Read Hadiyya Oroome'i Asso 2 Bible Online

Oroome'i Asso 2 - Hadiyya bible

Oroome'i Asso 2

¹ Mulli mannanne oogattoo manchi ayyettem ikkittaare mannanne oogattittuuyyi ki gagannem oogattoolli ikkitti bikkina dabaabuttoo luwwi bee'e. Mashka'oomim mannanne oogattoo atim oo manni issoo luwwa issitoolla.

²Eehido'i luwwa issoo mannanne Waa'i oogatookkok hanqi ihukkisa lanqoommo.

³At eekka issu mannanne oogattittuuyyi atim eekka issitittuuyyi Waa'i oogato'iinsi gattoottoka labissaatennihe?

⁴Te'im Waa'ika lophphaakkoo biijooma, iyyaqqimmaa xa'nnimmaa gaddaatennihe? Waa'ik biijoom baaxiilo biiraa yitaa daba'llitoo'isinatte ihukkisa laqqooyyonnihe?

⁵Ihukkaarem wodano duudisimminnee baaxiilo biiraa yimma sabimmi mashka'innee Waa'i hanqo'isinne oogatoo oogaxxi ayyaamina ki gaganne quunqa wixxaa'lloolla.

⁶ Mashka'oomim manni hundinam baxu baxisam Waa'i uwwookko.

⁷Eroka issitu'uuyyi iyyaqqimminne galata, lombaa heechchaa hassam keenina Waa'i heer heerina hee'oo heechcha uwwookko.

⁸Ihukkaarem jora issimmina yita'a hanqina ijaajancha sabbam boqqi keenonne Waa'ik malaayyaam quunqi waarookko.

⁹Gaassaa Yihudanne ee lasage odim mulli minaadabanne jora issitam keen hundannem kee'mmaalli hawwi waarookko.

¹⁰Ihukkaarem eroka issoo keenina ayyenam gaassaa Ayihuxxi mannina odim mulli mannina galat, lombii xummii uwwamookko.

¹¹ Mashka'oomim Waa'i ayyenam golo'ooyyo.

¹²Seer bee'eka baaxiilo baxxo'i keen seer bee'ekam bi'llamo. Seer hee'ukkuuyyi baaxiilo baxxo'i keen seerinnem oogato'o aa'llamo.

¹³Waa'i illagenne muccur iheena xanookkok seera macceesukkan ihoo'n seera egeroohane.

¹⁴Mulli minaadabina Seer bee'ukkaarem Seer hasoo luwwa ixxuwwi tiirinnem issitolas ixxuwwina Seer bee'ukkaarem ixxuwwi gagim Seera.

¹⁵Mashka'oomim ixxuwwik tiir kurukkuuyyi, ixxuwwi sawwitim acceeqasukkuuyyii te'im dabaaburukkuuyyii Seer hasoo luwwi ixxuwwi wodanonne kitaabamaa yoo'isa moo'issamuulla.

¹⁶An kurummi mishiraachchi saga'llisam manni wodanonne maaxamu woshshi hundannem Waa'i oogatoo ayyaamo Yesuus Kiristoos kollinne oogatookko.

¹⁷Ihukkaarem ki'nnuwwi gaga «Neese Ayihuxxi manna» yitakka'a weeshshakkamo; Waa'i Seerannem bakke'llakkamo; ki'nnuwwina Waa'inne yoo mateeyyoomannem birantakkamo.

¹⁸Seera lossakko'i bikkina Waa'i hasoo xabbeen luwwam annanni issitakka'a laqqakkamo.

¹⁹Odim qooq keenina awwonsaan ikkakko'isa, tuunsonne yoo keenina caakki ikkakko'isa,

²⁰huushamu keeno dabattakkam keen ikkakko'isa, oosina losisaan ikkakko'isaa Waa'i Seeraa hanqaa guullitakka'a laqqakkam keen ikkakko'isaa ki'nnuwwi gaga xiggakkamo.

²¹Eehannata'i mulli keeno losissakkam keen ki'nnuwwi gaga losissakkamoyyonnihe? Mulli mannina «Game'llakkotte» yitakka'a kuttakku'uuyyim ki'nnuwwim game'llakkamo.

²²Mulli mannina «Saa'llakkotte» yitakku'uuyyim ki'nnuwwim saa'llakkamo. Waa'i bikkenne otossakkam luwwa sabbakku'uuyyim Keesammi Mine boggakkamo.

²³Seera laqqakko'i bikkina birantakku'uuyyim Seera ginditakka'a Waa'a sholliissakkamo.

²⁴ Oohim Keesammi Kitaabanne «Mulli minaadaphphi lambe'enne Waa'ik summi ki'nnuwwi mashka'inne duumamukko» yamamaa kitaabamukkane.

²⁵Ballachchanchi awwaadookkok seera egettakkolasette bagaan seera egettakkobeelas ki'nnuwwik ballachchanchi ballachchantakkobee'aannisa.

²⁶Ee bikkina ballachchamoo'n yoo mat manchi Seer ijaaju luwwa egerulas ixxeka ballachchamoo'n hee'immi ballachchamukkaannisa xigamooyyonnihe?

²⁷Eehannata'i ixxuwwi ballachchantoo'nnim Seera egettamuulli ikkolas kitaabamu Seer hee'ukkuuyyimii ballachchantakko'isamii Seera ginditakkam ki'nnuwwanne oogattamo.

²⁸Yihudiinsi qaranchi xale'i hanqo'i Ayihudichchi issooyyo. Ee'isam haninne moo'amoo maa'l ballachchanchi hanqo'i ballachchanchayyo.

²⁹ Hanqo'i Ayihudichcho yimmi woro'l mannoominne Ayihudichchi ihukkane. Hanqo'i ballachchanchim Keesammi Ayyaaninne ihoo woda'n ballachchancha bagaan See'llisanne ha'n orachcho ballachchanchayyo. Eehido'i manchi galata siixxookkok Waa'iinsette bagaan manniinseyyo.