Read Hadiyya Asse'amaa'n Baxo 6 Bible Online

Asse'amaa'n Baxo 6 - Hadiyya bible

Asse'amaa'n Baxo 6

¹Hofqax ammaniinsi lasage amma'nnaa'nnek xig exxukkuuyyi maru ammanenne Giriik suuminne woccam Yihuxxek busar meenti ballina ballina baxxansakka'a uwwakkam hara'mmatonne hawwodanto'i bikkina ixxuwwi gaqqi suuminne woccam Ayihuxxi mannanne quunquunto'o.

²Ee bikkina amma'nnaano hundam tommii lamem asse'amaanim weeshsha'a «Neese hurbaata baxxansimminaa yinaa Waa'i sagara alallaatimma urimmi hanqayyo.

³Niyyabbaayyuwwa, ki'nnuwwi lambe'iinsi danaam sad yoo kee'nneka Keesammi Ayyaanii qooroomii wo'mmaakkoo keeno lamar mancho doo'llehe.

⁴Ihukkaarem neese Waa'a uunxatonnee Waa'i sagara kurimmi awwaadonnee guruphphammoommo» yito'o.

⁵Ixxuwwi yito'i woshshanne manni hundim liiramukko. Ee bikkina amma'nnatii Keesammi Ayyaanii wo'mmaakkoo Isxifaanoosa, Filiphphoosa, Firikiraasa, Nikaanora, Ximoona, Farminaasaa Anxooke'e yakkam uullika Ayihuxxi manni amma'nnatonne daba'llaakkoo Niqoolaasaa doo'llito'o.

⁶Ee keeno asse'amaa'n illagenne amma'nnaan uullisso'aare asse'amaanim ixxuwwi hanenne anga issita'a Waa'a uunxito'o.

⁷Waa'i sagarim haraarukkuuyyi marukko. Amma'nnaa'n xigim Yerusaaleemanne lobakata li'ukkuuyyi marukko. Lobakat qeessuwwim mishiraachchi sagara aa'lla'a amma'nnito'o.

⁸Waa'ik uwwanchii malaayyii Isxifaanoosanne wo'mmukko. Ixxim manni lambe'enne lobakata maalalsiisoo luwwaa agannaa issam hee'ukko.

⁹Ihukkaarem «Wolabbanonne fitto'oo kee'n wixxixxi mine» yakkam wixxixxi mi'n mannik Qaareena yakkam uulliinsi, Alaksaandira yakkam beero'iinsi, Kilqe'ee Issiya yakkam uulliinsii waatto'i mannik mat mat keen Isxifaanoosinne fitantam hee'llo'o.

¹⁰Ihukkaarem Isxifaanoos wocoo'isina Keesammi Ayyaan uwwu qooroominne uullixxanteena xanto'oyyo.

¹¹Ee bikkina oo keen «Waa'aa Muse'ee Isxifaanoos game'llukkuuyyi macceensaammo» yitam manna worinne ki'isso'o.

¹²Ee'isinne minaadaba, lommannaa seera losisaanoo Isxifaanoosanne ki'isso'o. Ixxuwwim Isxifaanoos beyyo matta'a ixxo amadda'a dummichchi daannuwwi illagenne hincaa'llo'o.

¹³Odim «Ku manchi ‹Naazireexxi Yesuus Keesammi Mine bi'isookko. Muse'e niina uwwu losanom dabarookko› yaa ka keesammi beyyonnee Seerannee jora wocukkuuyyi macceensaammo» yita'a naqqassam qophpha'n naqaashshuwwam uullisso'o.

¹⁵Dummichchanne afuutto'i manni hundim ixxo wixxita'a moo'llu'uuyyi ixxek illi kolli Waa'i asse'amaanchi illi kollisa ihaakkookkoka moo'llo'o.