Read Hadiyya Oroome'i Asso 16 Bible Online

Oroome'i Asso 16 - Hadiyya bible

Oroome'i Asso 16

¹Kinkiroosanne yoo amma'nnaa'n wixxitina awwaadaanchi niyyaayyi Feeben bikkina laqqakkona hasoommo.

²Waa'i minaadabina laboo'isa issitakka'a Moollanni kollinne ise aa'llehe; ki'nnuwwiinsi hassam luwwi hundinnem ise hara'mmehe. Mashka'oomim eesem edda'a lobakat keeno hara'mmito'ookkotane.

³ Yesuus Kiristoosika awwaado iinninne maqirem baxxam Phirisqilenaa Aqilinaa xummaato kullehe.

⁴Eese gatisseena yita'a ixxuwwi foore higissa'a uwwito'ookko. Ixxuwwa galaxxoommok xale'i anette ihoo'n mulli amma'nnaa'n wixxit hundame.

⁵Ixxuwwi minenne yoo amma'nnaa'n wixxitinam xummaato kullehe. Issiyanne luxxeka gaassaa Kiristoosanne amma'nnu an iittoommi Ephpheeneexoosinam xummaato kullehe.

⁶Ki'nnuwwina lobakata badatto'i Maaraamena xummaato kullehe.

⁷Iinninne maqire karanto'i i qarmanni Andirooniiqoosinaa Yuuniyaasinaa xummaato kullehe. Ixxuwwi iinniinsi illageenim Kiristoosanne amma'nnito'oo keenoo asse'amaa'n beyyonnem la'anto'oo keenoo.

⁸An Moollanninne ihaa iittoommi Amphiliyaatoosina xummaato kullehe.

⁹Kiristoosika awwaado niinninne maqire baxxam Urbaanoosinaa an iittoommi Istaaqenaa xummaato kullehe.

¹⁰Kiristoosan ihukkisa keenamaa la'amaakkoo Aphphiliisinaa Arisxoobuloos abaroosinaa xummaato kullehe.

¹¹I qarmanchi Heeroodiyooninaa Moollannanne amma'nnito'i Naarsiisaas abaroosinaa xummaato kullehe.

¹²Moollannina baxxam Tirfaaninaa Tirufoosinaa xummaato kullehe. Moollannina badatto'i iittanto'oo Pheersiisenam xummaato kullehe.

¹³ Moollannanne amma'nnatinne la'amaakkoo Ruufoosinaa ixxenam iinam amanaa xummaato kullehe.

¹⁴Asinkirtoosina, Fileegoonina, Herimeesina, Phaatiroobaasina, Heerimaasinaa ixxuwwinne maqire yo'i abbaayyuwwinaa xummaato kullehe.

¹⁵Filooloogoosina, Yuuliyina, Neeriyyinaa ixxi aayyanaa, Olomphaasinaa ixxuwwinne maqire yo'i amma'nnaan hundinamii xummaato kullehe.

¹⁶Ki'nnuwwina'i ki'nnuwwim danaamisa suunqantakka'a xummaatixxammehe. Kiristoosanne amma'nnito'i keen hundim xummaato asse'llo'ookko.

¹⁷Iyyabbaayyuwwa, ki'nnuwwina losinsummi losano sabba'a atanaachchaa hawwoo eebbam keeno laqqakka'a ee keeniinsi ege'llitakkamisina uunxoommo.

¹⁸Mashka'oomim oo keen awwaadamookkok ixxuwwi gaga bagaan ni Moollanni Kiristoosayyo. Mishisoo woshsha buuro labba'a woccu'uuyyi qacaalli mannika wodano bi'issa'a huushissamo.

¹⁹Ki'nnuwwik ijaajanchi manni hundinam la'amu bikkina liirammaammo. Kabadem er luwwina qoor keen ikkakkamisinaa jor luwwiinsi gibbakkamisinaa hasoommo.

²⁰Xumma uwwoo Waa'i Sheexaancho qaqqisaa ki'nnuwwi lokkiinsi woroon iiqookko. Ni Moollanni Yesuus Kiristoosik eroommi ki'nnuwwinne ihona.

²¹ Iinninne maqire baxoo Ximootoos, i qarmanni Luqyoos, Iyyaasoonii Soosphaaxroosii ki'nnuwwina xummaato asse'llo'ookko.

²²Ka assi kitaaba kitaabummi an Xarxiyoosim Moollanninne ihaa xummaato hincaa'oommuulla.

²³ Eesee amma'nnaanoo hundam ixxi minenne wixxaa'oo Gaayoosim xummaato asse'aakko. Beero'i diinate amadaanchi Eraasxoosii niyyabbaayyi Qorxoosii xummaato asse'llo'ookko.[3]

²⁵An Yesuus Kiristoos bikkina alallaatummi mishiraachchi saga'llisinnee lobakat doollina daphphaa hee'u hanqisinnee ki'nnuwwa qoxxiseena xanoo Waa'ina kaba lombi ihona.

²⁶Oo daphphaa hee'ukkok kaba caakkaakko. Caakkukkokim hee'oo hiraagaan kitaabbo'i Keesammi Kitaab kollinnette. Oohim manni hundim amma'nnatina ijaajamoo'isina heer heerina hee'oo Waa'i ijaajukkane.

²⁷Matem qoor Waa'ina Yesuus Kiristoosinne heer heerinam lombi ihona! Aameen.