Read Hadiyya Oroome'i Asso 3 Bible Online

Oroome'i Asso 3 - Hadiyya bible

Oroome'i Asso 3

¹Eehannata'i Ayihudichchi ihimmi maha awwaadoo? Te'im ballachchanchidu maha awwaadookko?

²Hanqinam kolli hundinnem lobakata awwaadookko. Luxxeka Waa'i ixxeka Seera uwwukkok Ayihuxxi manninatte.

³Mat mat keen amma'nnancha hooggota'nnahe? Ixxuwwik amma'nnancha hoogimmi Waa'am amma'nnamoobee'an issoohonnihe?

⁴ Hore'em ee'isayyo! Keesammi Kitaabanne «At woccitti woshshi hanqa; fitantoo fitanchannem at neegattootto» yamamaa kitaabamukkisam manni hundim huushamukkaarem Waa'i yu woshshi hanqi ihona.

⁵Ihukkaarem niikki boqqoom Waa'i xabbeenooma moo'iseena awwaadoohan ihukkaa'lleensi neese mayyinoommo? An mannisam wocoommo; neese banxummi baaxiilina Waa'i ixxeka quunqa neesenne eeboohaare huushamaakko yimmannihe?

⁶Hore'em ee'isayyo; ee'isa ihulas uullanne Waa'i oogateena hinkid xanoo?

⁷Ihukkaarem i huushanchinne Waa'ik hanqi ixxi lombina la'amulas an kabad afeebe'em baaxiilaanchi ihaa xigamoommok mahinatte?

⁸Eehannata'i er luchcho siixxineena mahina jora issinoommoyyo? Mat mat manni eehid yito'ookko yita'a neese game'llitamuulla. Ee keenonne Waa'i oogatoo oogato'i hanqo'ane.

⁹Eehannata'i mayyinoommo? Neese Ayihuxxi manni mulli manniinsi e'llinoommonnihe? Hore'em e'llinoommoyyo. An gaassaahim «Ayihuxxi minaadab ihukko te'im mulli minaadab hundim baaxiilina agido» yaa kuraammo.

¹⁰ Oohim Keesammi Kitaabanne «Muccur hore'em mat manchim bee'e.

¹¹Qoossookkok te'im Waa'ina otossoo manchi matim bee'e.

¹²Manni hundim Waa'iinsi qee'llaakko. Hundim mat ihaa huushamaakko. Eroka issookkok matim bee'e. Hore'em matichchim bee'e.

¹³ Ixxuwwi suumiinsi firoo woshshim fooqu waammisa; ixxuwwi allabinnem qawwiissamo. Ixxuwwi suumennem hamashshi qub yoohane.

¹⁴ Ixxuwwi suumiinsi firookkok xale'i duunchaa jor woshshaa.

¹⁵ Ixxuwwik lokkim mannika xiiga duneena qare'aalla.

¹⁶Ixxuwwi mattam googonne bi'ishshii hawwii yoohane.

¹⁷Xummi googom laqqamoyyo.

¹⁸ Ixxuwwi beyyonne Waa'a baddimmi bee'e» yamamaa kitaabamaakko.

¹⁹Seer kuroo luwwi hundim Seerina ijaajanteena hassam keeninatte. Oohim manni hundim dabaaburoo luwwi bee'aa uullanne yoo manni hundim Waa'i oogato'iinsi woroon ihoo'isinatte.

²⁰ Ee bikkina Seer baaxiilo la'isookko bagaan maara edde'u manni Seera egerimminne Waa'i illagenne muccur iheena xanooyyo.

²¹Muse'i Seerii hiraagaanii kutto'i Waa'ik muccuroom kaba la'amaakko; oohim seera egerimminne hore'em exxoobee'ene.

²² Manni hundim baaxiilo baxukkaare Waa'ik lombi ixxuwwanne bee'u bikkina manni lambe'enne annannoom bee'e. Ee bikkina Yesuus Kiristoosanne amma'nnoo keen hundam Waa'i muccussookko.

²⁴Waa'i Gatisaanchi issaa uwwu Yesuus Kiristoos eroomminne manni hundim kora'am muccuraakko.

²⁵Manni ixxonne amma'nnoohaare ixxi xiiginne baaxiilo shiinshoo'isina Waa'i Yesuusa uwwukko. Waa'i eekka issukkokim eraa'l baaxiilo ixxi iyyaqqimminne haafu bikkina ixxeka hanqo'i oogato'o moo'iseenatte.

²⁶Odim Waa'i ixxi gagim muccur ihukkisaa Yesuusanne amma'nnoo keenom muccussoo'isaa kaba ka doollenne la'iseenatte.

²⁷Eehannata'i niikki bakkechchi maha awwaadookko? Bakkechchi gataakko. Mahina gatukko? Seera egelloommi bikkinattennihe? Ee bikkinayyo; amma'nnatinnette bagaan seera egerimminneyyo.

²⁸Mashka'oomim manni muccurookkok amma'nnatinnette bagaan Seera egerimminnette ihubee'isa lanqoommo.

²⁹Waa'i xale'i Ayihuxxi minaadabina Waa'annihe? Mulli minaadabindu Waa'ayyonnihe? Eeyya, Waa'i mat ihu bikkina mulli minaadabinam Waa'a. Ee bikkina ballachchamu keenoo ixxuwwi amma'nnatinnem ballachchamubee'i keenom ixxuwwi amma'nnaxxisinnem muccussookkok ixxotte.

³¹Eehannah amma'nnaxxi bikkina Seera uunjinonnihe? Hore'em ee'isayyo! Seera qoxxinsoommo bagaan uunjinoommoyyo.