Read Hadiyya 1Qorontoos Asso 1 Bible Online

1Qorontoos Asso 1 - Hadiyya bible

1Qorontoos Asso 1

¹Waa'i doo'llinne Yesuus Kiristoosina asse'amaanchi ihoommisina weeshamummi Phaawuloosiinsii niyyabbaayyi Soostinoosiinsii

² ixxuwwinaa niinaa Moollanni ihu ni Moollanni Yesuus Kiristoosika summa beyyi hundannem weeshsham keeninne hundinnem maqire Yesuus Kiristoosinne annanni ikkakka'a Waa'i minaadab ikkakkeena weeshantakko'i Qorontoos beero'i amma'nnaanina.

³Niyyanni Waa'ikii Moollanni Yesuus Kiristoosikii eroommii xummii ki'nnuwwina ihona.

⁴Yesuus Kiristoosinne ihaa Waa'i ki'nnuwwina uwwu eroommi bikkina hundi ammanem Waa'a galaxxoommo.

⁵Hundisinnem oohim woc hundinnee lachchinnee ixxenne goddaan ikkakko'ookko.

⁶Kiristoos bikkina kullummi woshshannem ki'nnuwwi qoxxitakko'ookko.

⁷Ee bikkina ni Moollanni Yesuus Kiristoosika waarimma egettakku'uuyyi ki'nnuwwina Ayyaa'n uwwanchik mahim hanqatooyyo.

⁸Ni Moollanni Yesuus Kiristoos waaroo ayyaamonne miiqakkam luwwi bee'i keen ikkakka'a hee'llakkamisina lasaanchi afeebe'e Waa'i ki'nnuwwa qoxxisookko.

⁹Ixxi Beet ni Moollanni Yesuus Kiristoos mateeyyoomina ki'nnuwwa weeshu Waa'i amma'nnamaakkoohane.

¹⁰Iyyabbaayyuwwa, ki'nnuwwi hundim mexxo'i wodaninnee tiirinnee iittantakka'a mat ikkehe bagaan ki'nnuwwi lambe'enne annannaatoom ihoobee'isina ni Moollanni Yesuus Kiristoos summinne uunxoommo.

¹¹Iyyabbaayyuwwa, ki'nnuwwi lambe'enne wocanchi yoo'isa Qalo'i mi'n abaroosiinsi macceesaammo.

¹² Oohim ki'nnuwwi annannichchim «An Phaawuloosane» te'im «An Aphphuloosane» te'im «An Keefa'ane» te'im «An Kiristoosane» yitakkamuulla.

¹³Kiristoos baxxansamaatennihe? Te'im Phaawuloos ki'nnuwwi bikkina saqalamaatennihe? Te'im Phaawuloos summinne xammaqantakka'attennihe?

¹⁴ Qarisphoosiinsii Gaayoosiinsii bagaan ki'nnuwwiinsi an matom xammaqumbee'i bikkina Waa'a galaxxoommo.

¹⁵Ee bikkina ayyim ki'nnuwwa «Phaawuloos summinne xammaqantakko'ookko» yeena xanooyyo.

¹⁶ Odim Isxifaanoos mi'n abaroosam xammaqaammo. Eehanniinsi mulleka ayye xammaqumda'e sawwoommoyyo.

¹⁷Kiristoos eese asse'ukkok mishiraachchi sagara kuronatte bagaan xammaqonayyo. Kiristoos saqalamaa lehu leh awwaad bee'an ihoobee'isina manni lachchinne wocoommoyyo.

¹⁸Kiristoos saqalamaa lehukkisa kurimmi bi'llam keenina qawwooma. Ihukkaarem niina gantummi keenina Waa'i malaayye.

¹⁹ Keesammi Kitaabanne «Qoor kee'nneka qoorooma bi'isoommo. Lachchaam kee'nnekam lachcha awwaad bee'an issoommo» yamamaa kitaabamaakko.

²⁰ Qoor manchi hannonne yookko? Lobakat lachchi yookkok hannonne yookko? Odim ka uulli luwwa saarayyaa moo'ookkokdu hannonne yookko? Waa'i ka uullika qoorooma qawwoom issukkoyyonnihe?

²¹Ka uulli manni ixxuwwi gaqqi lachchinne Waa'a laqqambee'isa Waa'i ixxi qooroominne xufaakko. Ihukkaarem ka uulli mannina qawwoom ihaa xigamoo ka neese losinsoommi mishiraachchi sagaranne amma'nnitam keeno gatiseena Waa'i iittaakko.

²²Ayihuxxi manni mare'e hassamo. Giriik mannim qoorooma hassamo.

²³Ihukkaarem neese alallaantoommok Ayihuxxi manninaa qolancha, mulli manninaa qawwoom ihu saqalamaa lehu Kiristoosatte.

²⁴Weeshanto'i keenina Ayihuxxi manninaa mulli manninaa Kiristoos Waa'i malaayyee qooroomaa.

²⁵Waa'ik qawwoom manni qooroomiinsi odim Waa'ik hoongim manni qoxallaniinsi lobane.

²⁶Iyyabbaayyuwwa, weeshantakko'isa sawwi'llehe. Maa'llisinne sawwakkamaare dut keen qoolluwwi hee'llakko'oyyo. Odim dut keenim malaayyaammuwwi hee'llakko'oyyo. Dut keenim geejji shumo'iinsi qarantakko'oo keen hee'llakko'oyyo.

²⁷Ihukkaarem qoolluwwi keeno tuussiiseena Waa'i ka uulli qawwuwwa doo'llukko. Odim qoxalluwwa tuussiiseenam ka uulli qacaalluwwa doo'llukko.

²⁸Waa'i ka uulli manni «Lob luwwa» yaa sawwoo luwwa bi'iseena ka uullanne ceemamu luwwa, gadamu luwwaa mahannem xigamoobee'i luwwaa doo'llukko.

²⁹Eeham issukkok ayyi manchim Waa'i illagenne biramoobee'isinatte.

³⁰Yesuus Kiristoosinne Waa'i ki'nnuwwina heechcha uwwaakko. Waa'i niina qoorooma, muccurooma, eroommaa Gatisaanchoo issaa Yesuus Kiristoosa uwwaakko.

³¹ Ee bikkina Keesammi Kitaabanne «Bakke'ookkok ayyim Moollannanne bakke'ona» yamamaa kitaabamaakko.