Read Hadiyya Oroome'i Asso 13 Bible Online

Oroome'i Asso 13 - Hadiyya bible

Oroome'i Asso 13

¹Manni hundim gassaanina ijaajamona. Mashka'oomim ixxuwwa gassaan issukkok Waa'a. Waa'i gassaanchi issubeelas ayyim gassaanchi iheena xanooyyo.

²Gassaaninne uullixxamookkok Waa'i gassaan issu keeninne uullixxamoolli ihu bikkina oogato'onne aagookko.

³Gassaano badditamok jora issitam keeno bagaan er luwwa issitam keenoyyo. Gassaano badditoo'n hee'lleena hassoohonnihe? Eehannata'i er luwwa isse. Gassaanchi kiina eroomma isseena Waa'ina awwaadoohan ihu bikkina erokamdu issitlas galata siixxitootto. Ihukkaarem jora issitlas ixxeka bisa'a gassaanchi kora'a lade'ubee'i bikkina badde. Mashka'oomim jora issoo keenonne quunqa moo'iseena Waa'ina awwaadaancho.

⁵Ee bikkina mat manchi Waa'i quunqiinsi gateena xale'i ihoo'n ixxi tiir acceeqasoo bikkinam gassaanina ijaajaanchi hasisookko.

⁶ Gibiro miqqakkamok ee bikkinatte. Mashka'oomim gassaan ee baxo baxxam ammane Waa'ina awwaaddamuulla.

⁷Ee bikkina hundinam hasisoo luwwa uwwehe. Gibir hasisoohaanninam gibiro uwwehe; qarax hasisoohaanninam qaraxo uwwehe; haydimmi hasisookkokam haydehe; lombi hasisoohaanninam lomba uwwehe.

⁸Ki'nnuwwina'i ki'nnuwwim iittammehe bagaan ayyekim badanchi ki'nnuwwanne hee'oone. Ixxi beshichcho iittookkok seera wonshaakko.

⁹ Mashka'oomim «Saa'llitte; shititte; game'llittee mixxittee» yoo ijaajii mulli ijaajii hundim mat ihaa «Ki beshichcho ki gaqqisa iitte» yoo ijaajinne wo'mmaakko.

¹⁰Beshichcho iittookkok ixxonne jora issooyyo. Ee bikkina manna iittookkok seer hundam wonshaakko.

¹¹Ku amman diriichchiinsi ki'llakkam amman ihukkisa laqqehe. Amma'nninummi ammaniinsim lophphaa kaba niikki gatimmi hincukkisa laqqehe.

¹²Hiim higaakko; balli hincaakko. Ee bikkina tuunsika baxo fissinaa caakkika o'l mu'uta edde'nnona.

¹³Caakkanne hee'oo mannisa inkaa laboo'isa hee'nnona. Oohim kajjinneyyo; dimbimminneyyo; adabi'imminneyyo; saa'imminneyyo; wocanchinneyyoo to'achchimminneyyoo.

¹⁴Moollanni Yesuus Kiristoosa edde'llehe bagaan maar mixukkisa ihoobee'isa hasu luwwa issona uwwitakkotte.