Read Hadiyya Asse'amaa'n Baxo 9 Bible Online

Asse'amaa'n Baxo 9 - Hadiyya bible

Asse'amaa'n Baxo 9

¹Ee ammane odim Saawul amma'nnaano sheena sha'llamukkuuyyi hundiinsi lob qeessichchi beyyo marukko.

²Maraa Moollannanne amma'nnito'i keeno goonaa meentoo siidukkoka ayyem amadaa Yerusaaleema eeboo'isina Damaasqo'o yakkam beero'onne yoo Ayihuxxi manni wixxixxi minneewwina assi kitaaba kitaabaa uwwoo'isina hundiinsi lob qeessichcho xa'mmukko.

³Assi kitaaba amadaa marukkuuyyi Damaasqo'o afeena ihaakkoohaannonne dangonnem iimaniinsi caakki ixxi kululleetanne belelukko.

⁴Belelu ammanenne Saawul uullanne ubukko. Ee ammanenne «Saawula! Saawula! Eese mahina hawwissoolla?» yoo sagara macceesukko.

⁵Saawulim dabaraa «Moollanna! At ayyette?» yukkaare «An at hawwissoo Yesuusatte.

⁶At ki'llaa beero'o mare. Issitoo luwwa kiina eekke'enne kurakkamo» yukko.

⁷Saawulinne maqire mattam hee'llo'i keen cawwita'a uullita'a sagara macceessam hee'llo'o bagaan ixxuwwi illinne mat manchom siiddo'oyyo.

⁸Saawulim ubu beyyiinsi ki'aa ixxi ille boloqaa'u ammanenne maham moo'eena xanukkoyyo. Ee bikkina ixxenne maqire hee'llo'i keen masakkita'a Damaasqo'i beero'o massito'o.

⁹Ixxek illi sas balli afeebe'e moo'eena xanukkoyyo. Saawulim ee sasem ballannem itukkoyyoo agukkoyyoo.

¹⁰Ee ammane Damaasqo'onne Hanaaniya yakkam amma'nnaanchi manchi hee'ukko. Moollanni ixxena kaaltanne «Hanaaniya» yukkaare ixxim «Moollanna! An keyyenne yoommo» yukko.

¹¹Moollannim ixxena «Ki'llaa Xabbeena yakkam bobba'a mattaa Yihuda yakkam manchi minenne Saawula yakkam manchi Xarsees beero'ik Waa'a uunxoolla; mattaa xa'mme.

¹²Odim ixxek illi fayye'aa moo'oo'isina Hanaaniya yakkam manchi aagaa ixxi anga hanenne issukkuuyyi kaaltinne moo'aakko» yukko.

¹³Hanaaniyim Moollannina «Moollanna! Ku manchi Yerusaalee'm beero'onne hee'llam at doo'llitti ki minaadabanne hinkaa'n jor luwwa issuda'e lobakat manniinsi ka manchi bikkina macceesaammo.

¹⁴Odim ki summa weeshsham keeno hundam ka beyyiinsi amadaa karoo'isina qeessa awwonsaaniinsi malaayye siixxaakko» yaa dabarukko.

¹⁵Ihukkaarem Moollanni Hanaaniyina «Isra'ee'l minaadabina, mulli minaadabinaa, adilluwwinaa eese la'isoo'isina an ixxo doo'llaammoo mu'ut ihu bikkina mare.

¹⁶I summi bikkina ixxi hinkaa'nna hawwooda'e an ixxena moo'isoommo» yukko.

¹⁷Ee bikkina Hanaaniy annanni ihaa maraa Saawul yoo mine aagaa Saawul hanenne anga issaa «Iyyabbaayyi Saawula, at waattitti googonne kiina moo'amu Moollanni Yesuus keesenne Keesammi Ayyaan dilloo'isinaa ki illi fayye'aa moo'oo'isinaa eese ki beyyo asse'aakko» yukko.

¹⁸Ee ammanem Saawul illiinsi hobara laboo luwwi ubukkaare ixxi illi fayye'aa moo'ukko. Ee lasage xammaqamaa

¹⁹hurbaata itaa qoxxukko. Amma'nnaaninne maqirem Saawul Damaasqo'onne mat qax balla afuurukko.

²⁰Ee ammanem Ayihuxxi manni wixxixxi minneewwanne «Yesuus Waa'i Beeto» yukkuuyyi alallaatukko.

²¹Eekka macceesso'i keen hundim maalalta'a «Ku manchi ka Yesuusa yakkam summa weeshsham keeno Yerusaaleemanne lobakata hawwisam hee'ukkoyyonnihe? Keyye waarukkokim ee summa weeshsham keeno amadaa karaa qeessa awwonsaa'n beyyo masseenatteyyonnihe?» yito'o.

²²Ihukkaarem Saawul amma'nnatonne lobakata qoxxukkuuyyi marukko. Odim Yesuus Gatisaanchi Kiristoosatte ihukkisa kurukkuuyyi Damaasqo'onne hee'llam Ayihuxxi manni maalaltamisa issukko.

²³ Lobakat ammaniinsi lasage Ayihuxxi manni Saawula shitam googo a'llanto'o.

²⁴Ee a'llanto'i woshsham Saawul la'ukko. Ixxuwwim kininne ootakko'oo beero'i goocanne ballaa hiimoo ixxo shiteena egettam hee'llo'o.

²⁵Ihukkaarem amma'nnaan ixxo hiimonne massita'a sanannanne issita'a beero'o kululaa'akka'a kininne ootakko'i ooxxi haninne aad dilliisso'o.

²⁶Saawul Yerusaaleema maraa amma'nnaaninne edameena hasukko. Ihukkaarem ixxuwwi Saawul amma'nnaanchi ihukkisa amma'nnitobee'i bikkina hundim baddito'o.

²⁷Ee lasage Baarnabaasa yakkam manchi Saawula Yesuus asse'u kee'n beyyo amadaa maraa Saawul googonne Moollanna moo'ukkisa, Moollannim ixxenne wocukkisaa Saawulim Damaasqo'onne baddoo'n Yesuus summa haraassaa alallaatukkisaa kurukko.

²⁸Saawulim ixxuwwinne maqire afuuraa Yerusaaleemanne baddoo'n Moollanni Yesuus summa iggimminne alallaatukkuuyyi daba'llamam hee'ukko. Giriik suuminne woccam hee'llo'i Ayihuxxi manninam kurukkaare ixxenne fitanta'a ixxo shiteena hasso'o.

³⁰Shiteena hasso'isa amma'nnaan laqqo'i ammanenne Qiisaariya yakkam beero'o wotta'a Xarses beero'o maroo'isa issito'o.

³¹Yihuxxi uullanne, Galiilannee Samaare'ennee hee'llam amma'nnaan hundim xumma siixxito'o. Amma'nnaanim Keesammi Ayyaa'n hara'mmatinne Waa'a badditu'uuyyi, qoxxitu'uuyyii xigonnem fikkaannitu'uuyyii matto'o.

³²Ee ammane Pheexiroos beyyi hundam marukkuuyyi Liida yakkam beero'onne hee'llam Waa'i doo'llaakkoo minaadaba moo'eena marukko.

³³Ee beyyonnem sadeenti hiincho dees manchi ihaa shiihaakkoo Eeniyaasa yakkam manchinne edamukko.

³⁴Pheexiroosim ixxena «Eeniyaasa, Yesuus Kiristoos keese fayyiisaakko; ki'llaa dakka ki'ixxe» yukkaare Eeniyaas ee ammanchom ki'ukko.

³⁵Liidannee Saaroonannee hee'llam manni hundim ee fayye'u mancho moo'llo'i ammanenne Moollannanne amma'nnito'o.

³⁶Xaabbiita yakkam mat amma'nnaanchi meentichcho Iyyoophe'e yakkam beero'onne hee'llo'o. Isek summi Giriikisinne Doorqa'atte [11] hee'ukko. Isem danaam baxo baximminnee buxina eroomma issimminnee la'anto'ookkotan hee'llo'o.

³⁷Ee ammane oo meentichcho jabbita'a leto'aare iseka leesha aanshakka'a fooqanne dissakko'o.

³⁸Oo Liida yakkam beero'i Iyyoophe'ina abbis hee'u bikkina Pheexiroos Liidanne yoo'isa amma'nnaan macceessa'a Pheexiroos beyyo «Hay qaqqissaa ni beyyo waare» yita'a lam mancho asse'llo'o.

³⁹Pheexiroosim ki'aa ixxuwwinne maqirem Iyyoophe'e maraa afu ammanenne fooqanne fissakko'o. Eekke'em busar meenti hundim ixxi gadanonne uullita'a wi'llitu'uuyyi Dorqa'a ixxuwwinne maqire hee'llo'i ammane baxxo'i qambiissuwwaa mulli eddechchaa moo'issam hee'llo'o.

⁴⁰Ihukkaarem Pheexiroos manni hundam biira fissaa guruphphaa Waa'a uunxukko. Ee lasage leesh kollonne daba'llaa «Xaabbiita, ki'e!» yukko. Isem ille fooqaa'lla'a Pheexiroosa moo'llo'i ammanenne ki'lla'a afuutto'o.

⁴¹Pheexiroosim iseka anga amadaa iimaa'aa ki'isaa lasage Waa'i doo'llu minaadabaa busar meentoo weeshaa isek foor daba'llukkaare ixxuwwina uwwukko.

⁴²Oo woshshi Iyyoophe'enne yoo manni hundinam macceesamukkaare lobakat manni Moollannanne amma'nnukko.

⁴³Pheexiroosim omachcho duugoo Simi'oona yakkam manchinne maqirem Iyyoophe'enne lobakat balla afuurukko.