Read Hadiyya Oroome'i Asso 10 Bible Online

Oroome'i Asso 10 - Hadiyya bible

Oroome'i Asso 10

¹Iyyabbaayyuwwa, i mixanii Waa'a uunxoommi uunxatii Isra'ee'l minaadab gatoo'isinatte.

²Hanqo'i lachchinnette ihubee'aarem Waa'i woshshina to'achchitamisa an la'oommo.

³Waa'i beyyiinsi waaru muccurooma sabba'a ixxuwwi gaqqi muccurooma qoxxisseena hassu'uuyyim Waa'i gudisu muccurooma aa'llo'oyyo.

⁴Ixxonne amma'nnukkok hundim muccuroo'isina Seera Kiristoos guullaakko.

⁵ Muse'em seera egerimminne siidamoo muccuroo'm bikkina «Seera egerookkok gatookko» yaa kitaabaakko.

⁶ Ihukkaarem amma'nnatinne siidamoo muccuroo'm bikkina Keesammi Kitaab «Ki wodanonne ‹Ayyi iimane firookko?› yitaa sawwititte» yaakko. Eehid yukkokim Kiristoosa aad dilliiseenatte.

⁷Te'im «Ki wodanonne ‹Si'oolanne ayyi dillookko?› yitaa sawwititte» yaakko. Oohim Yesuusa lehiinsi ki'iseenatte.

⁸Odim Keesammi Kitaabanne «Waa'i sagar yookkok ki gadanonnette, ki suumennettee ki wodanonnettee» yamamaakko. Oo sagarim neese kulloommi amma'nnaxxi sagara.

⁹Yesuus Moollanni ihukkisa ki suuminne kuttittaaree Waa'im ixxo lehiinsi ki'isukkisa ki wodaninne amma'nnittaaree gattootto.

¹⁰Mashka'oomim manni wodaninne amma'nnaa muccurookko; amma'nnukkisam suuminnem kuraa gatookko.

¹¹ Keesammi Kitaabim «Ixxonne amma'nnookkok ayyim tuurooyyo» yaakko.

¹²Kaba Ayihuxxi minaadaphphaannonnee mulli minaadaphphi lambe'ennee annannoom bee'e. Hundikim Moollanni mexxo'i Waa'a. Ixxi summa weeshoo keen hundinam ixxeka lophphaakkoo maasso uwwookko.

¹³ Mashka'oomim Keesammi Kitaabanne «Waa'ika summa weeshookkok ayyim gatookko» yamamaakko.

¹⁴Ihukkaarem manni amma'nnubee'eka hinkid weeshookko? Ixxi bikkina macceesubee'ekdu hinkid amma'nnookko? Kurookkok bee'ekdu hinkid macceeseena xanookko?

¹⁵ Asse'amubee'i mandu hinkid kureena xanookko? Keesammi Kitaabanne «Mishiraachchi sagara kuroo kee'nnek lokki hinkido'i shaamaamo» yamamaa kitaabamaakko.

¹⁶ Ihukkaarem Issaayyaas Kitaabanne «Moollanna! Neese kullummi woshsha ayyi amma'nnukko?» yamamaa kitaabamukkisam mishiraachchi sagara hundi amma'nnukkoyyo.

¹⁷Ee bikkina amma'nnat waarookkok macceesakko'i luwwiinsette. Macceesakkamokim Kiristoos bikkina kuramu luwwa.

¹⁸ An xa'mmoommok ixxuwwi macceesso'oyyonnihe? Hanqinam macceesso'ookko. Mashka'oomim Keesammi Kitaab «Ixxuwwik sagar [2] uulli hundam afaakko. Ixxuwwi kutto'i woshshim uulli tochchi hundam afaakko» yamamaa kitaabamaakko.

¹⁹ Odim an xa'mmoommok Isra'ee'l minaadab qoossito'oyyonnihe? Muse'e gaassaatim «Mulli minaadabinne ki'nnuwwa to'achchisoommo. Qoossoobee'i minaadabinnem ki'nnuwwa nadadiisoommo» yaakko.

²⁰ Ee'isam Issaayyaasim «Eese hassobee'i keenina siidamummo; ‹Hannonne yookko?› yita'a xa'mmitobee'i keeninam la'amummo» yaa caakkisaa wocaakko.

²¹ Ihukkaarem Isra'ee'l minaadaphphi bikkina «Ijaajamoobee'i boqqi minaadabina balli hundam i anga biddiqaa'ummo» yaakko.