Read Hadiyya Oroome'i Asso 7 Bible Online

Oroome'i Asso 7 - Hadiyya bible

Oroome'i Asso 7

¹Iyyabbaayyuwwa, Seera laqqakkam keenina kuroommok Seer mat mancho ijaajeena xanookkok manchi foorinne yooqax amman xale'i ihukkisa laqqakkamoyyonnihe?

²Kobi'llishshina mat meentichcho isek aro'i foorinne hee'ukkuuyyi is aro'inne eebaqqanchi seer karaa amadaakko. Ihukkaarem isek aro'i lehaa lasage ee eebaqqanchi seeriinsi fitto'ookko.

³Is aro'i foorinne hee'ukkuuyyi mulli goonchonne affolas saa'aanchotte yamantamo. Ihukkaarem isek aro'i lehulas is aro'inne yoo eebaqqanchi seeriinsi fitto'ookko. Mulli goonchonne affo'aarem saa'aanchotteyyo.

⁴Iyyabbaayyuwwa, ee'isam ki'nnuwwim Waa'ina misha mishshakkamisina lehiinsi ki'u Yesuusan ikkakkeena Yesuus Kiristoos lehinne Seerina letakko'ookko.

⁵Neese maarinne hee'nnummi ammane baaxiil wo'mmaakkoo mixano seer ki'isoohaare oo baaxii'l mixan ni orachchonne lehina misha misheena baxam hee'ukko.

⁶Ihukkaarem neese karaa amadaa hee'u seeriinsi lenaa kaba fillaammo. Ee bikkina eraare kitaabamu seerina ijaajanchinnette ihoo'n Keesammi Ayyaan uwwu haareechchi heechchanne inkaa awwaandoommo.

⁷ Kaba neese mayyinoommo? Seer baaxiilonnihe? Hore'em ee'isayyo! Seerbee'an yakkota'n baaxiil mada'e ihukkisa la'am hee'ummoyyo. Seer «Manni luwwa mixxitte» yubeeta'n mixan mada'e ihukkisa la'am hee'ummoyyo.

⁸Ihukkaarem mixan See'l kollinne makka siixxu ammanenne annanni annanni mixano i woronne qooccukko. Seerbee'an yakkota'n baaxiilina malaay bee'e.

⁹Seer bee'i ammane an lehoombee'an hee'ummo. Ihukkaarem Seer waaru ammanenne baaxiil malaayye siixxukkaare an lehummo.

¹⁰«Heechcha uwwookko» yamamu oo Seer iina leho eebukko.

¹¹ Mashka'oomim baaxiil Seerinne makka siixxu ammanenne eese qawwiisaa shukko.

¹²Ee bikkina Seer keesamaakkoohane; ijaajim keesamaakkoohane; xabbeenaa danaamoomee.

¹³Eehannata'i eesenne leho eebukkok ee danaam luwwannihe? Hore'em ee'isayyo! Baaxiil mada'e ihukkis la'amoo'isinaa See'l kollinne baaxiil lobakata baasoo'isinaa danaam see'l kollinne eesenne leho eebukkok baaxiilo bagaan seerayyo.

¹⁴Seer Waa'iinsette ihukkisa lanqoommo. Ihukkaarem an baaxiilina agishshi ihoommisina biteesamaammoohane. Edde'ummokim maara.

¹⁵ Ee bikkina an issoommok saboommi luwwa bagaan isseena hasoommi luwwayyo. An i gagim issoommi luwwi mada'e ihukkisa la'oommoyyo.

¹⁶Kaba an isseena hasoombee'i luwwa issoomman ihulas seer danaam ihukkisa moo'isoommuulla.

¹⁷Ee bikkina baaxiilo baxisookkok i woronne yoo baaxiilo bagaan aneyyo.

¹⁸Ee'isinne i woronne oohim i maaranne er luwwi ma'lluchchim siidamoobee'isa la'oommo. Eroka isseena mixoommo; ihukkaarem issaa xanoommoyyo.

¹⁹Mashka'oomim an issoommok isseena hasoommi er luwwi ihoo'n isseena hasoombee'i jor luwwa.

²⁰An issoommok isseena hasoombee'i luwwi ihukkaa'lleensi eekka issookkok i woronne yoo baaxiilo bagaan aneyyo.

²¹Ee bikkina seer baxoo'isa moo'oommuulla. An eroka isseena hasummuuyyim hundi ammanem jora issaa siidamoommo.

²²Waa'ika Seera i wodaninnem guullaa iittoommo.

²³Ihukkaarem i wodanonne yoo seerinne oramaa qeefadoo mulli seer i orachchi hundannem yookkoka siidoommuulla. Oohim baaxii'l seera.

²⁴An hinkido'i hawwaancho! Ka lehonne massoo maariinsi eese ayyi gatisookko?

²⁵Moollanni Yesuus Kiristoosinne gatisu Waa'ina lombi ihona; i wodaninne Waa'i Seerina ijaajamoommo. Ihukkaarem i maarinne baaxii'l seerina ijaajamoommo.