Read Hadiyya Oroome'i Asso 11 Bible Online

Oroome'i Asso 11 - Hadiyya bible

Oroome'i Asso 11

¹ Eehannata'i an xa'mmoommok Waa'i ixxi minaadaba sabaatennihe? Hore'em ee'isayyo. An i gagim Abrihaam shumo'iinsi Biiniyaam moolliinsi qaramaammoo Isra'eelcho.

²Waa'i gaassaatim doo'llu ixxi minaadaba sabukkoyyo. Eeliyaas Isra'ee'l minaadaba Waa'anne kasasu ammane Waa'i mayyuda'e Keesammi Kitaab yookkoka laqqakkamoyyonnihe?

³ «Moollanna! Hiraagaano shito'ookko. Kiina kitimakkam beyyuwwam gindito'ookko. Kaba mexxo'i an gataammo. Eesem shiteena hassamuulla» yukkaare

⁴ Waa'i mayyaa dabarukko? «Ba'aalina guruphphita'a otossitobee'i kee'nneka lamar kum manna i gagina gatixxaammo» yukko.

⁵Ee bikkina kabadem Waa'i eroomminne doo'llanto'i kee'nnek baraar yookko.

⁶Gatimmi Waa'i eroomminnette ihulas eehannata'i bax maham awwaadooyyo. Eehid ihubeelas Waa'ik eroommi eroomma yamameena xanamooyyo.

⁷Eehannata'i mah erane? Isra'ee'l minaadab hassam luwwa siiddoo'n gatto'ookko. Ihukkaarem doo'llanto'i keen siiddo'ookko. Gattoqax ixxuwwika wodano duudisso'ookko.

⁸ Oohim Keesammi Kitaabanne «Waa'i ixxuwwika tiiro jallaa'ukko. Kaballi afeebe'em ixxuwwina moo'oobee'i illee macceesoobee'i maccee uwwukko» yamamukkane.

⁹ Daawiitim «Ixxuwwik maaddi ixxuwwina qaasha, shikkaa, woshaadaa ihaa ixxuwwa hawwisona.

¹⁰Moo'llambee'isa ixxuwwik illi qooqona. Ixxuwwik afar heer heerinam quutona» yaakko.

¹¹An xa'mmoommok Isra'eel qolanto'ok ki'llambee'isa ubbeenannihe? Hore'em ee'isayyo. Ixxuwwi ijaajancha sabimminne mulli minaadabina gatimmi waarukko. Oohim ihukkok Isra'eela to'achchisimminatte.

¹²Kaba ixxuwwik ijaajancha sabimmii ubimmii mulli minaadabina maasso eebukkaa'lleensi Ayihuxxi minaadab hundim daba'llitota'n maassi hinkaa'nna lophphookko.

¹³Kaba an mulli minaadabina kuroommo; an ki'nnuwwina asse'amaammoohan ihummisinnem iina qarmanni ihu Ayihuda to'achchisaa ixxuwwiinsi mat mat keeno gatisoommisina an awwaadoommi awwaado lonsoommo.

¹⁵Ixxuwwik mogodo'oom mulli minaadaba Waa'inne iittansukkaa'lleensi ixxuwwik daba'llimmi hinkid ihookkoka labissakka'ate? Hore'em lehiinsi ki'immisa.

¹⁶Buko'iinsi sarakka'a uwwakko'i lud keesamaakkoohan ihulas buko'i hundoomim keesamaakkoohane. Xaph keesamaakkoohan ihulas caaffuwwim keesamaakkoohane.

¹⁷Ihukkaarem caafik mat qax iiqamukkaare at udma'i uulli weer Waa'i maassika baxxantoo'isina caaffuwwi iiqamu beyyonne sikitantaatto.

¹⁸Ee bikkina ee iiqamu caaffuwwa gadditte. Gaddilas keese iyyukkok xapha bagaan at xapha iyyitbee'isa sawwihe.

¹⁹Ayyi la'ukko at «Ixxuwwi beyyonne an sikitamoommisina caaffuwwi iiqamukko» yitootto.

²⁰Ookki hanqame. Ixxuwwi iiqanto'ok amma'nnato hoogimminnette. Ihukkaarem at amma'nnatonne qoxximminne uullitaatto. Ee bikkina badde bagaan bolxititte.

²¹Mashka'oomim siram aminne hee'u caaffuwwinam qishixxubee'i Waa'i kiinam qishixxooyyo.

²²Waa'ika qishixxatoo muraasoomaa qoosse. Muraasoom ubbo'i keeninatte; ihukkaarem at ee qishixxatonne hee'llilas Waa'ik qishixxat kiinatte. Eehid ihubeelas atim murantootto.

²³Ayihuxxi minaadabim amma'nnimma sabimmiinsi daba'llitolas eraa'l beyyonnem daba'llitamo. Mashka'oomim Waa'i eraa'l beyyonne dabareena xanookko.

²⁴At siranne hee'llitti udma'i uulli weeriinsi murantaa sira kiihan ihubee'i kaasamaakkoo weeranne sikitantittaa'lleensi kaasamu weerina siram caaf hee'llo'i keen eraa'l ixxuwwi weerannem daba'llimmi hinkaa'nna sholle'aalla.

²⁵Iyyabbaayyuwwa, ki'nnuwwi wodanonne qoor manni ikkakko'isa sawwitakkambee'isina mat maaxamaakkoo woshsha ki'nnuwwina kuroommo. Mulli minaadaphphek doo'llantoqax hundim Waa'i beyyo waatteebe'e kolli Isra'ee'llek wodan duudaakko.

²⁶ Ee bikkina Isra'eel hundim gatookko. Keesammi Kitaabannem «Gatisaanchi Xiyooniinsi waarookko. Waaraa Yaaqoob shumo'iinsi baaxiilo shiinshaa hoorookko.

²⁷ Ixxuwwika baaxiilo shiinshaa hooreena aagoommi hidiro ee'isinne wonshoommo» yamamaakko.

²⁸Isra'ee'l minaadab mishiraachchi sagara sabbo'i bikkina Waa'ina maso'o. Ookki ki'nnuwwina danaamo. Ihukkaarem doo'llanchisanne ixxuwwi anno'i bikkina Waa'i iittoo keeno.

²⁹Mashka'oomim Waa'i uwwu uwwanchinaa weeshu weeshanchinaa saxxooyyo.

³⁰Ki'nnuwwi eraare Waa'ina ijaajantakkambee'i keen hee'llakko'o. Ihukkaarem kaba Isra'eel ijaajancha sabimminne haafite siixxitakko'ookko.

³¹Waa'i ki'nnuwwina moo'isu haafite Isra'eelim siixxitamisina kaba ijaajanto'oyyo.

³²Waa'i manni hundinam haafoo'isina manni hundam ijaajancha sabimmanne ixxi quraannaakko.

³³ Waa'aannina lophphaakkoo eroommina, qooroominaa lachchinaa hoola! Ixxeka oogato'o ayyim saarayyeena xanooyyo. Ixxeka googo ayyim la'ooyyo.

³⁴ Keesammi Kitaabannem «Waa'ika sawwite ayyi la'ookko? Te'im ixxo sogookkodu ayyette?

³⁵ Te'im Waa'i dabaraa miqoo'isina ixxena liqaayyisookkodu ayyette?» yamamaa kitaabamaakko.

³⁶ Hundi luwwim siidamukkok ixxeensette; ixxi kollinnettee ixxennettee. Ixxena heer heerinam lombi ihona! Aameen.