Read Hadiyya Asse'amaa'n Baxo 5 Bible Online

Asse'amaa'n Baxo 5 - Hadiyya bible

Asse'amaa'n Baxo 5

¹Mat Hanaaniya yakkam manchim Saphphiira yamantam ixxi arenne maqirem uulla biteesukko.

²Ixxi arenne a'llamaa ee biteesu diinaxxeka matqaxa gatisaa matqaxooma eebaa Yesuus asse'u keenina uwwukko.

³Ihukkaarem Pheexiroos «Hanaaniya, uulla biteessitti diinaxxeka matqaxa gatissaa Keesammi Ayyaananne qophphantoo'isina ki wodanonne Sheexaancho mahina aagissitto?

⁴Biteesameena illageen ki gaqqan hee'ukkoyyonnihe? Biteesamaa lasagdu diinatoom kiihan hee'ukkoyyonnihe? Kido'i woshsha ki wodanonne mahina sawwititto? At qophphantittok Waa'annette bagaan mannanneyyo» yukko.

⁵Hanaaniy eekka macceesu ammanenne ubaa lehukko. Woraadduwwim ki'lla'a keefanta'a iyyita'a massita'a waammito'o. Eekka macceesso'i manni hundim baddito'o.

⁷Sas sa'aatiinsi lasage ee ihu woshsha laqqobee'i Hanaaniy are waatto'o.

⁸Pheexiroos isenam «Taa huno'o kure; uulla biteessakko'ok kaqax diinatinattennihe?» yukko. Isem dabatta'a «Eeyya, kaqaxinatte» yito'o.

⁹Ihukkaarem Pheexiroos isena «Waa'i Ayyaana keentakkeena hinkid iittantakko'o? Oono'o! Ki aro'o waammito'i keen u'llummannette. Ki leesham iyyita'a massitamo» yukko.

¹⁰Ee ammanchom Saphphiira Pheexiroos lokki gadanonne ubba'a leto'aare is aro'o waammito'i woraadduwwi aagga'a leto'isa moo'lla'a iyyita'a massita'a is aro'i gadanonnem waammito'o.

¹¹Amma'nnaanii eekka macceesso'i keenii hundim lobakata baddito'o.

¹²Ee ammane Yesuus asse'u keen minaadaphphi lambe'enne lobakat agannaa maalalsiisoo luwwaa issito'o. Ixxuwwi hundim mat ikka'a Daba'llamakkam Salamoon Gooca yakkam beyyonne hee'llo'o.

¹³Minaadab ixxuwwa lobakata lonsam hee'ukko bagaan ixxuwwinne mat iheena iggam hee'ukkoyyo.

¹⁴Ihona bagaan Moollannanne amma'nnu meentikii goo'nnekii xig eraa'llaanniinsi lophphaa exxukkuuyyi marukko.

¹⁵Ee iham hee'u luwwi bikkina Pheexiroos higukkuuyyi ixxek hawwaankaannim ubaa fayyiisoo'isina jabbaano iyyakka'a eebakka'a googonne ara'uwwannee jibbuwwannee iinsiisakkam hee'akko'o.

¹⁶Odim Yerusaalee'm kululleetanne yoo beero'uwwiinsi jabbaanoo habus amadaa hawwoo keenoo manni amadaa waaraa wixxam hee'ukko. Oo keen hundim fayye'am hee'ukko.

¹⁷Hundiinsi lob qeessichchii ixxenne maqire mat ikka'a hee'llo'i Saduuqaawe'uwwii Yesuus asse'u keenonne to'achchita'a ki'llo'o.

¹⁸Ee bikkina Yesuus asse'u keeno amadda'a karaxxi mine aagisso'o.

¹⁹Ihukkaarem Waa'i asse'amaanchi hiimonne karaxxi mi'nneka gooca fooqaa'aa ixxuwwa fissukko.

²⁰Fissaa «Mallehe, Keesammi Minenne uullitakka'a minaadabina heechchi sagara kullehe» yukko.

²¹Ixxuwwim eekka macceessa'a daram Keesammi Mine aagga'a losisso'o. Ee ammanenne hundiinsi lob qeessichchii ixxenne maqire hee'llo'i keenii waatta'a Isra'ee'l lommannika dummichchi daannuwwa weeshsha'a Yesuus asse'u keeno karaxxi miniinsi wottamisina manna asse'llo'o.

²²Ihukkaarem waatteena matto'i gaadaan karaxxi mine affa'a ixxuwwa hooggo'o.

²³Daba'llita'a waatta'a «Karaxxi mi'n gooc qoxxaallisa xufamaakkookkokaa egeraanim goocanne uullito'ookkokaa moo'nnummo. Ihukkaarem u'llumma fooqaa'nnummi ammanenne mi'n woronne matim hee'ukkoyyo» yita'a kutto'o.

²⁴Keesammi Mine egeroo keeno ijaajaanchii qeessa awwonsaanii ee woshsha macceesso'i ammanenne «Kuk maruwwa?» yita'a Yesuus asse'u kee'n bikkina maalalta'a mal bi'ukko.

²⁵Mal bi'aa hee'llonam mat manchi waaraa «Karaxxi minenne kattakko'i manni Keesammi Minenne uullita'a minaadaba losissamuulla» yaa kurukko.

²⁶Kuru ammanenne Keesammi Mi'n egeraano ijaajaanchi ixxi gaadaaninnem maraa worukko. Ihukkaarem manni ixxuwwa kininne aphphisoohaannina baddito'i bikkina Yesuus asse'u keeno wotto'ok malaayyinneyyo.

²⁷Wotta'a dummichchi daannuwwi illagenne uullisso'aare hundiinsi lob qeessichchi

²⁸ «Yesuus summinne woccakkambee'isa qoxxinsaa kullaa hee'nnummoyyonnihe? Ihukkaarem ki'nnuwwi Yerusaaleemanne yoo manni hundam losisakko'ookko. Ixxi xiiga neesenne eebbakkeenatteyyonnihe?» yaa xa'mmukko.

²⁹Ihukkaarem Pheexiroosii ixxenne maqire asse'anto'i keenii «Neese mannina ijaajanchiinsi Waa'ina ijaajanchi hasisookko.

³⁰Ki'nnuwwi Yesuusa haqqanne saqaltakka'a shitakko'aare niyyanno'i Waa'i lehiinsi ki'isaakko.

³¹Odim Isra'eela baaxiiliinsi dabaroo'isinaa ixxuwwi baaxiilo haafoo'isinaa Awwonsaanchoo Gatisaanchoo issaa lonsaa ixxi makki kollonne afuussaakko.

³²Ka woshshinam neesee Waa'i ixxena ijaajantam keenina uwwu Keesammi Ayyaanii naqaashshuwwa» yito'o.

³³Dummichchi daannuwwi eekka macceesso'i ammanenne nadadda'a Yesuus asse'u keeno shiteena hasso'o.

³⁴Ihukkaarem ee dummichchi woronne manni hundim lonsoo Gamaaliyaala yakkam manchi seera losisoo Farisaawekkichchi hee'ukko. Ixxim uullaa hofqax ammanina asse'amaano biira fissakkamisina ijaajukko.

³⁵Fitto'aare ee daannuwwina «Isra'ee'l minaadaba, ka mannanne issitakkam luwwiinsi ege'llehe.

³⁶Kanniinsi illageenim Tewodaasa yakkam manchi ‹An lobane› yaa ki'ukkaare soor xibbe ikkamqax manni awwonto'o. Ihukkaarem ixxo shakko'aare ixxo awwonto'i keenim binnita'a bi'llo'o.

³⁷Ee lasage odim manni summa kitaabakko'i doollenne Galii'l uullik Yihuda yakkam manchi ki'aa lobakat manni ixxo awwonoo'isa issaa hee'ukko. Ixxom shakko'aare ixxo awwonu keen hundim binnukko.

³⁸Ka woshshi bikkinam an ki'nnuwwina kuroommok ka manna nakkitakkambee'isa uttakka'a ullehe. Mashka'oomim ku sawwit te'im bax manniinsette ihaakkoolas bi'ookko.

³⁹Ihukkaarem ku woshshi Waa'iinsette ihaakkoolas bi'issakkeena xantakkamoyyo. ‹Bi'insoommo› yitakku'uuyyi ayyi la'ukko Waa'inne wocantakka'a siidantakkambee'isa» yukko.

⁴⁰Ee bikkina oo dummito'i keen Gamaaliyaal sogu sogitano aa'lla'a Yesuus asse'u keeno mine weeshsha'a ganta'a ki'lla'a Yesuus summinne od woccambee'isa qoxxissa'a kutta'a elle'llona fatakito'o.

⁴¹Yesuus asse'u keenim Yesuus bikkina sholle'immi ixxuwwina laboohan ihaa moo'amu bikkina dummichchi daannuwwi beyyiinsi liirantu'uuyyi matto'o.

⁴²Odim balli hundam Keesammi Minennee ixxuwwi minennee Yesuus Gatisaanchi Kiristoosatte ihukkisa losisimmaa alallaatimmaa utto'oyyo.