Read Hadiyya 1Qorontoos Asso 11 Bible Online

1Qorontoos Asso 11 - Hadiyya bible

1Qorontoos Asso 11

¹ An Kiristoosa labummisam ki'nnuwwim eese labbehe.

²Hundem luwwannem eese sawwitakkam bikkinaa an ki'nnuwwina losisummi losishsha qoxxitakka'a amaddakko'i bikkinaa ki'nnuwwa galaxxoommo.

³Kabadem ki'nnuwwi laqqakkona hasoommok goon hundinam horoor Kiristoosatte. Ee'isam meentichchona horoor gooncho. Odim Kiristoosina horoor Waa'a.

⁴Goon ayyim horoore gunguu'llaa Waa'a uunxookkok te'im hiraagookkok Kiristoosa sholliisoolla.

⁵Ihukkaarem hinte meentichchom is horoore gunguu'llitoo'n Waa'a uunxitamote te'im hiraaggamote is aro'o sholliissamuulla. Oohim is horoor hogoossamukkaannisa issita'a sholliissamuulla.

⁶Meentichcho is horoore gunguu'llitambeelas horoore mussiixxitona. Ihukkaarem meentichchona horoore mussiixximmi te'im hogoossiixximmi sholliisoohan ihukkaa'lleensi is horoore gunguu'llitona.

⁷ Goonchi Waa'ika qooccaa lombaa moo'isoohan ihu bikkina horoore gunguu'llimmi hasisooyyo. Ihukkaarem meentichcho goonchina lombatte.

⁸ Meentichcho qooccanto'ok goonchiinsette bagaan goonchi meentichchoonsi qooccamukkoyyo.

⁹Ee'isam meentichcho qooccanto'ok goonchinatte bagaan goonchi meentichchona qooccamukkoyyo.

¹⁰Ee bikkinaa Waa'i asse'amaa'n bikkinaa meentichcho ijaajantaman ihukkisa moo'isseena is horoore gunguu'llimmi hasisookko.

¹¹Ihukkaarem meentichcho goonchiinsi qooccanto'isam goonchim qaramukkok meentichchoonsette ihu bikkina Moollannina hee'akkam heechchanne meentichcho goonchi bee'eka, goonchim meentichcho bee'eka maham awwaadooyyo. Ihukkaarem luwwi hundim qooccamukkok Waa'iinsette.

¹³Huno'llehe, ki'nnuwwi gagim oogattehe; meentichcho horoore gunguu'llitoo'n Waa'a uunximmi laboohonnihe?

¹⁴Goonchi ixxi horoore qeeraa'llisaa li'isimmi sholliisoohan ihukkisa qooccanchi ixxi gagoomim kurooyyonnihe?

¹⁵Ihukkaarem meentichchona qeeraa'l horoor hee'immi isena lomba. Qeeraa'l horoor isena uwwamukkokim ise amboo'isinatte.

¹⁶Ayyim eehanni bikkina fitameena hasulas niinaa amma'nnu Waa'i minaadabinaa ee an kurummaanniinsi mulli losan bee'isa tiissiisoommo.

¹⁷Ki'nnuwwi wixxitakkamok er luwwinatte ihoo'n jor luwwinatte ihu bikkina ka ijaajo uwwummuuyyi ki'nnuwwa galaxxoommoyyo.

¹⁸Luxxeka macceesummisam amma'nnaan wixxitakkam ammane ki'nnuwwi lambe'enne annannaatoom yoo'isa macceesoommuulla. Eehannik kolli hanqi ihukkisa amma'nnoommo.

¹⁹Hanqo'i keen la'antamisina annannaatoom ki'nnuwwi lambe'enne ihimmi hasisookko.

²⁰Ki'nnuwwi wixxitakkam ammane ittakkamok Moollanni hurbaatayyo.

²¹Itoo ammane mat mulleka egeroo'n annannichchim ixxi gaqqi hurbaata itoo bikkina matii sibaarookko matii dimbookko.

²²An ki'nnuwwina mayyo? Ittakkeenaa aggakkeenaa ki'nnuwwi gaqqi min bee'ennihe? Waa'a amma'nnu minaadaba sholliissakkamonnihe? Te'im ma'lluchchim bee'i keeno tuussiissakkamonnihe? Eehannata'i ki'nnuwwina mayyoommo? Eehannina ki'nnuwwa galaxxonnihe? Hore'em galaxxoommoyyo.

²³An ki'nnuwwina higisaa uwwummok Moollanniinsi aa'ummane. Moollanni Yesuus higisamaa uwwamu hiimo qorosho'o ki'isaa amadaa

²⁴Waa'a galaxxaa iiqaa «Kuk ki'nnuwwi bikkina uwwamoo i maara; eese tiittakkeena kaka issehe» yukko.

²⁵ Ee'isam hii'm hurbaatiinsi lasage humbulli woyi'n diqaasa ki'isaa amadaa «Ku woyi'n diqaas i xiiginne aagoommi haareechchi hidiro. Kaka aggakkam ammane hundam eese tiittakkeena issehe» yukko.

²⁶Ka qorosho'o ittakkam ammanee woyi'n diqaasam agakkam ammanee hundam Moollannika leho ixxi waareebe'i afeebe'e alallaattakkamo.

²⁷Ee bikkina ayyim laboobee'isinne Moollannika qorosho'o itookkokii woyi'n diqaasam agookkokii ixxonne Moollanni maa'llehii xiiqqehii badan yoohane.

²⁸Ihukkaarem manni ixxi gaga saarayyaqqaa moo'aa lasage qorosho'ooma itona; woyi'n diqaasam agona.

²⁹Ayyim qoossaa la'oo'n Moollannika maara itookkokii xiigam agookkokii ixxi gaganne oogato'o eebaqqeena itoollaa agoollaa.

³⁰Ki'nnuwwiinsi mat mat keen hoongaanoo jabbaanoo ikko'okii odim mat mat keenim leto'okii ee bikkinatte.

³¹Ihukkaarem neese hanqo'isinne ni gaganne oogantoomman ihulas neesennem oogatamooyyo.

³²Ka uulli manninne maqire Waa'i neesenne oogatoobee'isina kaba neesenne oogataa guzumo'oolla.

³³Eehannata'i iyyabbaayyuwwa, Moollanni hurbaata ittakkeena wixxitakkam ammane hundim wixxeebe'e ege'llammehe.

³⁴Ki'nnuwwik wixxit oogato'ina ihoobee'isina ayyi manchim sibaaraakkoohan ihulas ixxi minenne itona. Mulli gatti ogora waaroommi ammane kuroommo.