Read Hadiyya Oroome'i Asso 4 Bible Online

Oroome'i Asso 4 - Hadiyya bible

Oroome'i Asso 4

¹Eehannata'i maa'llisinne niyyanni Abrihaam bikkina mayyinoommo?

²Abrihaam eroka baximminne muccuraakkoohan ihulas bakke'oo luwwi yookko. Ihukkaarem Waa'i illagenneyyo.

³ Keesammi Kitaab mayyookko? «Abrihaam Waa'anne amma'nnukko; oo amma'nnatim ixxena muccuroom ihaa xigamukko» yookko.

⁴Mat manchi baxu malaayyina miqakkam diinat ixxi baxu malaayyika miqakko'o bagaan kora'a uwwakko'aannisa ihaa xigamooyyo.

⁵Ihukkaarem mat manchi gateena er baxo baxubee'aarem baaxiilaano muccussoo Waa'anne amma'nnulas oo ixxi amma'nnat muccuroom ihaa xigamookko.

⁶Eroka baximminnette ihoo'n Waa'i kora'am muccussu manchi maasse'amaakkoohan ihukkisa Daawiit

⁷ «Waa'i ixxuwwika bi'ishsha uru keenii ixxuwwi baaxiil haafamu keenii maassaammuwwa.

⁸Waa'i ixxeka baaxiilo tiiroobee'isa uru manchi maasse'amaakkoohane» yaakko.

⁹Oo maassi uwwamukkok xale'i ballachchamu keeninattennii te'im ballachchamubee'i keeninatteme? Abrihaamina amma'nnat muccuroom ihaa xigamukkisa woncaammo.

¹⁰Abrihaamina ixxek amma'nnat muccuroom ihaa xigamukkok hinkidette? Ballachchameena illageenettennii ballachchamaa lasage? Ballachchamaa lasag ihoo'n ballachchameena illageenetteme.

¹¹ Abrihaam ballachchamukkok ballachchameena illageenim amma'nnatinne muccurukkisa moo'iseena mare'i ihoo'isinatte. Eehid ihukkokim ballachchantoo'nnim Waa'anne amma'nnita'a muccutto'i keen hundinam anni ihoo'isinatte.

¹²Ee'isam ballachchanto'i keeninam anna. Anni ihukkokim ballachchanto'i bikkina xale'i ihoo'n ballachchameena illageenim Abrihaamina hee'u amma'nnaxxeka kobi'llishsha awwontam bikkinatte.

¹³ Abrihaaminaa Abrihaam shumo'inaa uulli hundam neeyyatukkoka a'llitamok Seera egerimminnette ihoo'n amma'nnatinne uwwamoo muccuroominnette.

¹⁴ Neeyyaxxi luwwa a'llitamok Seera egetto'i keen ikko'oolas eehannata'i amma'nnat maha awwaadookko? Neeyyatim awwaad bee'an ihaa gataakko.

¹⁵Seer Waa'i quunqa eebookko; Seerbee'i beyyonne Seera gindimmim bee'e.

¹⁶ Waa'ik neeyyat amma'nnatinnette ihimmi hasisookkokim Waa'i eroomminnette ihaa Abrihaam shumo'i hundinam ihoo'isinatte. Oo neeyyatim Seera egeroo keenina xale'e ihoo'n Abrihaamisam amma'nnoo keeninatte. Abrihaam niina hundinam anna.

¹⁷ Mashka'oomim Keesammi Kitaabanne «An keese lobakat minaadabina anni issaammo» yamamaakko. Anna yamamaa weeshamukkokim ixxi amma'nnu Waa'i illagenne oohim lehu keenom fooraam isseenaa bee'i luwwam yoohan isseenaa xanoo Waa'i illagennette.

¹⁸ Odim Abrihaam «Ki shumo'o xigakkeena xanakkambee'i qax ihookko» yamamukkoka anni iheena xanoobee'i ammanenne lobakat minaadabina «Anni ihoommo» yaa amma'nnukko.

¹⁹ Abrihaam qaramukkaanniinsi xibbi hiincho ihaakkoo lommanchi ihu bikkina ixxeka hoogaakkoo orachchoo Saara'akam qaroobee'isa gogaakkoo goosaa moo'ukkaarem ixxek amma'nnat hoogukkoyyo.

²⁰Waa'i aagu neeyyata wonsheena xanoo'isa Abrihaam guullaa amma'nnaa hee'u bikkina ixxek amma'nnat lophphaa qoxxaa Waa'a galaxxukko bagaan ee Waa'i uwwu neeyyatonne malamukkoyyo.

²²Ixxek amma'nnat ixxena muccuroom ihaa xigamukkok ee bikkinatte.

²³Ihukkaarem «Muccuroom ihaa xigamukko» yoo sagar Keesammi Kitaabanne kitaabamukkok xale'i ixxi bikkinatte ihoo'n

²⁴ni bikkinatteme. Ni Moollanni Yesuusa lehiinsi ki'isu Waa'anne amma'nninummi niinam amma'nnat muccuroom ihaa xigamookko.

²⁵ Oo ni Moollanni Yesuus ni baaxii'l bikkina lehaa neese muccusseena lehiinsi ki'ukkane.