Read Hadiyya Oroome'i Asso 12 Bible Online

Oroome'i Asso 12 - Hadiyya bible

Oroome'i Asso 12

¹Iyyabbaayyuwwa, ki'nnuwwika orachcho Waa'a liiransoo'isina keesamaakkoo hee'oo kiti'mmisa issitakka'a Waa'ina hincaa'llakkamisina Waa'i qishixxatinne an ki'nnuwwa uunxoommo. Oohim Waa'ina garakka'a otossimma.

²Ka lasage ki'nnuwwik tiir haareechchi ihona bagaan ka uulli manni jor sawwite awwontakkotte. Oohim Waa'a liiransoo danaam muccur sawwit mada'e ihukkisa moo'llakka'a laqqakkamisinatte.

³Waa'i ki'nnuwwina uwwu amma'nnaxxisa tiirinne sawwi'llehe bagaan sawwimmi hasisoohaanniinsi hanaan sawwitakkambee'isina iina uwwamu eroomminne an ki'nnuwwina hundinam kuroommo.

⁴ Niihaannonne orachchonne lobakat qaamafeet hee'ukkaarem ee qaamafeettuwwik bax matoyyo.

⁵Ee'isam neesem dut keen inkummaarem Kiristoosinne mat orachcho. Neese hundim mat manchonne yoo qaamafeettuwwisa.

⁶ Waa'i ixxi eroomminne niina uwwu annanni annanni uwwancha awwaaxxinona. Niina uwwamukkok hiraagimmi ihulas niina yoo amma'nnaxxisinne hiraangona.

⁷Niina uwwamukkok awwaadimmi ihulas awwaandona. Niina uwwamukkok losisimmi ihulas losinsona.

⁸Qoxxisookkokim qoxxisona. Tasbo'o uwwookkokim liiranchinne uwwona. Gassookkokim qoxxaa gassona. Haafookkok liiranchinne haafihona.

⁹Ki'nnuwwik iitti hanqo'an ihona. Jora sabbehe; danaam luwwa qoxxissakka'a amaddehe.

¹⁰Ki'nnuwwina'i ki'nnuwwim abbaayyuwwisa iittammehe. Ki'nnuwwina'i ki'nnuwwim lonsaqqammehe.

¹¹Keesammi Ayyaaninne iibbitakka'a Moollannina awwaaddehe bagaan ceentakkotte.

¹²Neeyyatonne liirammehe. Hawwo iyyaqqitakkam keen ikkehe. Hundi ammanem Waa'a uunxehe.

¹³Hawwu amma'nnaanina hara'mmehe. Koyya aa'llehe.

¹⁴ Ki'nnuwwa hawwisoo keeno maasse'llehe bagaan duuntakkotte.

¹⁵Liiramoo keeninne maqirem liirammehe; wi'lloo keeninnem wi'llehe.

¹⁶ Ki'nnuwwina'i ki'nnuwwim mateeyyoominne hee'llehe. Ki'nnuwwi gaga hoffiissehe bagaan birantakkotte. Iinniinsi manbee'e yitakkotte.

¹⁷Manni hundinam liiransoo luwwa issehe bagaan jora issu manchina dabattakka'a jora issitakkotte.

¹⁸Ki'nnuwwina xanamoohan ihulas manni hundinnem iittantakka'a hee'llehe.

¹⁹ Iittantakko'oo iyyabbaayyuwwa, Keesammi Kitaabanne «Waa'i ‹Baado miqisimmi iihane; an baado miqisoommo› yoolla» yamamaa kitaabamu bikkina Waa'i oogatona ullehe bagaan ki'nnuwwi anginne baado miqissakkotte.

²⁰ Ee bikkina «Ki diinakkichchi sibaarukkaare itise; xeebe'ukkaarem agise. Ee'isa issitlas ixxaannonne horoorenne gii'l kashara tuubbootto» yamamaakko.

²¹Eroka issimminne jolle kaa'llehe bagaan jolli ki'nnuwwa kaa'oone.