Read Hadiyya Oroome'i Asso 15 Bible Online

Oroome'i Asso 15 - Hadiyya bible

Oroome'i Asso 15

¹Neese amma'nnatonne qoxxaalluwwi keen amma'nnatonne hoogu keeno hara'mmimmi hasisookko bagaan ni gaga liiransaqqimmi hasisooyyo.

²Neese hundim ni beshichcho qoxxinseena ixxo liiransoo er luwwa issinona.

³ Keesammi Kitaabanne «Keese game'llito'i kee'nnek game'llat eesenne afukko» yamamaa kitaabamukkisam Kiristoosim ixxi gaga liiransukkoyyo.

⁴Keesammi Kitaabanne gaassiinsim kitaabamu luwwi hundim soodonne ihoo eroomma qoxximminnee iyyaqqimminnee ege'llinoommisina neese sogeena kitaabamaakko.

⁵Qoxximmaa iyyaqqimmaa uwwoo Waa'i ki'nnuwwina'i ki'nnuwwim Yesuus Kiristoosisam mateeyyoominne hee'llakkamisa issona.

⁶Oohim ki'nnuwwi hundim mat sagarinnee mat tiirinnee ni Moollanni Yesuus Kiristoosika anni Waa'a lonsitakkamisinatte.

⁷Kiristoos Waa'i lombina ki'nnuwwa aa'ukkisam ki'nnuwwina'i ki'nnuwwim aa'aqqammehe.

⁸An ki'nnuwwina kuroommok Kiristoos Ayihuxxi minaadabina awwaadaanchi ihukkok Waa'i ixxuwwi gaassi anno'ina aagu neeyyaxxi sagara wonsheena amma'nnamaakkoohan ihukkisa moo'iseenatte.

⁹ Ee'isa issukkokim mulli minaadab Waa'i ixxuwwina haafu bikkina ixxo lonsitamisinatte. Oohim Keesammi Kitaabanne «Mulli minaadaphphi lambe'enne an keese lonsoommo. Ki summinam zammaroommo» yamamukkane.

¹⁰ Odim «Mulli minaadabim Waa'i minaadabinne maqirem liirammehe» yamamaakko.

¹¹ Odim «Mulli minaadab hundim Waa'a lonsehe. Minaadab hundim Waa'a lonsona» yamamaakko.

¹² Odim Issaayyaasim «Mulli minaadaba gassookkok Issayyi shumo'iinsi waarookko. Ixxuwwim ixxo neeyyato issita'a hee'llamo» yaakko.

¹³Waa'i ki'nnuwwina uwwoo neeyyat Keesammi Ayyaa'n malaayyinne lophphoo'isina amma'nnatinne siidamoo liiranchaa xummaa hundam neeyyato uwwoo Waa'i ki'nnuwwinam lonsaa uwwona.

¹⁴Iyyabbaayyuwwa, ki'nnuwwi lobakat er luwwa issitakkamisa, lachchi hundim wo'mmaakkoo keen ikkakko'isaa ki'nnuwwina'i ki'nnuwwim soqqantakkeena xantakkamisaa la'aa an i gagim liiramaammo.

¹⁵Ihukkaarem an mulli minaadabina qeessuwwisa ihaa mishiraachchi sagara kurimminne Yesuus Kiristoosina awwaadoommisina Waa'i iina eroomma uwwu bikkina mat mat woshsha ki'nnuwwina tiissiiseena lobakata qoxxisaa kitaabaammo. Oohim iina uwwamukkok mulli minaadab Keesammi Ayyaaninne keesanta'a Waa'a liiransoo kitim ikka'a hincitamisinatte.

¹⁷Ee bikkina an Waa'ina awwaadoommi awwaadonne Yesuus Kiristoosinne ihaa bakke'oommi mashka'i yookko.

¹⁸An kuroommi woshshinnee baxoommi baxinnee mulli minaadab Waa'ina ijaajantamisa issoommisina Yesuus Kiristoos iinninne ihaa mare'innee maalalsiisoo luwwinnee Keesammi Ayyaa'n malaayyinne baxu baxiinsi bagaan an maham woceena iggoommoyyo. Ee'isinne Yerusaaleemiinsi ki'isaa Ilwaarqoon uullanne afeebe'e Yesuus Kiristoosika mishiraachchi sagara guullaa alallaatummo.

²⁰Mulli manni baxukkaannonne an edaa baxeena hasoombee'i bikkina eraare Kiristoos bikkina kuramubee'i beyyonne mishiraachchi sagara alallaateena i mixano.

²¹ Oohim Keesammi Kitaabanne «Ixxi bikkina hore'em kuramubee'i keen ixxo moo'llamo. Ixxi bikkina hore'em macceessobee'i keenim qoossitamo» yamamaa kitaabamukkane.

²² Eese lobakat ammane ki'nnuwwi beyyo waareena hoorukkok eehane.

²³Ihukkaarem kaba ka uullanne an baxoommi baxbee'i bikkinaa ki'nnuwwi beyyom waareena lobakat hiinchiinsi ki'isaa mixummi bikkinaa

²⁴Ispheena marummuuyyi Waa'i yukkaare ki'nnuwwa moo'eena qoodaammo. Hofqax ammanina ki'nnuwwinne edamaa liiramaa lasage googina ihoo luwwa hara'mmitakka'a ki'nnuwwim eese geegeessakkamisa neeyyato issoommo.

²⁵ Kaba an Waa'i minaadabina hara'mmato amadaa Yerusaaleema maroommuulla.

²⁶Mashka'oomim Maqeedoonannee Akaayannee yo'i amma'nnaan Yerusaaleemanne yo'i bux amma'nnaanina hara'mmato uwwiteena liiranto'ookko.

²⁷ Eekkam issiteena liiranto'ookko. Hanqinam issimmi hasisoohane. Mashka'oomim mulli minaadab Waa'i woshsha Ayihuxxi minaadabinne baxxanto'aa'lleensi ixxuwwina yoo luwwinne Ayihuxxi mannina hara'mmimmi hasisookko.

²⁸Ee bikkina ixxuwwi uwwito'i luwwa massaa uwwaa lasage ki'nnuwwi beyyinne aa'aa Ispheena maroommo.

²⁹An ki'nnuwwi beyyom waaroommi ammane Yesuus Kiristoos maassinne wo'mmaa waaroommisa la'oommo.

³⁰Iyyabbaayyuwwa, an Yihuxxi uullanne yoo amma'nnubee'i keeniinsi gatoommisinaa Yerusaaleemanne awwaadoommi awwaado Waa'i minaadab aa'llamisinaa i bikkina Waa'a uunximmanne guruphphantakkamisinaa ni Moollanni Yesuus Kiristoos summinnee Keesammi Ayyaa'n iittinnee uunxoommo.

³²Oohim Waa'i yukkaare liiranchinne ki'nnuwwi beyyo waaraa ki'nnuwwinne edamaa qoxxoommisinatte.

³³Xumma uwwoo Waa'i ki'nnuwwinne hundinnem maqire ihona! Aameen.