Read Hadiyya 1Qorontoos Asso 13 Bible Online

1Qorontoos Asso 13 - Hadiyya bible

1Qorontoos Asso 13

¹Manni suuminnee Waa'i asse'amaa'n suuminnee wocumta'nnim iitti bee'ulas muunoo doolisaa chilchiyye'oo xaa'llisaa ihaammo.

² Hiraaqqi uwwanchi hee'uta'nnim, maaxamu luwwi hundam la'umta'nnim, lachchi hundam la'umta'n odim duunnuwwa beyyiinsi ki'isaa hooroo amma'nnatim hee'uta'n iina iitti bee'ulas an awwaad bee'ane.

³Iina yoo luwwi hundam buxina uwwumta'nnim i orachchim giiranne shokkona higisaa uwwumta'nnim iitti bee'ulas iina maham awwaadooyyo.

⁴Iitti iyyaqqoohanee biijaallaa; iitti to'achchoobee'ane, bakke'oobee'anee bolxoobee'anee.

⁵Iitti laboobee'eka issoobee'ane. Iitti «Xale'i iina ihona» yooyyo; iitti nadadooyyo; bi'ishsham xigooyyo.

⁶Iitti hanqanne liiramoohane bagaan jor woshshanne liiramooyyo.

⁷Iitti luwwi hundam iyyaqqoohane; luwwi hundam amma'nnoohane; hundannem neeyyato issoohane; luwwi hundannem xa'nnoohane.

⁸Iitti heer heerinam hee'oohane. Hiraaqqi uwwanchim higoohane; mulli suuminne wocimmim gatoohane; lachcham ihuta'n higoohane.

⁹Neese lachcham guullinaa lanqoommoyyo. Hiraago guullinaa kulloommoyyo.

¹⁰Ihukkaarem miiqakkambee'i luwwi waaroo ammane miiqakkam luwwi gatookko.

¹¹An ooshshichchi hee'ummi ammane ooshshichchisam wocam hee'ummo. Ooshshichchisam sawwam hee'ummo. Ooshshichchisam saarayyam hee'ummo. Oosoommano guullaa lasage ee oosoomma'n luwwa uraa urummo.

¹²Kaba neese kulkulli gagmoo'ixxanne moo'aqqoo manchisa moo'aqqinoommuulla. Ihukkaarem waaroo ammane ni illinne qoossinaa moo'nnoommo. Kaba guullaa la'umbee'aarem ee ammane eese guullaa la'oo'isa anim guullaa la'oommo.

¹³Ee bikkina amma'nnat, neeyyatii iittii hee'llamo. Ihukkaarem ee sasiinsim lophphookkok iitto.