Read Hadiyya Oroome'i Asso 9 Bible Online

Oroome'i Asso 9 - Hadiyya bible

Oroome'i Asso 9

¹An Kiristoosan ihummi bikkina hanqa wocoommo bagaan qophphanoommoyyo. An qophphanumbee'isa i wodanonne yoo Keesammi Ayyaanim kurookko.

²Iyyabbaayyuwwi bikkina oohim iina qarmanni ihu Isra'ee'l shumo'ina i wodanonne lobakat kichchechchii u'nnanchii yookko. Ixxuwwi bikkina an duumamaammoohan ihaa Yesuus Kiristoosiinsi annanni iheena mixam hee'ummo.

⁴ Ixxuwwi Isra'ee'l ooso. Waa'ina oos ihimmi, Waa'i uwwu lombi, hidi'l sagar, See'l uwwanchi, Waa'ina otossimmi, neeyyatii

⁵maalda'uwwii ixxuwwane. Kiristoos maa'llisinne qaramukkok ixxuwwi shumo'iinsette. Hundi luwwiinsim hanaan yoo Waa'i heer heerinam maasse'amaakkoohan ihona! Aameen.

⁶Ihukkaarem Waa'ik sagar gataakko yimmayyo. Isra'eeliinsi qaranto'i keen hundim Isra'eelayyo.

⁷ Abrihaam shumo'iinsi qaranto'i keen hundim Abrihaam oosoyyo. Ihukkaarem «Ki shumo'i Yisaaqinne weeshamookko» yamamukko.

⁸Eehid yimmim Waa'ina ooso yamantamokim Waa'i neeyyaxxisinne ixxi oos ikka'a xiganto'i keeno bagaan maarinne oos ikko'i keenoyyo.

⁹ Oo Waa'i neeyyatim «La'mmaarage kido'i ammanenne daba'llaa waaroommo. Saara'am beeto qattamo» yamamukkane.

¹⁰Xale'i eehaneyyo; Irbiqam niyyanni Yisaaqina lamfoorette ikko'i ammane

¹¹ ciilluwwi qarameena illageenim joram erokam issitoo'nnim «Lobok hoffaannina ijaajamookko» yamamaa Irbiqana kuramaakko. Eehid ihukkokim Waa'i doo'llookkok eroka baximminne ihoo'n ixxi weeshukkisinne ihoo'isinatte.

¹³ Oohim Keesammi Kitaabanne «Yaaqooba iittaammo; ihukkaarem Eesa'a sabaammo» yamamukkane.

¹⁴Eehannata'i mayyinoommo? Waa'i beyyonne golo'immi yoohonnihe? Hore'em ee'isayyo.

¹⁵ Waa'i Muse'enam «Haafeena hasummaannina haafoommo; qishixxeena hasummaanninam qishixxoommo» yaakko.

¹⁶Ee bikkina haafit manni hasukkisinnette te'im yakukkisinnette ihoo'n Waa'i haafukkisinnette.

¹⁷ Waa'i Faari'oonina «An keese ki'isummok uulli hundannem i summi weeshamoo'isina i malaayye keesenne moo'iseenatte» yaakko.

¹⁸Ee bikkina Waa'i hasukkaannina haafookko. Hasukkaannikam wodano duudisookko.

¹⁹Ayyi la'ukko ki'nnuwwi iina «Eehannata'i Waa'i manna mahina jottakko'ookko yoolla? Ixxi yukkoka ayyi sabeena xanookko?» yitakkamo.

²⁰ Ihukkaarem at Waa'ina eehid yitoottok ayyette? Buchchi mu'ut «Eese mahina ka'isa issitaa baxxitto?» yaa baxu mancho xa'mmoohonnihe?

²¹Buchchiinsi mu'uta baxoo manchi matoo wereeggina matoo kora'i awwaadinam baxeena xanooyyonnihe?

²²Waa'a quuqisimminne bichchina guddo'i keenonne Waa'i ixxeka quunqa la'iseenaa malaayye moo'iseenaa lobakata iyyaqqukkaa'lleensi mayyitakkeenatte?

²³Ee'isa issukkokim gaassaatim lombina baxu keenina haafaa ixxeka lophphaakkoo lomba la'iseenatte.

²⁴Oo haafu keenim xale'i Ayihuxxi minaadabiinsette ihoo'n mulli minaadabiinsim weeshammummi neeseme edaatette.

²⁵ Oohim Hoose'i Kitaabanne «I minaadab ikkobee'i keeno ‹I minaadaba› yaa weeshoommo. Iittantobee'i keenom ‹Iittanto'oo keeno› yaa weeshoommo» yamamukkane.

²⁶ Odim « ‹I minaadabayyo› yamanta'a weeshanto'i uullannem ‹Hee'oo Waa'ina ooso› yamanta'a weeshantamo» yamamukkane.

²⁷ Issaayyaasim Isra'ee'l bikkina «Isra'ee'l oosik xig maham dambalaq shashsha'llisa dut ihukkaarem hofqaxichchi gatookko.

²⁸Mashka'oomim Moollanni ixxeka oogato'o malaayyaam quunqinne qaqqisaa uullanne eebookko» yaa alallaataakko.

²⁹ Odim Issaayyaas «Gogoxxi Moollanni Waa'i niina shumo'o gatisubeeta'n Soddo'mmisaa Gomo'llisaa inkaa hee'nnummo» yaa gaassaahim kuraakko.

³⁰Eehannata'i neese mayyinoommo? Muccurooma siiddeena yakitambee'i mulli minaadab muccurooma siiddo'o. Oo muccuroomim amma'nnatinne siidamoo muccurooma.

³¹Ihukkaarem seera egerimminne muccurooma siiddeena yakitam Isra'eel siiddeena xanto'oyyo.

³²Eehid ihukkok mahinatte? Muccurooma amma'nnatinne hasimma utta'a baxinne siiddeena hasso'i bikkinatte. Ee'isinne qoloo kinanne qolanto'o.

³³ Oohim Keesammi Kitaabanne «Manna qoloo kina[1] Yerusaaleemanne dissoommo. Oohim manna ubbuusoo kina. Ixxonne amma'nnookkok tuurooyyo» yamamukkane.