Read Hadiyya 1Qorontoos Asso 10 Bible Online

1Qorontoos Asso 10 - Hadiyya bible

1Qorontoos Asso 10

¹ Iyyabbaayyuwwa, niyyanno'i hundim duubiinsi woroon ikko'isaa hundim dambalaqa fitto'isaa laqqakkona hasoommo.

²Muse'enne mateeyyoom yoo'isa moo'isseena hundim ee duubinnee dambalaqinnee xammaqanto'o.

³ Hundim iimaniinsi uwwamu hurbaata itto'o.

⁴ Hundim ee iimaniinsi uwwamu aggam aggo'o. Mashka'oomim ixxuwwa awwonam hee'u iimaniinsi uwwamu kiniinsim aggo'o. Oo kinim Kiristoosatte.

⁵ Ihukkaarem Waa'i ixxuwwiinsi lobakat keenonne liiramubee'i bikkina ixxuwwik leesh udma'anne ubaa gatukko.

⁶Ixxuwwi jor mixano mixxo'isa neesem minxoombee'isina oo hundim niina kobi'llishshi ihaakko.

⁷ Keesammi Kitaabanne «Manni itteenaa aggeenaa afuutto'o. Ee lasage kaddeena ki'llo'o» yamamaa kitaabamukkisam ixxuwwiinsi mat mat keen qophpha'n waa'ina otossito'isa otossinoone.

⁸ Ixxuwwiinsi mat mat saa'imminne adabi'lla'a mexxo'i ballanne lamiyyii sas kumii leto'i bikkina neesem saa'nnoone.

⁹ Ixxuwwiinsi mat mat keen Moollanna keento'aare hamashshi qasaa shu bikkina neesem Moollanna keennoone.

¹⁰ Ixxuwwiinsi mat mat keen quunquunto'aare sira'iilli bi'isu bikkina neesem qunquunnoone.

¹¹Oo hundim ixxuwwanne afukkok mulli keen ixxuwwanne xassaqqoo'isinatte. Ookki kitaabamukkokim lasaanchi doollenne hee'nnoommi neese axeereenatte.

¹²Ee bikkina uullukkoka labisookkok uboobee'isa ege'llona.

¹³Mannanne afu keenanchiinsi annanni ihaakkoo keenanchi ki'nnuwwanne afukkoyyo. Ihukkaarem ki'nnuwwi malaayyiinsi hanaan ihaakkoo keenanchanne aaggakkambee'isa egeroo Waa'i amma'nnamaakkoohane. Keenanchanne aaggakkam ammane iyyaqqitakkam malaayye uwwimminne ee keenanchiinsi fittakkam googo Waa'i gudisookko.

¹⁴Iittantakko'oo iyyabbaayyuwwa, qophpha'n waa'ina otossimmiinsi gibbehe.

¹⁵Qoossitakkam keen ikkakko'i bikkina ki'nnuwwina kuroommo; an wocoommi woshshanne ki'nnuwwi gagim oogattehe.

¹⁶ Waa'a galaxxinaa daayyammaa angoommi maasso uwwoo humbulli woyi'n diqaasa Kiristoos xiiginne niina mateeyyoom yoo'isa moo'isoohaneyyonnihe? Iinqaa intoommi qoroshodu Kiristoos maarinne niina mateeyyoom yoo'isa moo'isoohaneyyonnihe?

¹⁷Neese matem qorosho'iinsi mateeyyoomanne baxxammaa intoommi bikkina dut keen inkummaarem mexxo'i orachchome.

¹⁸ Huno'o, Isra'ee'l minaadaba sawwi'llehe; ee kitimakko'i luwwiinsi ittam keenina ee kitima hincaa'akka'a awwaadakkam Waa'inne mateeyyoom yoohaneyyonnihe?

¹⁹Eehannata'i an eehid yimmi qophpha'n waa'ina uwwakko'i hurbaatii oo otossakkam luwwii awwaad yoohane yimmannihe?

²⁰ Ee'isayyo! Mulli minaadab kitima hincaa'llamok habusinatte bagaan Waa'inayyo. Ee bikkina ki'nnuwwina habusinne mateeyyoom hee'oo'isina hasoommoyyo.

²¹Moollanni humbulliinsii habus humbulliinsii aggakkeena xantakkamoyyo. Odim Moollanni leemaatiinsii habus leemaatiinsii ittakkeena xantakkamoyyo.

²² Te'im ee'isa issimminne Moollanna to'achchinsonnihe? Neese ixxeensi qoxalloommonnihe?

²³ Luwwi hundim uwwamaakko. Ihukkaarem oo luwwi hundim awwaadooyyo. Luwwi hundim uwwamaakko. Ihukkaarem hundi luwwi li'isooyyo.

²⁴Ayyim ixxi ollakkichchina hara'mmoo luwwa hasona bagaan ixxi gagina awwaadoo luwwa hasoone.

²⁵Meeranne biteesamoo maara hundam ki'nnuwwi tiironne malantakkoo'n ittehe.

²⁶ Mashka'oomim Keesammi Kitaabanne «Uullii uullanne yoo luwwii hundim Moollannane» yamamaa kitaabamaakko.

²⁷Amma'nnubee'i manniinsi mat manchi ki'nnuwwa hurbaata ittakkona weeshoo ammane mattakkeena hassakkolas ki'nnuwwi tiironne maham malantakkoo'n hincu luwwa ittehe.

²⁸Ihukkaarem mat manchi ki'nnuwwina «Kuk qophpha'n waa'ina kitim ihaa hincaakkoo luwwa» yaa kuruta'n ee manchi bikkinaa ixxi tii'l bikkinaa yitakka'a ittakkotte.

²⁹Ee manchi bikkina yaa wocummo bagaan ki'nnuwwi tii'l bikkina wocummoyyo. Eehaara'i mulli manchi tii'l mal i wolabbano hinkid hoorookko?

³⁰An itoommi hurbaatina Waa'a galaxxoomman ihulas eehaara'i an Waa'a galaxxummi hurbaatina mullek eese acceeqasookkok mahinatte?

³¹Ki'nnuwwi ittakku'uuyyattem ihukko te'im aggakku'uuyyattem ihukko te'im mah luwwam issitakko'aare hundem luwwam Waa'i lombina issehe.

³²Ayihuxxi manni ihukko te'im Ayihud ihubee'i manni ihukko te'im amma'nnu Waa'i minaadabam ihukko ixxuwwa qoloo luwwa maham issitakkotte.

³³Anim manni hundim gatoo'isina yaa iina awwaadoo luwwa uraa issoommi luwwi hundinnem manni hundam liiranseena yakaammo.