Read Hadiyya Oroome'i Asso 6 Bible Online

Oroome'i Asso 6 - Hadiyya bible

Oroome'i Asso 6

¹Eehannata'i mayyinoommo? Waa'ik eroommi lophphoo'isina baaxiilo banxummuuyyi hee'nnonnihe?

²Hore'em ee'isayyo! Neese baaxiilina lenaammoo keen hinkid inkaa baaxiilo banxummuuyyi hee'nnoommo?

³Neese Yesuus Kiristoosinne mat inkeena xammaqammummi keen hundim ixxi lehinnem mat inkeena xammaqamummisa laqqakkamoyyonnihe?

⁴ Yesuus Kiristoos Waa'i lombinne lehiinsi ki'ukkisam neesem haareechchi heechchanne hee'nnoommisina ixxi lehinne mat inkeena xammaqanchinne ixxenne maqirem waammammaammo.

⁵Ixxi lehu lehinne mat inkummaa'lleensi hanqinam ixxi lehiinsi kichchinnem ixxenne maqire mat inkoommo.

⁶Neese la'mmeka baaxiilina agid inkoombee'isa baaxiilaanchi maar bi'oo'isina niikki moosir maar Yesuusinne maqirem saqalamukkisa lanqoommo.

⁷Mashka'oomim lehukkok baaxii'l agiddaniinsi wolabbanonne firaakko.

⁸Kiristoosinne maqire lenummaa'lleensi ixxenne maqirem hee'nnoommisa amma'nninoommo.

⁹Mashka'oomim Kiristoos lehiinsi ki'u bikkina od lehoobee'isa lanqoommo; od ixxo leh kaa'eena xanooyyo.

¹⁰Ixxi baaxiilina lehimma mexxo'aa'llem lehaakko. Ihukkaarem ixxi hee'oo heechchi Waa'inatte.

¹¹Ee'isam ki'nnuwwim baaxiilina letakko'aannisaa Yesuus Kiristoosinne Waa'ina hee'llakkamaannisaa ki'nnuwwi gaga xiggehe.

¹²Baaxiil ki'nnuwwaannonne lehoo maaranne naanoobee'isa ki'nnuwwi maa'l jor mixanina kaa'antakkotte.

¹³Ki'nnuwwika orachcho hundoomam jor luwwa issoo'isina baaxiilina mu'ut issitakka'a uwwitakkotte. Ihukkaarem lehiinsi ki'u mannisa ikkakka'a ki'nnuwwika orachcho muccuroomina mu'ut issitakka'a Waa'ina uwwehe.

¹⁴Ki'nnuwwi Waa'i eroommiinsi woroonette bagaan Seeriinsi woroonetti ikkakkobee'i bikkina baaxiil ki'nnuwwa ijaajeena xanooyyo.

¹⁵Eehannata'i mayyinoommo? Neese Waa'i eroommiinsi woroonette bagaan Seeriinsi woroonette inkumbee'i bikkina baaxiilo banxonnihe? Hore'em ee'isayyo.

¹⁶Ki'nnuwwi gaga ijaajamoo'isina agishshi issitakka'a uwwitakko'aannina ayyenam agid ikkakko'isa laqqakkamoyyonnihe? Ee'isam lehina massoo baaxiilina te'im muccurooma uwwoo Waa'ina ki'nnuwwi gaga uwwitakkolas matina agid ikkakko'isa laqqehe.

¹⁷Ihukkaarem ki'nnuwwi eraare baaxiilina agid hee'llakko'i keen kaba ki'nnuwwi gaga higissakka'a uwwitakko'i losa'n amaxxina ki'nnuwwi wodanonne ijaajantakko'i bikkina Waa'ina galat afona.

¹⁸Baaxii'l agiddaniinsi wolabbanonne fittakka'a muccuroomina agid ikkakko'ookko.

¹⁹Ki'nnuwwik maar hoongaanchi ihu bikkina an mannisam wocoommo. Ka illageen ki'nnuwwi gaga fokko'o baximminaa baasaakkoo jolle issimminaa higissakka'a uwwitakko'isam kaba keesantakko'oo keen ikkakkamisina muccuroomina higissakka'a uwwehe.

²⁰Baaxiilina agid ikkakka'a hee'llakko'i ammane muccuroomina agid hee'llakko'oyyo.

²¹Ihukkaarem ki'nnuwwi kaba issimmina tuuttakkam luwwa issitakkam hee'llakko'i ammane maha siiddakkam hee'llakko'o. Ee keeno issimmik lasaanchi leho.

²²Kaba baaxiiliinsi wolabbanonne fittakka'a Waa'ina agid ikkakko'ookko. Waa'ina agid ikkakko'i bikkina siiddakkamokim keesantakko'oo keen ihimma. Eehannikim lasaanchi heer heerina hee'oo heechcha.

²³Mashka'oomim baaxii'llek lasaanchi leho; ihukkaarem Waa'i kora'am uwwu uwwanchik lasaanchi ni Moollanni Yesuus Kiristoos kollinne heer heerina hee'oo heechcha.