Read Hadiyya Oroome'i Asso 8 Bible Online

Oroome'i Asso 8 - Hadiyya bible

Oroome'i Asso 8

¹Yesuus Kiristoosik heechcha uwwoo Keesammi Ayyaan baaxiiliinsii lehiinsii wolabbanonne fissu bikkina Yesuus Kiristoosanne amma'nnu keenonne kaba oogato'i bee'e.

³Mashka'oomim maar hoongaanchi ihu bikkina seer isseena xanubee'i luwwa Waa'i ixxi Beeto baaxii'l bikkina baaxiilaanchi maa'l kobi'llanne asse'aa Yesuus maarinne baaxiilo bi'isaakko.

⁴Eekka issukkokim Keesammi Ayyaan yukkisiinsi bagaan ni maar iittukkisa inkoombee'i neesenne seer hasoo muccuroom wo'mmoo'isinatte.

⁵Maar iittukkisa hee'llam keen ixxuwwika sawwitem maar hasoo luwwanne issitamo. Ihukkaarem Keesammi Ayyaan yukkisa hee'llam keen ixxuwwika sawwitem Keesammi Ayyaan hasoo luwwanne issitamo.

⁶Maa'l sawwite wonshimmik lasaanchi leho. Ihukkaarem Keesammi Ayyaa'n sawwite wonshimmik lasaanchi heechchaa xummaa.

⁷Maa'l sawwixxisa hee'immi Waa'ina maso'ooma. Mashka'oomim maa'l sawwit Waa'i Seerina ijaajamooyyo; ijaajameenam hore'em xanooyyo.

⁸Maa'l sawwixxisanne hee'llam keen Waa'a liiransiteena xantamoyyo.

⁹Hanqinam Waa'ik Keesammi Ayyaan ki'nnuwwanne hee'ulas ki'nnuwwi hee'llakkamok Keesammi Ayyaan hasoo'isa bagaan maar hasoo'isayyo. Kiristoosik Keesammi Ayyaan bee'ek ayyim Kiristoosaneyyo.

¹⁰Ihukkaarem Kiristoos ki'nnuwwi woronne hee'ulas ki'nnuwwik maar baaxiilina lehaakkoohane. Ki'nnuwwi ayyaanim muccuroo'm bikkina hee'oohane.

¹¹ Yesuusa Lehiinsi ki'isu Waa'ik Keesammi Ayyaan ki'nnuwwi woronne hee'ulas ee Yesuus Kiristoosa lehiinsi ki'isu Keesammi Ayyaa'n kollinne Waa'i ki'nnuwwaannina lehoo maarina heechcha uwwookko. Oo Keesammi Ayyaanim ki'nnuwwi woronne yoohane.

¹²Ee bikkina iyyabbaayyuwwa, niina giddi yookko. Ihukkaarem oo giddi maar iittukkisa hee'nnoommisinayyo.

¹³Mashka'oomim maar iittukkisa hee'llakkolas letakkamo. Ihukkaarem Keesammi Ayyaaninne maa'l baxo shitakkolas hee'llakkamo.

¹⁴Waa'ik Keesammi Ayyaan awwonsoo'isanne hee'llam keen hundim Waa'ina ooso.

¹⁵ Neese Waa'ina oos inkaa «Abba, niyyanna!» yinaa weenshoommisina Keesammi Ayyaana aa'nnummo bagaan eraa'llisam baddinoommisina agidda'n ayyaana aa'nnummoyyo.

¹⁶Neese Waa'ina oos inkummisa Keesammi Ayyaan ixxi gagim ni ayyaaninne maqirem kuroolla.

¹⁷Neese Waa'ina oos inkummaa'lleensi Waa'i uwwoo luwwa lago'o a'llinoommo. Kiristoosinne maqirem lomba siixxineena Kiristoosinne maqire hawwo aa'nnummaa'lleensi ixxenne maqirem lago'o a'llinoommo.

¹⁸Kaba neesenne afoo hawwo niina moo'amoo lombinne keenaa moo'oommaare lobakata sholle'aalli issaa xigoommo.

¹⁹Qooccanchi hundim Waa'i oosika moo'ancha lobakat qulunxinne egeroolla.

²⁰ Mashka'oomim qooccanchi hundim awwaad bee'i luwwina ijaajamaakko. Ijaajamukkokim iittaatette ihoo'n neeyyatinne egerukkuuyyi ijaajamoo'isa Waa'i issu bikkinatte.

²¹Ihukkaarem qooccanchi hundim bichchi agiddaniinsi firaa Waa'i oosika lombi yoo wolabbano siixxoo neeyyat yookko.

²²Qooccanchi hundim mat ihaa kabad afeebe'em xuuchchinne qitinukkuuyyi yoo'isa lanqoommo.

²³ Xale'i qooccanchi ihoo'n Keesammi Ayyaana neeyyatina amaxxi issaa Waa'i uwwukkaare aa'nnummi keen neesem Waa'ina oos ihimmaa ni orachchika gatimmaa ege'llinummuuyyi ni woronne qitinoommuulla.

²⁴Neese gantummok ee neeyyatinnette. Kaba moo'amoo luwwi neeyyatayyo. Moo'amoo luwwa ayyi neeyyato issookko?

²⁵Neese moo'nnumbee'i luwwa neeyyato issinummaa'lleensi eekka iyyaqqimminne egelloommo.

²⁶Oo Keesammi Ayyaanim neese hoongoommaare hara'mmookko. Keesammi Ayyaan ixxi gagim suuminne kurakkeena xanakkambee'isinne ni bikkina qoxxisaa Waa'a uunxookko bagaan Waa'a uunxakkamisa neese lanqoommoyyo.

²⁷Waa'i doo'llu minaadabina Keesammi Ayyaan Waa'a uunxookkok Waa'i sawwixxis ihu bikkina manni woda'nneka saarayyaa la'oo Waa'i Keesammi Ayyaa'nnekam sawwite la'ookko.

²⁸Waa'a iittitam keeninaa ixxi sawwixxisanne weeshanto'i keeninaa Waa'i hundi luwwam eroommina issoo'isa lanqoommo.

²⁹Waa'i gaassaatim doo'llu keeno ixxi Beet hagaranne daba'llitamisa issukko. Ee'isa issukkokim lobakat abbaayyuwwi lambe'enne Yesuus won ihoo'isinatte.

³⁰Ixxi Beet hagaranne daba'llitamisa issu keenom weeshukko; weeshu keenom muccussukko; muccussu keenom lonsukko.

³¹Eehannata'i ka woshshi bikkina mayyinoommo? Waa'i niinninne maqir ihukkaa'lleensi niinninne uullixxameena ayyi xanookko?

³²Ixxi Beetina qishixxoo'n niina hundinam higisaa uwwu Waa'i ixxi Beetinne maqire hundi luchchom uwwooyyonnihe?

³³Waa'i doo'llu keeno kasasookkok ayyette? Waa'i muccussu keenonne

³⁴oogatookkok ayyette? Ayyim oogatooyyo. Ni bikkina lehukkok, lehiinsim ki'ukkok, Waa'aannonnem makki kollonne afuurukkokii ni bikkinam Waa'a uunxookkokii Yesuus Kiristoosatte.

³⁵Kiristoos iittiinsi neese annanni issookkok ayyette? Hawwonnihe? Te'im kichchechchannihe? Te'im yaayyanchannihe? Te'im sibaaronnihe? Te'im umba'adoomannihe? Te'im malaayyaam hawwonnihe? Te'im bisa'annihe?

³⁶ Keesammi Kitaabanne «Ki bikkina balli hundam lenoommo; durakkam gereebbisa inkaa xigammummo» yamamaa kitaabamukkane.

³⁷Neese iittu Yesuus Kiristoosinne ee luwwi hundam kaa'nnoommo.

³⁸Lehom ihuta'n te'im heechcham ihuta'n te'im Waa'i asse'amaanom ihuta'n te'im gassaanoom ihuta'n te'im kaba yoo luwwam ihuta'n te'im hanenne waaroo luwwam ihuta'n te'im malaayyaammuwwam ihuta'n

³⁹te'im duunam ihuta'n te'im cebbam ihuta'n te'im qooccamu luwwi hundam ihuta'n mahim ni Moollanni Yesuus Kiristoosinne Waa'i neese iittu iittiinsi annanni isseena xanoobee'isa an la'aammo.