxxukkuuyyii

¹⁰moo'lla'a tasbo'o uunxaqqeena Waa'i mi'nnaannonne Danaam Gooca yakkam beyyonne afuuraa hee'u manchi ihukkisa laqqa'a ee ixxonne ihu woshshanne lobakata maalalto'o.

¹¹Oo fayye'u manchi Pheexiroosiinsii Yohaannisiinsii «Annanni ihoommoyyo» yaa hee'ukkuuyyim manni hundim mat ihaa maalalukkuuyyi Daba'llamakkam Salamoon Gooca yakkam beyyo ixxuwwi beyyo geerukko.

¹²Pheexiroos eekka moo'u ammanenne minaadabina «Isra'ee'l minaadaba, kannonne mahina maalaltakkamuulla? Ni malaayyinne ka mancho taakkiinsummaannisa te'im Waa'i illagenne er manni inkummi bikkina ka mancho taakke'oo'isa issinummaannisa mahina neese moo'llakkamuulla?

¹³ Waa'ina awwaadaanchi Yesuusa Philaaxoosina ki'nnuwwi higissakka'a uwwitakko'aare Philaaxoos fatakeena ihu ammanenne ixxi illagennem laggakko'oka Abrihaamina, Yisaaqina, Yaaqoobinaa niyyanno'inaa Waa'i lonsukko.

¹⁴ Ihukkaarem ki'nnuwwi Waa'ina annanni ihaakkoo muccura laggakka'a manna shu mancho fatakoo'isina Philaaxoosa xa'mmitakko'o.

¹⁵Heechcha uwwookkoka shitakko'aare Waa'i ixxo lehiinsi ki'isukkisina neese naqaashshuwwa.

¹⁶Ka shiihu mancho ki'nnuwwi moo'llakkamokaa laqqakkamokaa Yesuusanne amma'nnimmi qoxxisaakko. Ka mancho ki'nnuwwi hundi illagennem tollaa'aa fayyiisukkok Yesuusanne amma'nnimma» yukko.

¹⁷Odim Pheexiroos «Kabadem iyyabbaayyuwwa, ki'nnuwwim ki'nnuwwi gassaa'nnisam Yesuusanne issitakko'i luwwa lachchoonginne issitakko'isa an la'oommo.

¹⁸Ihukkaarem Waa'i hiraagaan hundinnem ihaa ixxi doo'llu Yesuus hawwimmi hasisoo'isa gaassaatim kuru woshsha wonshaakko.

¹⁹Ee bikkina ki'nnuwwika baaxiilo Waa'i haafoo'isina baaxiilo biiraa yitakka'a daba'llehe. Baaxiiliinsi daba'llitakkolas Waa'i ki'nnuwwa guullaa maasse'oo balli waarookko.

²⁰Ki'nnuwwina Yesuus Kiristoosam asse'ookko.

²¹Waa'i hiraaggona annanni issu kee'n kollinne ihaa gaassaatim wocukkisam hundem luchchom haareechchi isseebe'i afeebe'e iimanenne Yesuus afuurimmi hasisookko.

²² Muse'em ‹Moollanni Waa'i ki'nnuwwi abbaayyuwwi lambe'iinsi hiraagaancho eese ki'isukkisam [4] ki'nnuwwina ki'isookko. Ixxi wocoo luwwi hundam macceessehe.

²³ Oo hiraagaanchi wocoo woshsha macceesoobee'ek ayyim minaadaphphi lambe'iinsi bi'ona› yukko.

²⁴Odim Saamu'eelii Saamu'eeliinsi lasage ki'llo'i keenii hiraagaan hundim ka doolli bikkina wocco'ookko.

²⁵ Ki'nnuwwi hundim Waa'i Abrihaamina ‹Ki shumo'iinsi qaramoohaanninne uullanne yoo minaadab hundam maasse'oommo› yaa ki'nnuwwi anno'inne aagu hidi'l oosoo hiraagaa'n oosoo.

²⁶Waa'i ki'nnuwwi hundam mulli keeniinsi gaassaa boqqoomiinsi dabaraa maasse'eena doo'llamaakkoo ixxi Awwaadaancho[5] ki'isaa ki'nnuwwi beyyo asse'aakko» yukko.