Read Hadiyya Asse'amaa'n Baxo 8 Bible Online

Asse'amaa'n Baxo 8 - Hadiyya bible

Asse'amaa'n Baxo 8

¹Ee balla Yerusaaleemanne hee'llo'i amma'nnaanonne kee'mmaalli hawwii yaayyanchii afukko. Yesuus asse'u keeniinsi bagaan mulli keen hundim Yihudannee Samaare'ennee binnito'o.

²Isxifaanoosam Waa'ina gatto'oo manni waammito'o. Lobakatam wi'llito'o.

³ Ihukkaarem Saawul min hundam aagukkuuyyi goonaa meentoo gosaasaa karaxxi minenne aagisimminne amma'nnaano bi'isam hee'ukko.

⁴Oo binnito'i amma'nnaanim matto'i beyyi hundannem Waa'i sagara kutto'o.

⁵Filiphphoosim Samaare'enne yoo beero'o maraa Kiristoos bikkina ee beero'i mannina alallaatukko.

⁶Habus dut keeniinsi sagara iimaa'aa laaraa firu bikkinaa shiihuwwii dimmuwwii lobakat fayye'am hee'u bikkinaa Filiphphoos wocam hee'u woshshaa issam hee'u agannaa minaadab hundim danaamisa qoossaa macceesamii moo'amii hee'ukko.

⁸Ee bikkina ee beero'onne lobakat liiranchi ihukko.

⁹Ihukkaarem ee beero'onne lobakat ammaniinsi ki'isaa kiiroo mat Simi'oona yakkam kiiraanchi hee'ukko. Ixxim kiirimminne Samaare'enne yoo minaadaba maalalsiisam hee'ukko. Odim ixxi gagam «An lobane» yam hee'ukko.

¹⁰Hoffaanniinsi ki'isaa lobaannonne afeebe'e manni hundim «Ku manchi Lob Malaayye yamamaa weeshamoo Waa'i malaayye» yaa ixxi woshsha danaamisa qoossaa macceesam hee'ukko.

¹¹Lobakat ammaniinsi ki'isaa Simi'oon kiirimminne minaadaba maalalsiisam hee'u bikkina ixxi wocoo woshsha danaamisa qoossaa macceesam hee'ukko.

¹²Ihukkaarem Filiphphoos Waa'i adilla'n bikkinaa Yesuus Kiristoos bikkinaa mishiraachchi sagara kurukkaare macceesaa amma'nnimminne goonii meentii xammaqamukko.

¹³Simi'oon ixxi gagim amma'nnaa xammaqamaa lasage Filiphphoos exxukko. Ixxim dut mare'ii lobakat agannii ihookkoka moo'aa maalalukko.

¹⁴Yerusaaleemanne hee'llo'i Yesuus asse'u keen Samaare'i uulli manni Waa'i sagara aa'llo'isa macceesso'i ammanenne Pheexiroosaa Yohaannisaa ee manni beyyo asse'llo'o.

¹⁵Oo Samaare'i uulli manni xale'i Moollanni Yesuus summinne xammaqanta'a hee'llo'o bagaan ixxuwwanne matonnem Keesammi Ayyaan dillukkoyyi hee'ukko. Ee bikkina Pheexiroosii Yohaannisii ixxuwwi beyyo matta'a oo manni Keesammi Ayyaana aa'llamisina Waa'a uunxito'o.

¹⁷Lamim ee manni hanenne anga issita'a Waa'a uunxito'i ammanenne oo manni Keesammi Ayyaana aa'llo'o.

¹⁸Yesuus asse'u keen manni hanenne anga issito'aare Keesammi Ayyaan dillukkisa Simi'oon moo'aa «Anim hanenne i anga issoommi manchi Keesammi Ayyaana aa'oo'isina ka malaayye iinam uwwehe» yaa Pheexiroosaamina diinate eebukko.

²⁰Ihukkaarem Pheexiroos ixxena dabaraa «Waa'i uwwoo uwwancha at diinatinne aa'lleena sawwitti bikkina ki diinat kiinninne maqirem bi'ona.

²¹Kiikki wodan Waa'i illagenne xabbeen ihubee'i bikkina ka woshshanne kiina qood te'im saam bee'e.

²²Odim at jor to'achchinne wo'mmittisaa baaxiil keese karaa amadukkisaa moo'ummi bikkina at ki boqqoomiinsi saxxitaa daba'llitaa ayyi la'ukko ki woda'n jor sawwite Waa'i haafoo'isina Waa'a uunxe» yaa dabarukko.

²⁴Simi'oonim dabaraa «Ki'nnuwwi yitakko'i luwwik ma'lluchchim eesenne afoobee'isa Waa'a uunxehe» yukko.

²⁵Pheexiroosii Yohaannisii Waa'i sagara alallaatta'atii kutta'atii lasage Samaare'i uulli lobakat gattenne mishiraachchi sagara kuttu'uuyyi Yerusaaleema daba'llito'o.

²⁶Moollanni asse'amaanchim Filiphphoosina «Ka beyyiinsi ki'llaa Yerusaaleemiinsi Gaaza yakkam beyyi afeebe'e massoo googinne woroo'n qaranne yoo uulli kolli mare» yukko. Oo googim udma'i uulli goog hee'ukko.

²⁷Filiphphoosim ki'aa marukko. Maraa Hindaake yakkam Tophphe'i adilaka amaxxa hundam egeraanchi ihu Tophphe'i uulli mat muleessa'i manchinne edamukko. Ixxim Yerusaaleema Waa'ina otosseena waaraa

²⁸faraxxi gaare'enne saa'llaa daba'llaa elle'ukkuuyyi hiraagaanchi Issaayyaas kitaabu kitaaba qananaa'am hee'ukko.

²⁹Keesammi Ayyaanim Filiphphoosina «Mattaa ee gaare'enne hincihe» yukko.

³⁰Ee bikkina Filiphphoos ee manchi beyyo geeraa maraa hiraagaanchi Issaayyaas kitaabu kitaaba qananaa'ookkoka macceesaa «Qananaa'lloo woshsha qoossitaatennihe?» yaa xa'mmukko.

³¹Ixxim Filiphphoosina dabaraa «Kurookkok bee'eka hinkid qoossaa la'eena xanoommo?» yaa gaare'enne firaa ixxenne maqirem afuuroo'isina Filiphphoosa xa'mmukko.

³² Kitaabiinsi oo muleessa'i qananaa'am hee'u beyyim «Durakkeena massakkam gereechchisa te'im odda muroo manchi illagenne duudaa cawwaa uroo gereechchisa ixxi suume fooqaa'ukkoyyo.

³³Ixxi gagam hoffiisukko. Hanqo'i oogato'om siixxukkoyyo. Ixxim ka uullanne hee'oobee'isa shakka'a hoorakko'i bikkina ixxeka shumo'o ayyi kureena xanookko?» yoohan hee'ukko.

³⁴Oo muleessa'im Filiphphoosina «Hay kure! Ku hiraagaanchi kid yookkok ixxi gaginattennii mulli manchinatte?» yukko.

³⁵Filiphphoosim ee kitaabiinsi ki'isaa Yesuusika mishiraachchi sagara ixxena kurimma asheerukko.

³⁶Googo amadda'a mattu'uuyyim wo'i yoo beyyo affo'aare oo muleessa'i Filiphphoosina «Ka moo'e! Wo'i keyye yookko. Xammaqameena eese mah hoorookko?» yukko. [10]

³⁸Eehid yaa faraxxi gaare'e uullisiisukko. Ee lasage muleessa'ii Filiphphoosii lamim wo'i woro dillita'a Filiphphoos muleessa'a xammaqukko.

³⁹Xammaqaa lasage lamim wo'i woriinsi fitto'aare Keesammi Ayyaan Filiphphoosa agaa massaa lasage oo muleessa'i la'mmaagge Filiphphoosa moo'ukkoyyo. Muleessa'im liiramukkuuyyi marukko.

⁴⁰Ihukkaarem Azaaxoosa yakkam beyyonne Filiphphoos siidamukko. Ixxim Qiisaariya yakkam beero'o marukkuuyyi beero'uwwi hundinam mishiraachchi sagara alallaatukko.