Read Hadiyya 1Qorontoos Asso 12 Bible Online

1Qorontoos Asso 12 - Hadiyya bible

1Qorontoos Asso 12

¹Iyyabbaayyuwwa, Keesammi Ayyaaniinsi uwwamoo uwwanchuwwi bikkina laqqakkamisina hasoommo.

²Amma'nnitakkoo'n illageen foor bee'i qophpha'n waa'ina otossitakkeena dutisinne massantakko'isa laqqakkamo.

³Ee bikkina ki'nnuwwi laqqakkona hasoommok Waa'i Ayyaaninne yookkok ayyim «Yesuus duumamaakkoohane» yookkok bee'e. Ee'isam odim Keesammi Ayyaan bee'ek «Yesuus Moollanna» yookkok matim bee'e.

⁴ Keesammi Ayyaan mato; ihukkaarem ixxi uwwoo uwwanchuwwi annanni annanna.

⁵Moollanni mato; ihukkaarem annanni annanni awwaad yookko.

⁶Bax ogor duta; ihona bagaan annannichchom hundi baxom baxisookkok mexxo'i Waa'a.

⁷Annannichchonnem Keesammi Ayyaa'n bax moo'amookkok hundinam awwaadoo'isinatte.

⁸Matina Keesammi Ayyaaniinsi qooroo'm woc uwwamookko. Mullaannina odim ee Keesammi Ayyaaniinsim lachchi yoo woc uwwamookko.

⁹Matina odim ee Keesammi Ayyaaniinsi amma'nnat uwwamookko. Matina odim ee matem Keesammi Ayyaaniinsim fayyiisimmi uwwanchi uwwamookko.

¹⁰Mullaannina odim maalalsiisoo baxo baxoo uwwanchi uwwamookko. Mullaannina odim hiraago kurimmi uwwanchi uwwamookko. Mullaannina odim ayyaannuwwa annanni issaa la'oo uwwanchi uwwamookko. Mullaannina odim mulli suuminne wocimmi uwwanchi uwwamookko. Mullaannina odim mulli suuminne wocamu woshsha tiroo uwwanchi uwwamookko.

¹¹Ee hundam baxisookkok ee mexxo'i Keesammi Ayyaaname. Oo mexxo'i Keesammi Ayyaanim annannichchinam annanni annanni uwwancha ixxi hasukkisinne uwwaakko.

¹² Mat orachchonne dut qaamafeet yo'isam oo dut qaamafeetim mat orachchi ihaa baxamukkisam Kiristoosim mexxo'i orachchisa.

¹³Ee'isam neesem Ayihuxxi manni inkummo te'im Ayihud inkumbee'i manni inkummo te'im agid inkummo te'im wolab inkummo mexxo'i Ayyaaninne mexxo'i orachchi inkeena xammaqammaammo; neese hundim mexxo'i Keesammi Ayyaana aa'nnaammo.

¹⁴Orachchi dut qaamafeet yoohane bagaan mexxo'i matoyyo.

¹⁵Ayla'ukko lokki «An angayyo; ee bikkina an orachchiinsi matoyyo» yimminne orachchiinsi mat ihimmi gatoohonnihe?

¹⁶Odim maccim «An illeyyo; ee bikkina an orachchiinsi matoyyo» yimminne orachchiinsi mat ihimmi gatoohonnihe?

¹⁷Orachchi hundim illi ihuta'n mahinne macceesakkam hee'akko'o? Orachchi hundim macci ihuta'n mahinne enjeesakkam hee'akko'o?

¹⁸Ihona bagaan orachchi qaamafeet hundam ixxena laboo beyyonne issaa Waa'i doo'llukkisa gudisaakko.

¹⁹Orachchi hundim mexxo'i qaamafeetichchi ihuta'n orachchi hannonne hee'am hee'ukko?

²⁰Qaamafeet dut ihona bagaan orachchi mexxokkichcho.

²¹Illi angina «An keese hasoommoyyo» yeena xanooyyo. Ee'isam horoor lokkina «An keese hasoommoyyo» yeena xanooyyo.

²²Hoongaano labbam orachchonne yo'i qaamafeettuwwi lobakata awwaaddam keeno.

²³Ni orachchi qaamafeettuwwiinsi lombi bee'eka labinsoommaannina lobakat lomba uwwinoommo. «Tuussiisoohane» yinoommi orachchom annannisinne maanxaa ege'llinoommo.

²⁴Lombi yoo qaamafeettuwwina ookki hasisooyyo. Ihukkaarem lombi bee'eka laboo qaamafeeta Waa'i lobakat lomba uwwimminne amaxxansaakko.

²⁵Waa'i ee'isa issukkokim qaamafeet hundim mat matina hara'mmantamisinatte bagaan orachchonne annannaatoom hee'oobee'isinatte.

²⁶Orachchiinsi mat qaamafeetichchi hawwuta'n orachchi hundoomim maqirem hawwookko. Odim mat qaamafeetichchi lomba siixxuta'n hundim ixxenne maqirem liiramookko.

²⁷Ki'nnuwwi hundim Kiristoos orachcho. Ee orachchinam ki'nnuwwi annannichchim qaamafeettuwwa.

²⁸ Waa'i amma'nnaa'n woronne mat mat keeno luxxeka asse'amaano, la'mmeka odim hiraagaano, saxxeka odim losisaan issaakko. Eehanniinsi odim maalalsiisoo luwwa issitam keeno, fayyiissam keeno, mulli keenina hara'mmitam keeno, gassaanoo annanni suume woccam keenoo issaakko.

²⁹Ixxuwwi hundim asse'amaanonnihe? Te'im hundim hiraagaanonnihe? Te'im hundim losisaanonnihe? Hundim maalalsiisoo luwwa issitam keenonnihe?

³⁰Ixxuwwi hundim fayyiisimmi uwwancha siixxita'atennihe? Odim hundim mulli suuminne woccam keenonnihe? Te'im ixxuwwi hundim mulli suuminne wocakko'i luwwa titta'a kuttam keenonnihe?

³¹Ki'nnuwwi ee keeniinsi hore'em lophphoo uwwancha siixxitakkeena lonsitakka'a hassehe. Odim hundiinsi lophphoo googo an ki'nnuwwina moo'isoommo.