Read Hadiyya Oroome'i Asso 1 Bible Online

Oroome'i Asso 1 - Hadiyya bible

Oroome'i Asso 1

¹Yesuus Kiristoosina awwaadaanchi ihummok, asse'amaanchi ihoommisinam weeshamummokii Waa'ika mishiraachchi sagara kuroommisina Waa'i annanni issukkokii an Phaawuloos kaka kitaabaammo.

²Oo mishiraachchi sagarim gaassaatim hiraagaaninne Keesammi Kitaabanne Waa'i aagu neeyyata.

³Mishiraachchi sagarim kurookkok maara edde'aa Daawiit shumo'iinsi qaramu Waa'i Beet bikkinatte.

⁴Ee'isam Waa'iinsette ihukkisa Keesammi Ayyaaninne lehiinsi ki'imminne la'isu malaayyaam Waa'i Beet ni Moollanni Yesuus Kiristoos bikkinatte.

⁵Minaadab hundim Kiristoosanne amma'nnaa ixxena ijaajamoohaare lomba siixxoo'isina manna ixxi kollonne wolleena neesem ixxeensi eroommaa asse'amaan ihimmaa siixxinaammo.

⁶Ki'nnuwwim ixxuwwinne maqirem Yesuus Kiristoosan ikkakkamisina weeshantakko'ookko.

⁷Ixxi minaadab ikkakkamisina Waa'i weeshu ki'nnuwwina Oroomanne hee'llakkam Waa'i iittoo keenina hundinam niyyanni Waa'iinsii Moollanni Yesuus Kiristoosiinsii eroommii xummii ihona.

⁸Ki'nnuwwik amma'nnat uulli hundinam la'amu bikkina gaassaa Yesuus Kiristoosinne ihaa ki'nnuwwi hundi bikkinam Waa'a galaxxoommo.

⁹An ki'nnuwwi bikkina hundi ammanem Waa'a uunxoommisa ixxi Beetika mishiraachchi sagara kurummuuyyi i wodaninne guullaa awwaadoommi Waa'i la'ookko.

¹⁰Kabadem ihukkaare xanumlas Waa'i yukkaare ki'nnuwwi beyyo waareena Waa'a uunxoommuulla.

¹¹Mashka'oomim ki'nnuwwi qoxxitakkamisina Keesammi Ayyaa'n uwwancha ki'nnuwwina baxxanseenaa ki'nnuwwa moo'eenaa quluxoommo.

¹²Oohim neesena'i neesem niina annannichchinam yoo amma'nnatinne mateeyyoomannem qoxxixxammoommisinatte.

¹³ Iyyabbaayyuwwa, mulli minaadaphphi lambe'enne issummisam ki'nnuwwi beyyonnem manna amma'nnatonne dabaroommisina ki'nnuwwi beyyo waareena lobakat ammane mixaa hee'ummisa laqqakkona hasoommo. Ihukkaarem waaroombee'isa mada'e hoorukko.

¹⁴An lachchi yoo keeninaa lachchi bee'i keenina, losu keeninaa tunneewwinaa mishiraachchi sagara kuroommisina eesenne badanchi yookko.

¹⁵Ee bikkina Oroomanne hee'llakkam ki'nnuwwinam mishiraachchi sagara alallaateena gudaammo.

¹⁶ Gaassaa Ayihuxxi minaadaba odim mulli minaadaba, amma'nnu keen hundam gatiseena mishiraachchi sagar Waa'i malaayyi ihu bikkina kureena tuuroommoyyo.

¹⁷ Mashka'oomim Keesammi Kitaabanne «Amma'nnatinne muccurukkok amma'nnatinnem hee'ookko» yamamaa kitaabamukkisam asheero'iinsi ki'isaa goollo'onne afeebe'em Waa'i manna muccussookkok amma'nnatinnette ihukkisa mishiraachchi sagaranne caakkaakko.

¹⁸Ixxuwwi boqqoominne Waa'ika hanqa wor amadda'a Waa'a badditambee'i keenonnee boqqi keenonnee hundannem Waa'ik quunqi iimaniinsi dillookko.

¹⁹Mashka'oomim Waa'i ixxi bikkina la'immi hasisoo luwwa ixxuwwina caakkisu bikkina Waa'i bikkina la'immi hasisoo luwwi caakka.

²⁰Waa'ik moo'amoobee'i qoocci oohim heer heerina hee'oo malaayyii Waa'oomii hundi luwwim qooccamukkaanniinsi ki'isaa qooccamu luwwinne caakkaa la'amu bikkina ixxuwwi baaxiilina dabaabuttam luwwi bee'e.

²¹ Waa'a laqqo'aarem ixxena laboo lombaa galataa uwwito'oyyo. Ihukkaarem ixxuwwik sawwit awwaad bee'an ihukko. Oo awwaad bee'i sawwitim tuunsukko.

²²Ixxuwwi gaga qoolluwwa yaqqitu'uuyyim qawwuwwi ikko'o.

²³ Hee'oo Waa'ikam lomba lehoo manni misilanne te'im cii'i misilanne te'im diinaxxi misilanne te'im maanxogannisa biqinne maroo luwwi misilanne dabatto'o.

²⁴Ee bikkina ixxuwwina'i ixxuwwim ixxuwwi orachcho haashaassoo luwwa issitamisina Waa'i ixxuwwi woda'n jor mixa'n fokko'ina higisaa uwwukko.

²⁵Eehid issukkokim Waa'ika hanqa qophphanonne dabatto'i bikkinattee qooccukkaanni bikkenne qooccamu luwwina otossita'a awwaaddo'i bikkinattee. Waa'i heer heerinam maasse'amaakkoohane; eeyya maasse'amaakkoohane.

²⁶Ee bikkina Waa'i ixxuwwa tuussiisoo mixanina higisaa uwwukko. Ixxuwwik meenti gooninne laboo edancha edamimma utta'a laboobee'isa ikko'o.

²⁷Goonim meentinne laboo edancha edamimma utta'a saa'immi mixaninne muxmuxitu'uuyyi ixxuwwina'i ixxuwwim edanto'o. Ee'isa ihimminne goon ixxuwwi huushanchina laboo hawwo ixxuwwi gaganne eebaqqito'o.

²⁸Odim Waa'a laqqeena hassobee'i bikkina issimmina laboobee'i luwwa issitamisina awwaad bee'i sawwitina Waa'i higisaa uwwukko.

²⁹Ixxuwwik heechchi boqqoominne, jollinne, mixaninne, jor sawwitinne, to'achchimminne, manna shimminne, wocanchinne, qawwiishshinnee janninnee hundinnem wo'mmaakkoohane. Ixxuwwim hamaano,

³⁰game'llantam keeno, Waa'a sabbam keeno, manna sholliissam keeno, bolxitam keeno, amaaddam keeno, jora issakkam googo qooccitam keeno, amo'inaa anno'inaa ijaajantambee'i keeno,

³¹qawwuwwa, amma'nnanchi bee'i keeno, tiir bee'i keenoo qishixxat bee'i keenoo.

³²Eehido'i luwwa issukkaannina «Leh hasisookko» yaa Waa'i wocukkisa laqqu'uuyyim eekka issitamo. Issimmi xale'em ihoo'n mulli keenim eekka issitamisina gafe'ansitamo.