Read Hadiyya Asse'amaa'n Baxo 7 Bible Online

Asse'amaa'n Baxo 7 - Hadiyya bible

Asse'amaa'n Baxo 7

¹Hundiinsi lob qeessichchim Isxifaanoosina «Ku woshshi hanqannihe?» yukko.

² Isxifaanoosim dabaraa «Iyyanno'oo iyyabbaayyuwwaa, an kuroommi woshsha macceessehe. Niyyanni Abrihaam Haaraananne hee'eena maroo'n illageen Maspheexoome'enne hee'ukkuuyyim lombaam Waa'i ixxena moo'amukko.

³Moo'amaa ‹Ki uulliinsii ki qarmanniinsii annanni ikkaa an kiina moo'isoommi uulla mare› yukko.

⁴ Ee bikkina Abrihaam Kalaade'i uulliinsi annanni ihaa maraa Haaraananne hee'ukko. Ixxi anni lehaa lasage Waa'i Abrihaama ee beyyiinsi fissaa kaba ki'nnuwwi hee'llakkam ka uulla worukko.

⁵ Waa'i Abrihaamina mat taachcho'o ihooqax uullam ixxi gulummi issaa uwwoo'nnim ‹Kiinaa kiinniinsi lasage ki shumo'inaa ki'nnuwwi gulummi issaa ka uulla uwwoommo› yukko. Waa'i eekka wocu ammane Abrihaamina oos ma'lluchchim hee'ukkoyyo.

⁶ Odim Waa'i Abrihaamina ‹Ki oos mulli manni uullanne waaraan ikka'a hee'llamo; ee uulli mannim ixxuwwa soor xibbi hiinchi afeebe'e hawwissu'uuyyi agiddano gassitamo.

⁷ Odim ixxuwwa agiddano gassu mannanne oogatoommo. Ee lasage ee uulliinsi fitta'a waatta'a ka uullanne iina otossitamo› yaa kurukko.

⁸ Waa'im Abrihaamina hidi'l mare'i ihoo'isina ballachchancha uwwu bikkina Abrihaam Yisaaqa qaramu sadeenti ayyaamonne ballachchukko. Yisaaqim ixxi beeto Yaaqooba ballachchukko. Yaaqoobim ixxi tommoo lamem oosom ballachchukko. Oo tommii lamem oosim tomminaa lamem Isra'ee'l moollinaa anno'o.

⁹ «Oo niyyanno'im ixxuwwi abbaayyi Yooseefanne to'achchita'a Gibxi uulli mannina biteesso'aarem Waa'i ixxenne maqire hee'ukko.

¹⁰ Waa'i ixxo hawwi hundichchiinsim gatisaa Faari'oon illagenne nuuraa qooroomaa uwwaa Faari'oon ixxo iittoo'isa issukko. Oo adilim Yooseefa Gibxi uullannee ixxi mi'n abaroos hundannee gassaanchi issukko.

¹¹ Ee doollenne Gibxi uullannee Kaana'aa'n uullannee hundannem qaanne'i aagaa hee'u bikkina lobakat hawwi ihaa niyyanno'im hurbaata siixxiteena xanto'oyyo.

¹²Ihukkaarem Yaaqoob Gibxi uullanne hurbaat yoo'isa macceesu ammanenne niyyanno'o luxxaagge ee uulla asse'ukko.

¹³ Odim la'm korem Gibxi uulla matto'aare Yooseef ixxi gaga ixxi abbaayyuwwina la'isukko. Faari'oonim Yooseef sullo la'ukko.

¹⁴ Yooseefim manna asse'aa ixxi anni Yaaqoobaa ixxi qarmannaa hundam lamarayyee onti manchoo ixxi beyyo weeshisukkaare

¹⁵ Yaaqoob Gibxi uulla marukko. Ee uullannem ixxii niyyanno'ii leto'o.

¹⁶ Ixxuwwi leesham dabarakka'a eebakka'a Abrihaam Hamoor moolliinsi diinatinne bitaa'u uullanne Seekeemanne waammakko'o.

¹⁷ «Waa'i Abrihaamina ‹Uwwoommo› yu luwwa uwwoo amman hincukkuuyyi waarukkaare Isra'ee'l minaadab Gibxi uullanne lophphaa fikkaannukkuuyyi marukko.

¹⁸Fikkaannukkuuyyi marukkokim Yooseefa la'oobee'i mulli adil Gibxi uullanne ki'eebe'e hee'ukko.

¹⁹ Oo ki'u haareechchi adil ni shumo'ina hantaaro baxaa ciilluwwa lehona biiranne uunjakkamisa issukko.

²⁰ Ee doollennem Muse'e qaramukko. Waa'i illagenne ixxi mishisoo danaam hee'u bikkina qaramu saxxi agan afeebe'e ixxi anni minenne li'ukko.

²¹ Ixxo uunjakko'aare Faari'oon landichcho massita'a is qachchisa issita'a li'isso'o.

²²Muse'em Gibxi uulli qooroom hundam losaa wocoo woshshannee baxoo baxonnee malaayyaam hee'ukko.

²³ «Muse'e qaramukkaanniinsi sor hiincho ihu ammanenne ixxi abbaayyuwwi ikko'i Isra'ee'l ooso moo'eena sawwukko.

²⁴Ee Isra'ee'l oosika mato Gibxi uulli manchi hawwodukkuuyyi Muse'e moo'aa Isra'ee'l manchina agaagaa ee Gibxi uulli mancho aphphisaa shaa baado miqisukko.

²⁵Waa'i ixxi kollinne ihaa ixxuwwa wolabbanonne fissoo'isa ixxi abbaayyuwwi laqqo'oka labisukkaarem ixxuwwi eekka qoossita'a laqqo'oyyi hee'ukko.

²⁶Odim la'm balla Isra'ee'llek lam manchi wocantu'uuyyi moo'aa iittanseena hasaa ‹Manna, ki'nnuwwi lamim abbaayyuwwa; mahina wocantakkamuulla?› yukko.

²⁷Ixxi beshichcho hawwodam hee'u manchi dabaraa ‹Keese ni hanenne gassaanchoo oogataanchoo issukkok ayyette?

²⁸Beeballa Gibxi uulli mancho shittisam eesem shiteena hassaatennihe?› yaa Muse'e gafe'ukko.

²⁹ Muse'e oo manchi wocu woshsha macceesu ammanenne Gibxi uulliinsi gibaa Miidiyaa'm uulla marukko. Eekke'em lam ooso qarukko.

³⁰ «Muse'e Miidiyaa'm uulla marukkaanniinsi sor hiincho ihaa lasage Waa'i asse'amaanchi Muse'ena Siina'i duu'n udma'i shif lambe'enne gii'l laba'nnisa ihaa moo'amukko.

³¹Muse'e moo'u ammanenne ee moo'u luwwanne maalalaa moo'eena hincu ammanenne ‹An kiyyanno'i Waa'a, Abrihaam Waa'a, Yisaaq Waa'aa Yaaqoob Waa'aa› yoo sagar Waa'iinsi waarukko. Muse'em baa'aa huxe'aa moo'imma baddukko.

³²

³³Waa'im Muse'ena ‹At uullitti beyyi keesamaakkoohan ihu bikkina ki lokkiinsi caamma'a fisse.

³⁴Gibxi uullanne yo'i i minaadabanne afu hawwo hanqinam moo'aammo. Ixxuwwi laachcham macceesaa an ixxuwwa ee hawwiinsi fisseena waaraammo. Kaba waare; an keese Gibxi uulla asse'oommo› yukko.

³⁵ «Isra'ee'l minaadab ‹Keese ni hanenne gassaanchoo oogataanchoo issukkok ayyette?› yita'a sabbo'i Muse'e, Waa'i gassaanchoo wolabbanonne fissaanchoo issaa udma'anne shif woronne moo'amu ixxi asse'amaanchi kollinne asse'ukko.

³⁶ Muse'em Gibxi uullanne, Ertiira'i Dambalaqannee uulli udma'annee maalalsiisoo luwwaa agannaa issukkuuyyi sor hiincho awwonsukko.

³⁷ Isra'ee'l minaadabina ‹Ki'nnuwwi abbaayyuwwiinsi Hiraagaanchi eese Waa'i ki'isukkisam[8] ki'nnuwwina ki'isookko› yukkok ka Muse'etteme.

³⁸ Siina'i duunanne ixxena wocu Waa'i asse'amaanchinne, niyyanno'innee udma'anne wixxu minaadabinnee hee'ukkok ka Muse'etteme. Ixxim niina afiseena heechchi sagara Waa'iinsi aa'ukko.

³⁹Niyyanno'i ixxo gafe'llo'o bagaan ixxena ijaajanto'oyyo. Ixxuwwim ixxuwwi wodanonne Gibxi uulla daba'lliteena mixxa'a

⁴⁰ Aaroonina ‹Ku neese Gibxi uulliinsi fissu Muse'e maha ihuda'e lanqummoyyo. Ni illagenne maroo waa'uwwa baxe› yito'o.

⁴¹ Ee ammanem wee'ichchi misila baxxa'a ee misilina kitima hincaa'lla'a ixxuwwi angi baxukkaannonne liiranto'o.

⁴² Ihukkaarem Waa'i ixxuwwiinsi annanni ihaa iima'n boollaanki gogotina otossitamisina higisaa uwwukko. Oohim hiraagaan kitaabbo'i kitaabbuwwanne ‹Isra'ee'l minaadaba, sor hiinchi afeebe'e udma'anne hee'llakko'i ammane duramoo diinatee kitimaa iina hincaa'llakko'oyyo.

⁴³Moolooka yakkam qophpha'n waa'ika dukkaana iyyitakko'o. Otossitakkeena baxxakko'i boollaanki misilam Erefaana yakkam qophpha'n waa'ika iyyitakko'o. Ee bikkina an ki'nnuwwa Baabiloo'n uulla qeessoommo› yamamaa kitaabamukkane.

⁴⁴ «Niyyanno'i udma'anne hee'llu'uuyyi Waa'inne edantam dukkaan hee'ukko. Oo dukkaanim baxamukkok Waa'i Muse'ena kurukkisinnettee moo'isu duuha'innettee.

⁴⁵ Niyyanno'im ixxuwwi anno'iinsi ee dukkaana aa'lla'a Waa'i hollu minaadaphphi uulla aaggu'uuyyi Iyyaasinne maqirem ee dukkaana iyyita'a matto'o. Oo dukkaan Daawiit doolli afeebe'e ee beyyonnem hee'ukko.

⁴⁶ Daawiitim Waa'i illagenne nuura siixxaa Yaaqoobik Waa'i[9] hee'oo mine baxeena Waa'a uunxukko.

⁴⁷ Ihukkaarem Waa'ina mine baxukkok Salamoonatte.

⁴⁸Salamoon mine baxona bagaan manni angi baxu minenne hundam xanoo Waa'i garooyyo.

⁴⁹ Oohim hiraagaanchi ‹Waa'i «Iiman Iina adilla'n barcuma. Uullim an hance'oommane. Ki'nnuwwi iina baxxakkam min hinkido'ane? Te'im an hee'oommi beyyi hinkido'ane?

⁵⁰Oo luwwi hundim i angi baxukkaneyyonnihe?» yoolla› yukkane.

⁵¹ «Ki'nnuwwi xiiqqantakkam keeno, ki'nnuwwi wodanim ifiisamaakkoo keeno, ki'nnuwwi maccim macceesoobee'i keenoo odim ki'nnuwwi anno'isam amman hundam Keesammi Ayyaan kuroo luwwa sabbakkam keenoo!

⁵²Hiraagaaniinsi ki'nnuwwi anno'i hawwissa'a yaayyitoo'n utto'ok ayyi yookko? Muccur awwaadaanchi waaroo'isa gaassita'a kutto'i keeno ki'nnuwwi anno'i shito'isam ki'nnuwwim ee muccur awwaadaancho higissakka'a uwwitakka'a shitakko'o.

⁵³Ki'nnuwwi odim Waa'i asse'amaaninne uwwamu Waa'i ijaajo aa'llakka'a egettakko'oyyo» yukko.

⁵⁴Oo manni eekka macceesso'i ammanenne Isxifaanoosinne nadadda'a inqe iicco'o.

⁵⁵Ihukkaarem Isxifaanoosanne Keesammi Ayyaan dillukkaare xuxxaa iimane moo'ukko. Iimanennem Waa'ika lombaa Yesuus Waa'i makkanne uullaakkookkokaa moo'ukko.

⁵⁶Ixxim «Moo'llehe! Iiman fooqaa Manchi Beetim Waa'aannonne makkanne uullaakkookkoka moo'oommuulla» yukko.

⁵⁷Ihukkaarem ixxuwwi sagara iimaa'lla'a shuutta'a wocoo woshsha macceessambee'isa macce ifiixxita'a mat ikka'a Isxifaanoos hanenne geetto'o.

⁵⁸Ee ammanem beero'iinsi tochchonne fissita'a kininne aphphisso'o. Woddaa'i naqaashshuwwim ixxuwwika eddechcha Saawula yakkam woraadichchi egeroo'isina ixxi lokki beyyonne dissito'o.

⁵⁹Ixxo aphphissonam Isxifaanoos «Moollanni Yesuusa, i foore at aa'e!» yukko.

⁶⁰Odim guruphphaa sagara iimaa'aa «Moollanna! Ixxuwwika baaxiilo haafihe» yaa Waa'a uunxukko. Eehid yaa Waa'a uunxaa lasage lehukko. Saawulim Isxifaanoos lehoo'isina iittamaa hee'ukko.