Read Hadiyya Oroome'i Asso 14 Bible Online

Oroome'i Asso 14 - Hadiyya bible

Oroome'i Asso 14

¹ Amma'nnatonne hoogukkoka aa'llehe bagaan ixxi sawwitenne oogattakkotte.

²Hundem luchchom amma'nnatinne itookkok yookko. Ihukkaarem amma'nnatonne hoongaanchi manchi maara itooyyo.

³Hundi luwwam itookkok itoobee'eka gadoone. Itoobee'ekim itoohaannonne oogatoone. Mashka'oomim Waa'i ixxom aa'aakko.

⁴Mullaannina awwaadoohaannonne oogatteena at maruchcho? Uullukkaarem ubukkaarem ixxi Moollanninatte. Moollanni uulliseena xanoo bikkina ubukkaarem uullisookko.

⁵Mat balli mulli balliinsi lophphoohan issaa sawwoo manchi yookko. Odim balli hundim mat ihukkisa sawwoo manchi yookko. Manni hundim ixxi wodanonne guullaa qoossona.

⁶Balla lonsookkok Moollanni lombina lonsoolla. Hundi luwwam itookkokim Waa'a galaxxoo bikkina Moollanni lombina itoolla; itimma sabookkokim Moollanni lombina sabaa Waa'a galaxxookko.

⁷Niinniinsi ixxi gagina hee'ookkok te'im ixxi gagina lehookkok matim bee'e.

⁸Hee'nnummaarem hee'nnoommok Moollanninatte; lenummaarem lenoommok Moollanninatte. Ee bikkina neese hee'nnummaarem lenummaarem Moollanni keeno.

⁹Yesuusim lehaa odim lehiinsi ki'aa hee'oohan ihukkok lehu keeninaa foorinne yoo keeninaa laminam Moollanni iheenatte.

¹⁰ Kiyyabbaayyonne oogattoottok mahinatte? Te'im kiyyabbaayyo gaddoottok mahinatte? Mashka'oomim neese hundim Waa'i illagenne oogato'ina uullinoommane.

¹¹ Oohim Keesammi Kitaabanne «Moollanni Waa'i ‹An hee'oommi Waa'a. Manni hundim iina guruphphaa otossookko. Allab hundim eese galaxxookko› yoolla» yamamaa kitaabamukkisam

¹²neese hundim banxummi baxina Waa'i illagenne hincinaa xa'mmammoommo.

¹³Ka lasage mat mullaannonne oogatimma ullona. Niyyabbaayyo qoloo luwwa te'im qoccoo luwwa hore'em issinoombee'isa murte'nnona.

¹⁴Hundi luwwim ixxi gaginne haashaaramubee'an ihukkisa Moollanni Yesuusinne ihaa la'aammo. Ihukkaarem «Haashaaramma» yaa sawwoo manchina oo luwwi haashaaramma.

¹⁵At ittoo luwwinne kiyyabbaayyo kichche'issitlas kiyyabbaayyik iitti keesenne bee'e. Ixxi bikkina Kiristoos lehu mancho at ittoo luwwinne bi'oo'isa issititte.

¹⁶Ee bikkina ki'nnuwwina eran ihu luwwi jor ihaa xigamoo'isa issitakkotte.

¹⁷Mashka'oomim Waa'ik adillan Keesammi Ayyaan uwwoo muccurooma, xummaa liiranchaa bagaan ichchayyoo aggayyoo.

¹⁸Ee'isinne Kiristoosina awwaadookkok Waa'a liiransoohanee manni beyyonnem galaxxamaakkoohanee.

¹⁹Ee bikkina xumma eeboo luwwaa neese hundam qoxxisoo luwwaa hansona.

²⁰Hurbaatina yitakka'a Waa'ika baxo ginditakkotte. Hurbaat hundim muccura; ihukkaarem mat manchi itoo luwwinne mulli manna amma'nnatiinsi ubbuusimmi hanqinam jora.

²¹Kiyyabbaayyo qoloohan ihulas maara ittibee'aare, woyi'n diqaasam aggibee'aare te'im ihu luwwi hundam issitbee'aare erane.

²²Kiina yoo amma'nnat kiihaannonnee Waa'i lambe'ennee hee'ona. Issoo luchchonne ixxi tiir qannaxoobee'i manchi maasse'amaakkoohane.

²³Ihukkaarem malamoo manchi amma'nnatinne itubee'i bikkina oogatamookko. Mashka'oomim amma'nnatinne issakkambee'i luwwi hundim baaxiilo.